Afurika y’Epfo yashyigikiye ko Zimbabwe ikurirwaho ibihano

Yanditswe na Bukuru JC
Kuya 18 Ukwakira 2019 saa 02:22
Yasuwe :
0 0

Inteko Ishinga Amategeko ya Afurika y’Epfo, kuri uyu wa Kane yasabye abagize Inteko Ishinga Amategeko Nyafurika (PAP), gushyigikira ubusabe bw’uko Zimbabwe yakurirwaho ibihano mu by’ubukungu.

Ubu busabe bwashyikirijwe PAP na Amos Masondo, umwe mu bagize Inteko Ishinga Amategeko, wavuze ko iyi nteko ifite ubushobozi ashingiye ko yibukirwa ku gikorwa cy’ubutwari cyo mu 2016, aho yasabye ko Leta zunze Ubumwe za Amerika zikuriraho ibihano Sudan, kandi bigakorwa.

Leta zunze Ubumwe za Amerika, u Bwongereza n’Umuryango w’Ubumwe bw’u Burayi, kuva mu 2002 zafatiye Zimbabwe ibihano by’ubukungu, imari n’ubucuruzi bwo Robert Mugabe yari Perezida.

Ibi bihano byagize ingaruka nyinshi ku bukungu bwa Zimbabwe no ku baturage bayo, binagera ku Muryango uharanira iterambere ry’ibihugu byo muri Afurika y’Amajyepfo (SADC).

Masondo yagize ati “Duhangayikishijwe n’ibi bihano by’akarengane, by’uruhande rumwe kuko bifite ingaruka zitababarirwa ku bagore, abana n’abaturage basanzwe b’igihugu”.

Masondo yasabye ko mu buryo bwihutirwa PAP yafatanya n’abakuru b’ibihugu bya SADC, mu gusaba ko ibihano by’ubukungu byafatiwe Zimbabwe bihita bikurwaho.

PAP nka rumwe mu rwego rwa AU, igamije ko abaturage bose ba Afurika bagira uruhare mu biganiro n’ibyemezo bifatwa ku bibazo biri ku mugabane.

Ibihano byafatiwe Zimbabwe byarayishegeshe cyane ko byatumye igorwa bidasanzwe no kubona iby’ibanze mu buzima nk’ibikomoka kuri peteroli, amashanyarazi n’amazi.

Amos Masondo avuga ko ibihano byafatiwe Zimbabwe bigomba gukurwaho byihuse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza