Afurika y’Epfo yasabye imbabazi Nigeria ku bw’abaturage bayo bahohotewe

Yanditswe na Habimana James
Kuya 17 Nzeri 2019 saa 04:54
Yasuwe :
0 0

Igihugu cya Afurika y’Epfo cyasabye imbabazi igihugu cya Nigeria, nyuma y’aho abaturage bacyo bahohotewe mu bikorwa byo kwibasira abanyamahanga bimaze iminsi biri mu Mijyi irimo na Johannesburg.

Kugeza ubu abantu 12 nibo babaruwe ko bishwe muri uku Kwezi mu bikorwa by’urugomo byibasiye abanyamahanga.

Intumwa ya Afurika y’Epfo, Jeff Radebe, yagaragarije Perezida wa Nigeria Muhammadu Buhari ko iki gihugu gisabye imbabazi ku bw’aya mahano yabaye.

Radebe yavuze ibi ubwo yari i Abuja muri Nigeria mu nama yahuje ibihugu byombi.

Kuva kwibasira abanyamahanga byatangira muri Afurika y’Epfo, abaturage ba Nigeria ni bamwe mu bibasiwe cyane, ibintu byatumye ibi bihugu byombi binafite ubukungu bukomeye ku mugabane wa Afurika birebana ay’ingwe.

Radebe yagize ati “Ibyabaye ntabwo Afurika y’Epfo ibishyigikiye, Polisi yacu ntizabyihanganira kandi buri wese wagize uruhare muri uru rugomo azagezwa imbere y’ubutabera.”

Radebe yabwiye Buhari ko guverinoma ya Afurika y’Epfo yamaganye uru rugomo, ndetse ikaba yarafashe ibyemezo bikakaye.

BBC yatangaje ko nyuma y’amagambo ya Radebe, Perezida Buhari yamushimiye kuko baje kubasobanurira ibyabereye muri Afurika y’Epfo birimo ubwicanyi no kuvana mu byabo abanyamahanga, avuga ko imibanire hagati y’ibihugu byombi izarushaho kuba myiza.

Perezida wa Afurika y’Epfo, Cyril Ramaphosa aherutse kuvuga ko yatewe ikimwaro n’urugomo rwabaye mu gihugu cye.

Yagize ati “Dutewe impungenge n’ibyabaye kandi nk’igihugu, dutewe ipfunwe kubera ko ibi bihabanye n’indangagaciro za Afurika y’Epfo.”

Nubwo nta muturage wa Nigeria waguye muri uru rugomo, imitungo yabo niyo yagiye yibasirwa cyane.

Muri aba bantu 12 bishwe, 10 bakomoka muri Afurika y’Epfo naho 2 ni abo muri Zimbabwe.

Umwuka mubi hagati y’ibihugu byombi wabaye mubi nyuma y’aho hakwirakwijwe amafoto ku mbuga nkoranyambaga, agaragaza Abanya-Nigeria bagirirwa nabi abandi bikicwa.

Guverinoma ya Nigeria yavuze ko nubwo nta bimenyetso by’uko ibi byabaye, ariko ngo ubucuruzi bw’abaturage bayo nibwo bwigabijwe cyane.

Kugeza ubu nubwo ibiganiro bikomeje hagati ya Nigeria na Afurika y’Epfo, Nigeria ikomeje guhungisha abaturage bayo.

Kuri uyu wa Kabiri Abanya-Nigeria 300 nibo biteganyijwe ko bagera mu gihugu bavanwe muri Afurika y’Epfo, mu cyumweru gishize ho hageze 188.

Ubushomeri muri Afurika y’Epfo buri kuri 29%, abaturage bakavuga ko imirimo yatwawe n’abanyamahanga.

Perezida Ramaphosa wa Afurika y'Epfo (ibumoso) na Buhari wa Nigeria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza