Afurika y’Epfo: Perezida Ramaphosa yishyize mu kato kubera Coronavirus

Yanditswe na Bukuru JC
Kuya 28 Ukwakira 2020 saa 10:59
Yasuwe :
0 0

Perezida wa Afurika y’Epfo, Cyril Ramaphosa yishyize mu kato nyuma y’uko umwe mu bantu baherutse guhura agaragaweho coronavirus.

Itangazo ryavuye mu biro bya Perezida, rivuga ko Ramaphosa yishyize mu kato kubera umuntu bahuriye mu musangiro ku wa Gatandatu ushize, nyuma uwo muntu bakamusangamo coronavirus.

Uwo musangiro wari wateguwe n’umuryango Adopt-a-School Foundation ugamije gushakisha inkunga. Witabiriwe n’abantu 35, ubera muri hoteli mu mujyi wa Johannesburg nk’uko BBC yabitangaje.

Ibiro bya Perezida byatangaje ko nta kimenyetso na kimwe cya coronavirus Ramaphosa agaragaza, icyakora ko agomba kwipimisha kugira ngo amenye uko ahagaze nk’uko amabwiriza y’ubuzima abiteganya.

Iryo tangazo rikomeza rivuga ko mu kubahiriza amabwiriza yo kwirinda no kurinda abandi, Perezida Rampahosa agomba kujya mu kato ariko agakomeza inshingano ze nk’umukuru w’igihugu.

Uwanduye coronavirus wahuye na Ramaphosa yagaragaje ibimenyetso ku cyumweru, apimwa kuwa mbere basanga ararwaye.

Muri uwo musangiro, Perezidansi itangaza ko hari hubahirijwe amabwiriza yo kwirinda ndetse Ramaphosa ngo yakuyemo agapfukamunwa agiye kurya, agiye no kuvuga ijambo.

Perezida Cyril Ramaphosa yishyize mu kato nyuma yo guhura n'uwanduye coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .