00:00:00 IGIHE NETWORK KN KINYARWANDA EN ENGLISH FR FRANCAIS

Adolphe Muzito uheruka gusaba ko hubakwa urukuta hagati y’u Rwanda na RDC yirukanywe mu Nteko

Yanditswe na IGIHE
Kuya 16 June 2022 saa 08:01
Yasuwe :

Inteko Ishinga Amategeko ya Repubulika Iharanira Demokarasi ya Congo yatesheje agaciro manda z’abadepite batanu barimo Adolphe Muzito, bazira kutaboneka mu mirimo y’Inteko nta mpamvu zizwi.

Ni icyemezo cyafashwe n’Inteko rusage y’Umutwe w’Abadepite kuri uyu wa Gatatu, nyuma yo kwakira raporo ya Komisiyo idasanzwe yashyiriweho gushakira umuti ikibazo cy’abadepite bataboneka.

Batanu bahise bahagarikwa ni Henri Mova Sakanyi, Marie-Ange Mushobekwa, Papy Nyango, Adolphe Muzito na Luc Mulimbalimba.

Inama ya ba perezida ba komisiyo z’Inteko ishinga amategeko ya RDC yabaye ku wa 20 Mata, yari yashyigikiye ko abadepite basiba bahagarikwa.

Ni icyemezo cyazamuriwe mu nteko rusange yo ku wa 18 Mata, nyuma y’ubusabe bwatanzwe na Depite Paulin Odiane.

Inteko ishinga amategeko ya RDC yemeje ko abadepite birukanywe bagomba gusimburwa n’ababakurikira mu mashyaka bakomokamo.

Muzito wigeze kuba Minisitiri w’Intebe wa RDC ni umunyapolitiki ugira imvugo z’urwango ku Rwanda, uheruka kuvuga ko kugira ngo igihugu cye kigire amahoro, ari uko hakubakwa urukuta rugitandukanya n’u Rwanda.

Yatangaje ibi mu nama nyunguranabitekerezo aherutse kugirana n’abayobozi bo mu nzego z’ibanze muri RDC, barebera hamwe amategeko y’ubutaka.

Muzito usigaye ari Umuyobozi w’Ishyaka rya Nouvel Elan, yavuze ko kugira ngo RDC ikemure ibibazo ifite bizayisaba gushyira abasirikare ku mbibi zayo n’u Rwanda ndetse ikubaka n’urukuta ruyitandukanya n’iki gihugu cy’igituranyi.

Ati "Dushobora gushyira abasirikare ibihumbi 50 ku mbibi zidutandukanya na Uganda n’u Rwanda. Ku ruhande rw’u Rwanda dufite ubuso bwa kilometero 60 cyangwa 70 zo kubaka ubundi bikaba birarangiye, ahasigaye hose ni amazi cyangwa imisozi, ariko ahantu hateye inkeke hangana na kilometero 60, twahakora urukuta rungana gutyo, ibya Uganda byo twaba tubireba neza mu gihe kiri imbere."

Yakomeje avuga ko u Rwanda rufite gahunda yo kwirukana abaturage baba mu Burasirazuba bwa RDC rukahatuza abarwo babuze ubutaka bwo kubaho.

Ati "U Rwanda binyuze mu gukoresha M23 rurashaka guca abaturage mu butaka bwacu bwo mu Burasirazuba ubundi rukahatuza abaturage bavuye hanze basanganywe ibibazo by’ubutaka. Ubu u Rwanda rutuwe n’abaturage 500 kuri kilometero kare, mu myaka 20 bazaba ari 1000 kuri kilometero kare. Kugira ngo dukemure iki kibazo burundu tugomba kubaka urwego rwacu rw’ingabo tukarugenera miliyari imwe y’amadolari cyane ko urwego rwacu mu bijyanye no gukusanya imisoro ruri kuzamuka."

Si ubwa mbere Adolphe Muzito yumvikanye mu mvugo zibiba urwango hagati y’Abanyarwanda n’Abanye-Congo.

Mu 2019 yigeze kuvuga ko kugira ngo amahoro aboneke n’ibibazo by’umutekano muke mu Burasirazuba bwa Congo birangire, ari uko batera u Rwanda kandi bakarufata bakarwomeka ku gihugu cyabo.

Muzito n’abandi banye-Congo bamwe na bamwe, umutekano muke umaze imyaka isaga 20 mu Burasirazuba bw’igihugu cyabo bakunze kuwutwerera u Rwanda mu rwego rwo gusibanganya amakosa yakozwe n’abayoboye icyo gihugu.

Inteko rusange y'Umutwe w'Abadepite muri RDC yirukanye abadepite basiba nta mpamvu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .