Abikorera muri EAC basabye ibihugu kongera gufungura ingendo z’indege

Yanditswe na IGIHE
Kuya 10 Nyakanga 2020 saa 01:07
Yasuwe :
0 0

Urugaga rw’Abikorera mu Muryango wa Afurika y’Iburasirazuba (EABC), rwasabye za guverinoma gufungura ingendo z’indege zose kugira ngo urwego rw’ubucuruzi, ubukerarugendo ndetse no kwakira abantu byongere gukorwa.

Mu itangazo ryasohotse ku wa Gatatu w’iki cyumweru, EABC, yashimye ingamba zafashwe n’inzego z’ubuzima mu kwirinda ikwirakwira ry’icyorezo cya Coronavirus, ariko ivuga ko igihe kigeze ngo ingendo z’indege zisubukurwe.

Tanzania yasubukuye ingendo mpuzamahanga ku wa 18 Gicurasi, mu Rwanda ingendo z’abakerarugendo zafunguwe ku wa 18 Kamena, Kenya yafunguye ingendo z’indege z’imbere mu gihugu ku wa 15 Nyakanga ndetse ingendo mpuzamahanga mu Rwanda na Kenya zizasubukurwa ku wa 1 Kanama 2020.

Nubwo Akarere kemereye ingendo z’indege zitwara imizigo gukora, EABC, yagaragaje ko hakwiye kujyaho amabwiriza n’ingamba zihuriweho mu kongera gufungura ingendo mu Karere hagamijwe kongerera icyizere abagenzi no kongera kuzahura urwego rw’ubwikorezi bw’indege.

Kugeza ubu ntabwo Uganda irashyiraho itariki yo kongera gufungura Ikibuga Mpuzamahanga cy’Indege cya Entebbe.

EABC iherutse kugaragaza ko urwego rw’ubukerarugendo mu Karere ruzahura n’ibihombo bikomeye kubera guhagarika ibikorwa mu kwirinda icyorezo cya COVID-19.

EACB igaragaza ko muri EAC nibura miliyari eshanu z’amadolari yagombaga kwinjizwa n’ubukerarugendo azagabanuka mu 2020 kubera icyo cyorezo, mu gihe abakerarugendo bagera kuri miliyoni 6.2 bagombaga gusura Akarere bashobora kugabanuka.

Raporo ya EABC yasohotse tariki 4 Mata, igaragaza ko ubukerarugendo ari rumwe mu nzego zinjiriza amafaranga menshi ibihugu bigize EAC ruzahomba cyane.

Raporo y’Inteko Ishinga Amategeko ya EAC (EALA) yo mu 2018 yagaragaje ko abakerarugendo b’abanyamahanga binjira muri EAC biyongereye bakagera kuri miliyoni 5.7 mu 2017 bavuye kuri miliyoni 3.5 mu 2006.

Ubukerarugendo bwagize uruhare rwa 8.8 % ku Musaruro Mbumbe (GDP) w’ibihugu byose bigize EAC mu 2017.

Ibihugu bitandukanye muri EAC byatangiye gufungura ingendo z'indege

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .