Abayobozi barimo Perezida Kagame bagiye kuganira ku buryo Afurika yakora inkingo za Covid-19

Yanditswe na Ndahayo Emmanuel
Kuya 12 Mata 2021 saa 08:19
Yasuwe :
0 0

Abayobozi batandukanye ku Mugabane wa Afurika, barimo na Perezida Paul Kagame, barahurira mu nama ikomeye izamara iminsi ibiri, igamije kwigira hamwe uko Umugabane wa Afurika wakwagura ubushobozi bwawo bwo kwikorera inkingo za Covid-19.

Ni inama ikomeye cyane iza kuba hifashishijwe ikoranabuhanga, igahuza Perezida Kagame unayoboye umuryango w’Iterambere wa AUDA-NEPAD, ndetse akaba umukangurambaga muri gahunda igamije gufasha ibihugu bya Afurika kongera ingengo y’imari bishora mu rwego rw’ubuzima.

Iyi nama iraba ifite insanganyamatsiko igira iti “Ikorwa ry’inkingo muri Afurika mu kurinda ubuzima”.

Uretse Perezida Kagame, abandi bari bwitabire iyi nama barimo Perezida Felix Tshisekedi wa Repubulika Iharanira Demokarasi ya Congo, akaba ari nawe uyoboye Umuryango wa Afurika Yunze Ubumwe, AU.

Harimo kandi Umuyobozi Mukuru w’Ishami ry’Umuryango w’Abibumbye Ryita ku Buzima, OMS, Dr. Tedros Ghebreyesus; Umuyobozi Mukuru w’Umuryango Mpuzamahanga w’Ubucuruzi, Dr. Ngozi Okonjo-Iweala ndetse na Dr. Vera Songwe, Umunyamabanga Mukuru wa Komisiyo y’Ubukungu ku Mugabane wa Afurika.

Harimo kandi Perezida Cyril Ramaphosa wa Afurika y’Epfo, akaba n’umwe mu bakomeje kuzamura ijwi ryabo basaba ko Umugabane wa Afurika utasigara inyuma mu itangwa ry’inkingo ku Isi.

Iyi nama kandi iritabirwa na Moussa Faki Mahamat uyoboye Komisiyo ya AU, Dr. Ibrahim Assane Mayaki, Umuyobozi Mukuru wa AUDA-NEPAD, Perezida wa Senegal, Macky Sall ndetse na Winnie Byanyima uyoboye Ishami ry’Umuryango w’Abibumbye ryita ku kurandura icyorezo cya SIDA, UNAIDS.

Intumwa Yihariye ya AU mu guhangana n’icyorezo cya Covid-19, akaba n’umushoramari ukomeye, Strive Masiyiwa, araza kuba ari muri iyi nama, kimwe na Prof. Senait Fisseha uyobora umuryango mpuzamahanga wa Susan Thompson Buffet Foundation.

Uretse kurebera hamwe uburyo Umugabane wa Afurika wabona inkingo zihagije zatuma urandura icyorezo cya Covid-19, iyi nama ikomeye iranagaruka ku buryo uyu Mugabane wakubaka ubushobozi buhuriweho ku buryo no mu myaka iri imbere, wajya ugira uruhare mu ikorwa ry’inkingo z’ibyorezo binakunze kuwibasira kurusha indi Migabane, nk’uko byagenze kuri Ebola na SIDA ndetse n’izindi ndwara nka Malaria n’igituntu.

Hari impungenge z’uko Umugabane wa Afurika ushobora gusigarana icyorezo cya Covid-19 nyamara ahandi cyarashize kera, bitewe no kutabona inkingo zihagije zo kukirandura.

Ku mpuzamandengo, umuntu umwe muri bane amaze guterwa nibura dose imwe y’urukingo rwa Covid-19 mu bihugu bikize, mu gihe muri Afurika ari umuntu umwe mu bantu barenga 500.

Perezida Kagame ni umwe mu bari buze kwitabira iyi nama ikomeye
Iyi nama iritabwirwa na bamwe mu Banyafurika bafite imyaka yo hejuru mu bigo bikomeye ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .