00:00:00 IGIHE NETWORK KN KINYARWANDA EN ENGLISH FR FRANCAIS

Umusirikare wa FARDC n’abasivili batatu biswe intasi z’u Rwanda

Yanditswe na Musangwa Arthur
Kuya 28 Ukuboza 2022 saa 11:17
Yasuwe :

Umugambi wa Repubulika Iharanira Demokarasi ya Congo (RDC) wo kwegeka ibibazo byayo ku Rwanda urakataje, kuri iyi nshuro yagaragaje imyirondoro n’amafoto y’abagabo bane barimo umusirikare wo ku rwego rwa Colonel mu ngabo zayo FARDC, bashinjwa kuba intasi z’u Rwanda.

Aberekanywe ni Nshimiyimana Biseruka Juvénal w’imyaka 58, Murokore Mushabe Moses w’imyaka 33. Abandi ni Nganji Nsengiyumva Remy bakunze kwita Djuma na Col Mugisha Ruyumbu Santos, uyu akaba ari umusirikare mu ngabo za FARDC.

Nshimiyimana Biseruka na Murokore basanzwe bakorera Umuryango utegamiye kuri Leta uharanira guteza imbere urwego rw’ubuzima muri RDC witwa “African Health Development Organization” (AHDO).

Leta ya Congo ivuga ko Murokore Mushabe Moses, w’imyaka 33 muri mudasobwa ye basanzemo ifoto ye yambaye impuzankano ya RDF ari kumwe na bagenzi be. [Iyi foto yerekana ko ari impuzankano zambikwaga abari mu itorero ry’igihugu]. Ibi ni byo baheraho bavuga ko ari umusirikare w’u Rwanda.

Nsengiyumva Remy bakunze kwita Djuma, ashinjwa gukoresha ubwenegihugu bwinshi. Uyu ngo avuga ko ari Umuhunde ariko ngo nta rurimi kavukire azi, avuga Igiswahili gike, ariko azi Ikinyarwanda cyane.

Avuga ko yavukiye i Goma ariko inyandiko y’umwirondoro we (CV) yerekana ko yavukiye muri Uvira, akaba yari afite ikarita y’impunzi y’u Burundi yahungiye muri Uganda.

Undi ni Col Mugisha Ruyumbu Santos ashinjwa no gutesha agaciro amapeti y’igisirikare cya FARDC.

Imyirondoro y’abo bagabo yatangajwe kuri Television y’Igihugu, ku wa Kabiri taliki ya 27 Ukuboza, bashinjwa ubutasi aho binjiriye inzego zitandukanye zirimo abofisiye bo mu gisirikare cya FARDC, abakomeye muri politiki, abakire bafite ibikorwa bikomeye by’ubukungu ndetse n’abo muri sosiyete sivile.

Congo ivuga ko hakomeje iperereza ryimbitse ku mikorere y’umuryango AHDO wamaze kugaba amashami mu Ntara ya Kwango, Kwilu, Kasaï, Kivu ya Ruguru na Kivu y’Epfo ku buryo hari abandi Banye-Congo bashobora gutabwa muri yombi bashinjwa kuba intasi z’u Rwanda.

Guverinoma ya Congo ikomeza ivuga ko abafashwe bari mu mugambi wo kwinjirira imbibi z’ikibuga mpuzamahanga cy’indege cya N’djili no mu birindiro bya gisirikare bya Kibomangu, ngo babashe guhitana Perezida Tshisekedi nk’uko byagenze kuri Habyarimana n’abo bari kumwe.

Abasesenguzi bagaragaza ko aba bagabo batawe muri yombi kuko ari Abatutsi, bibaka biri mu mugambi wagutse wa Guverinoma ya Congo wo kwica buri wese uvuga Ikinyarwanda by’umwihariko Abatutsi.

Leta ya Congo kandi yashyize imbere imvugo y’uko inzego za leta zirimo abanzi ‘zinjiriwe’, bashaka gusobanura ko abanye-Congo bavuga Ikinyarwanda bari muri izo nzego ari intasi, muri make ari ikibazo.

Ni imvugo zikoreshwa n’abayobozi bakuru b’igihugu, abayoboye amashyaka, abihayimana, sosiyete sivile, ku mbuga nkoranyambaga n’ahandi, bikaba bikongeza urwango, ubwicanyi n’ihohoterwa rikorerwa abanye-Congo bavuga Ikinyarwanda.

Ibi kandi ntibitandukana n’imvugo z’abayobozi ba Congo zishinja u Rwanda gufasha M23 no kuba nyirabayazana w’ibibazo byose iki gihugu gifite.

Umusesenguzi ku bibera muri RDC, Gatabazi Tite, asanga gufata abanye-Congo bavuga Ikinyarwanda bakitwa intasi z’u Rwanda, ari iturufu abayobozi ba Congo bakoresheje ngo babashe kwerekana ko binjiriwe kandi ibibazo bafite ari u Rwanda rubitera. Ibyakozwe akabihuza no gushaka ibimenyetso.

Ati “Gufata abana b’igihugu bakabita abanyamahanga n’abanzi b’igihugu, ni ikintu gikomeye cyane. Ni abanye-Congo ariko bahinduwe abanzi b’igihugu, intasi, abanyamahanga”.

Akomeza avuga ko ari ‘ugukomeza umugambi wo gushyira ku Rwanda ibibazo bya Congo, bahimba icyaba ikimenyetso cyabafasha kubyumvikanisha’. Leta ya Congo kandi irimo kongera ikibatsi mu guhohotera abanye-Congo b’abatutsi, ku buryo aho bamubonye hose bamwita ufasha M23 uturutse mu Rwanda.

Kuvuga ko hari umugambi wo kwica Perezida Tshisekedi, hari abasanga bigamije kugaragaza ko hari abanzi benshi bamuhiga hagamijwe kwigarurira imitima y’Abanye-Congo muri ibi bihe bitegura amatora ya Perezida azaba mu mwaka utaha.

Ku rundi ruhande, Umusesenguzi Gatabazi asanga ‘ari ugushaka igisobanuro cyo gukomeza intambara, gucecekesha abatavuga rumwe n’ubutegetsi no gutegura impamvu z’urwitwazo rwo gusubika amatora’.

Si ubwa mbere Perezida Tshisekedi yikanze baringa. Muri Gicurasi 2021 Gen Delphin Kahimbi yapfuye mu buryo buteye urujijo. Icyo gihe havuzwe ko yateguraga umugambi wo kwica Perezida Tshisekedi arabizira. Hari kandi n’ibyatangajwe ko hari abashatse kumuroga.

Abafashwe ni inzirakarengane zirimo kuzira politiki mbi ya Congo, amahanga yari akwiye kubihagurukira ntibirangirire ku itangazo ry’Umuryango w’Abibumbye riburira ko hatagize igikorwa muri Congo haba Jenoside.

Abayobozi ba Congo bari kwigana Habyarimana

Abasesengura ibya politiki n’amateka berekana ko ibirimo gukorwa na Guverinoma ya Congo bisa neza n’ibyakozwe na Habyarimana Juvenal ategura Jenoside yakorewe Abatutsi mu 1994.

Icya mbere ni imvugo ijyana kuri Jenoside aho bafata umuturage w’igihugu bakamwita umwanzi wacyo kugira ngo byorohereze uzaza kumwica kumva ko abikora arwanira igihugu kandi ko ntacyo azaba. Iyi nibyo Habyarimana yakoze avuga ko abatutsi ari abanzi b’igihugu.

Kuwa 4 Ukwakira 1990, abasirikare ba Habyarimana bazindutse barasa muri Kigali byitirirwa Inkotanyi ngo nizo zabikoze zibifashijwemo n’ibyitso byazo. Abatutsi barafashwe barafungwa kandi hari n’abari bumvise Inkotanyi bwa mbere mu matwi yabo.

Ubwo Ingabo zari iza RPA zatangizaga urugamba rwo kubohora u Rwanda, Habyarimana yakunze kumvikana avuga ko yatewe na Uganda mu gushaka kwihunza ikibazo cy’impunzi zishaka uburenganzira bwaza no kwemera ko ari abanyarwanda barambiwe ubuhunzi.

Muri Mutarama 1991, Guverinoma y’u Rwanda yari iyobowe na Perezida Juvenal Habyarimana, yashyize hanze igitabo yise ‘Livre blanc sur l’agression armée dont le Rwanda a été victime à partir du 1er octobre 1990’. Ubishyize mu Kinyarwanda cyumvikana, ni ‘Igitabo cyera kivuga ku bushotoranyi bukoresheje intwaro bwibasiye u Rwanda guhera kuya 1 Ukwakira 1990.’

Icyo gihe u Rwanda rwari rumaze amezi atatu rugabweho ibitero n’ingabo za FPR Inkotanyi zari zigizwe ahanini n’abahungiye mu mahanga, bari barimwe uburenganzira ku gihugu cyabo bazizwa ko ari Abatutsi.

Guverinoma ya Habyarimana icyo gihe ntiyemeraga ko yatewe n’Abanyarwanda. Yavugaga ko yatewe n’ingabo za Uganda bityo ko amahanga akwiriye gufatira ibihano icyo gihugu intambara ikarangira.

Nyuma y’imyaka 31 ku wa 9 Ukuboza 2022, Guverinoma ya Repubulika Iharanira Demokarasi ya Congo (RDC) mu buryo nk’ubwa Leta ya Habyarimana, yashyize hanze ikindi ‘gitabo cyera’ yise “Livre Blanc sur l’agression avérée de la RDC par le Rwanda et les crimes internationaux commis dans ce contexte par les Forces Rwandaises de défense ( RDF) et le M23".

Ni igitabo RDC ivuga ko kigamije kumenyesha amahanga ibyaha mpuzamahanga bimaze igihe bikorwa n’umutwe wa M23 ufashijwe n’ingabo z’u Rwanda.

Ubutegetsi bwa Habyarimana n’ubwa Tshisekedi buhuriye ku muco wo kudahana. Abatutsi baricwa, bagahohoterwa ku manywa y’ihangu ndetse n’imvugo z’urwango zigakwirakwizwa ariko ntihagire ubihanirwa. Ibi ni ko byagenze ubwo Habyarimana yageragezaga Jenoside mu bice bitandukanye nko mu Bigogwe, Bugesera n’ahandi ababikoze bakagororerwa aho guhanwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .