Abasirikare ba FARDC bijanditse mu bwicanyi n’ubwambuzi baburiwe

00:00:00 IGIHE NETWORK

KINYARWANDA

ENGLISH

FRANCAIS

Abasirikare ba FARDC bijanditse mu bwicanyi n’ubwambuzi baburiwe

Yanditswe na IGIHE

Kuya 1 Mutarama 2023 saa 04:57

Yasuwe :

Yavuzweho:

Umuyobozi w’ibikorwa bya gisirikare bigamije kurwanya imitwe yitwaje intwaro, Sokola2 , Général-Major Ramazani Fundi, yihanangirije abasirikare bo mu ngabo z’igihugu bajujubya abaturage bakabateza umutekano muke bagamije kubatwara ibyabo muri ibi bihe by’iminsi mikuru.

Ni ubutumwa yatanze kuri uyu wa Gatandatu tariki 31 Ukuboza 2022 muri Uvira muri Kivu y’Amajyepfo, nk’uko Radio Okapi yabitangaje.

Yagize ati "Umusirikare wese uzafatirwa mu cyuho ari mu bikorwa bigayitse azabiryozwa imbere y’ubutabera bwa gisirikare."

Uko kwihanangiriza kuje gukurikira ibikorwa bihungabanya umutekano byabaye mu cyumweru kimwe bigizwemo uruhare n’abo mu gisirikare cya Congo bafite imyitwarire mibi.

Ku wa 30 Ukuboza, abagenzi baguye mu mutego w’abo bikekwa ko ari ingabo za FARDC bamburwa ibintu by’agaciro bari bafite mu gace ka Munywema.

Kuri uwo munsi kandi, umusivile umwe w’umuforomo yishwe n’ibikomere kubera urugomo yakorewe n’umusirikare wa FARDC ahitwa Kokombe mu mUjyi wa Uvira.

Undi musirikare yarashe ku bantu benshi mu ijoro ryo ku wa Kane ashaka kwigarurira ibintu by’agaciro by’abaturage, ahitwa Kabindula.

Muri zone ya Kiliba nanone, umusivile umwe yishwe n’umusirikare wa FARDC ku wa Kabiri w’iki cyumweru.