00:00:00 IGIHE NETWORK KN KINYARWANDA EN ENGLISH FR FRANCAIS

Abanye-Congo basabwe korohera Ingabo za Monusco

Yanditswe na IGIHE
Kuya 27 Ukuboza 2022 saa 04:34
Yasuwe :

Sosiyete Sivile muri Repubulika Iharanira Demokarasi ya Congo yasabye abaturage bo muri iki gihugu by’umwihariko abo mu burasirazuba korohera Ingabo za Monusco kugira ngo zibashe gukora neza akazi ko kugarura amahoro kazijyanye muri iki gihugu.

Amakuru dukesha Ijwi ry’Amerika avuga ko ibi byagarutsweho mu biganiro by’iminsi ibiri byatangiye kuri uyu wa mbere muri teritwari ya Nyiragongo.

Ibi biganiro bigamije kurebera hamwe akamaro k’izi Ngabo z’Umuryango w’Abibumbye bigendanye n’inshingano zifite zo kugarura amahoro mu burasirazuba bwa RDC. Byitabiriwe n’abayobozi ba za sosiyete sivile mu duce twose , abaturage basanzwe, n’abahagaririye amoko atandukanye.

Ni ibiganiro bibaye mu gihe Abanye-Congo bamaze iminsi bigaragambya bamagana izi ngabo bashinja ko ntacyo zakoze kuva zabagerera mu gihugu.

Iyi myigaragambyo yibasiye cyane cyane Ingabo za Monusco ziri mu Mujyi wa Goma yaranzwe no gutwika aho zikorera ndetse no gusahura bimwe mu bikoresho byazo.

Abaturage ba Congo bakunze kugaragaza ko batishimiye izi ngabo kuko kuva zahagera mu 1999, nta kidasanzwe zakoze mu kugarura amahoro mu Burasirazuba bw’igihugu, ahubwo imitwe yitwaje intwaro yakomeje kwiyongera ari nako igira uruhare mu byaha by’ubugizi bwa nabi.

Umuyobozi wa sosiyete sivile muri teritware ya Rutshuru, Jean Claude Bambanze yavuze ko ubusabe bw’abaturage bwo kwirukana Ingabo za Monusco muri Congo, atabubona nk’umuti.

Ati “Nibyo uyu munsi Congo ifite ibibazo byinshi cyane cyane ibijyanye n’umutekano mu Burasirazuba ariko se umuti uri mu gusaba ko ingabo za Monusco zirukanwa, iki cyemezo cyaba cyihuse.”

Nubwo Abanye-Congo bashinja Monusco gukora ubusa, Umuryango w’Abibumbye uherutse kongerera manda y’umwaka izi ngabo.

Tariki 20 Ukuboza nibwo umwaka umwe wari wongerewe Monusco warangiye. Hari hategerejwe kumenya igikurikiraho niba ubwo butumwa bumaze imyaka 22 busozwa burundu cyangwa bukomeza.

Abanye-Congo basabwe korohera Ingabo za Monusco kugira ngo zibashe gukora akazi kazo neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .