Abanyafurika miliyoni 13 bazajya mu bukene bukabije kubera Coronavirus

Yanditswe na Ndahayo Emmanuel
Kuya 15 Kanama 2020 saa 05:12
Yasuwe :
0 0

Raporo ya Banki y’Isi ku ngaruka icyorezo cya Coronavirus kizagira ku mugabane wa Afrika, yagaragaje ko Abanyafurika miliyoni 13 bazajya mu bukene bukabije ku buryo bashobora no kugera kuri miliyoni 50 igihe ibintu byagenda nabi kurushaho.

Ni inkuru y’incamugongo ku mugabane wari witezweho kuzamura ubukungu bwawo ku kigero cya 6%. Umusaruro mbumbe w’uyu mugabane uzagabanuka ku kigero cya 3-5%, ibizatuma umubare w’Abanyafurika batunzwe n’amafaranga ari munsi ya $1.9 (1.834 Frw) uzamukaho 2%, ukagera kuri 43.6% mu mpera za 2020 uvuye kuri 41.6% mu mpera za 2018.

Ibi bivuze ko imbaraga Afurika yari yarakoresheje igabanya ubukene bukava kuri 46.6% muri 2010 bukagera kuri 41.6% muri 2018, zizahinduka ubusa.

Raporo ivuga ko ibi byatewe n’ingamba zikakaye zafashwe na Guverinoma za Afurika. Iti “ingufu zashowe mu gukumira indwara ya Coronavirus, n’ubwo zari zikenewe, zagize ingaruka z’ubukungu ziremereye”.

Na mbere ya Coronavirus, Afurika yari isanganywe ibibazo byo kutinjiza imisoro n’amadevize ayihagije, ibyatumye uyu mugabane ufata amadeni menshi mu myaka icumi ishize. Iki kibazo kitezweho kwiyongera kuko noneho n’iyo misoro izagabanuka cyane, ndetse n’amadevize aturuka ku mutungo kamere n’ubukerarugendo ntateze kuzamuka vuba aha.

Raporo y’Umuryango w’Abibumbye ku murimo muri Afurika, igaragaza ko 70% by’abanyafurika bakora mu mirimo itagira amasezerano, aho bahembwa kuko bakoze.

Abenshi kandi bari mu mirimo y’ubucuruzi buciriritse n’indi itabasha gukorerwa mu rugo, mu gihe amabwiriza yashyizweho na Guverinoma zitandukanye muri Afurika agamije kurwanya icyorezo cya Coronavirus, yasabaga ihagarikwa ry’imirimo idashobora gukorerwa mu rugo.

Ibi byatumye igice kinini cy’Abanyafurika kibura akazi, ari na ko bakomoragaho inyungu. Raporo ya Banki y’Isi ivuga ko nko muri Ethiopia, inyungu zagabanutse ku miryango 45% ituye mu mijyi na 55% ituye mu cyaro.

Muri Nigeria, igihugu cya mbere gituwe cyane kuri uyu mugabane, 79% by’ababajijwe basubije ko inyungu yabo yagabanutse, naho 42% bavuga ko batakaje imirimo yabo burundu.

Muri Kenya, abarenga miliyoni bahagaritswe ku mirimo kubera ingaruka za Coronavirus, mu gihe ikigo cy’igihugu cy’ibarurishamibare muri Kenya (KNBS) kivuga ko batatu muri batanu bahoze bakora batari bagasubiye ku mirimo yabo muri Gicurasi.

KNBS kandi igaragaza ko umwe mu banya-kenya batatu adafite amafaranga ahagije.

Banki y’Isi ivuga ko abarenga 80% by’abatuye mu mijyi batakibasha kohereza amafaranga mu byaro nk’uko byahoze, bigaragaza ko ubukene bwarushijeho kunuma.

Muri rusange, kugabanuka ku nyungu ya benshi mu Banyafurika bivuze ko hari n’ibindi bizagirwaho ingaruka, birimo uburezi, aho “miliyoni z’abana bavuye mu ishuri. Ntibizwi neza igihe amashuri azasubukurirwa kandi abanyeshuri benshi bashobora kudasubira mu ishuri burundu, naho amashuri yasubukurwa”.

Byitezwe ko kandi urwego rw’ubuzima na rwo ruzahungabana, aho umubare munini w’ababyeyi benshi n’abana bashobora kuzicwa n’indwara ndetse n’ibyorezo ubusanzwe byari byararwanyijwe.

Byari biteganyijwe ko umubare w’abanyafurika batunzwe n’amafaranga ari munsi ya $1.9 (1.834 Frw) ku munsi wari buzagere munsi ya 40% by’abatuye uyu mugabane muri 2021.

Ubukungu bwa Afurika buzasubira inyuma cyane kubera Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .