Byatagajwe ubwo ubuyobozi bwa Komisiyo bwagaragazaga ko igihe cyo gutanga kandidatire cyarangiye nk’uko byari biteganyijwe ku wa 6 Kanama 2024.

Abatanze kandidatire ku mwanya w’Umukuru wa Komisiyo ya AU, barimo Mahmoud Ali Youssouf wo muri Djibouti, Raila Aomolo Odinga wo muri Kenya, Richard J Randriamandrato, wo muri Madagascar na Anil Kumarsing Gayan watanzwe n’Ibirwa bya Maurice.

Aba barazatorwamo ugomba gusimbura Moussa Faki Mahamat wahoze ari Minisitiri w’Ububanyi n’amahanga wa Chad watorewe kuyobora AU muri Mutarama 2017, mu matora ku cyiciro cya nyuma yari ahatanyemo na Amina Mohamed wari Minisitiri w’Ububanyi n’amahanga wa Kenya.

Nubwo nta Munyarwanda uri mu batanze kandidatire ubwo Perezida Paul Kagame yagiranaga ikiganiro n’umunyamakuru wa NTV Kenya, yemeje ko ashyigikiye kandidatire ya Odinga, abishingiye ku kuba mu gihe uyu Munyakenya yari Intumwa Nkuru ya AU ishinzwe Ibikorwaremezo, yarakoze akazi neza.

Ati “Raila Odinga ndamuzi, nzi urugamba yanyuzemo. Mu 2018 ubwo nari Umuyobozi Mukuru wa AU, yari Intumwa Nkuru ishinzwe Ibikorwaremezo. Yakoze akazi neza, kandi yarakumvaga. Bityo, tuzamushyigikira kandi tumwifuriza ibyiza. Tuzamushyigikira no mu gihe azaba yaragezeyo kugira ngo Afurika izagere ku ntego.”

Amatora ateganyijwe muri Gashyantare 2025. Biteganyijwe ko muri ayo matora kandi hazatorwa Umuyobozi Wungirije wa Komisiyo, Komiseri ushinzwe Ubuhinzi, Iterambere ry’Icyaro n’Iterambere rirambye na Komiseri ushinzwe Ubukungu, Ubucuruzi, Ubukerarugendo, Inganda n’Umutungo kamere.

Hazatorwa kandi Komiseri ushinzwe Uburezi, Siyanse, Ikoranabuhanga no guhanga udushya, Komiseri ushinzwe Ibikorwa remezo n’Ingufu, Komiseri ushinzwe Ububanyi n’Amahanga, Amahoro n’Umutekano na Komiseri ushinzwe Ubuzima, Ibikorwa by’ubutabazi n’Iterambere ry’Imibereho myiza.

Raila Aomolo Odinga wo muri Kenya ari kwiyamamariza kuyobora AU

Mahmoud Ali Youssouf wo muri Djibouti ari kwiyamamaza

Anil Kumarsing Gayan watanzwe n’Ibirwa bya Maurice arifuza kuyobora AU

Richard J Randriamandrato, wo muri Madagascar arashaka kuyobora AU