00:00:00 IGIHE NETWORK KN KINYARWANDA EN ENGLISH FR FRANCAIS

Abadepite barashaka ko M23 yitwa umutwe w’iterabwoba, Ruto yasabye imbabazi: Avugwa mu karere

Yanditswe na IGIHE
Kuya 27 May 2022 saa 10:24
Yasuwe :

Abadepite bahagarariye Intara ya Kivu y’Amajyaruguru basabye ko M23 ikomeje imirwano n’igisirikare cya leta (FARDC) yitwa umutwe w’iterabwoba nk’uko bimeze kuri ADF.

Aba badepite bamaganye imirwano y’ingabo za Leta (FARDC) n’abarwanyi ba M23, bavuga ko ari ukuvogera ubusugire bw’igihugu kandi ibangamiye amahoro n’umutekano mu karere.

Kuwa 24 Gicurasi 2022 nibwo aba badepite bavuze ko "bitewe n’ubukana bw’imirwano, turasaba guverinoma ya RDC ko mu buryo bwihutirwa isaba akanama ka Loni gashinzwe umutekano, akanama k’amahoro n’umutekano mu muryango wa Afurika Uunze Ubumwe (AU) n’izindi nzego z’akarere gushaka igisubizo no kwemeza ko M23 ari umutwe w’iterabwoba nka ADF".

Bakomeje bavuga ko bashyigikiye ingabo za FARDC kandi basaba buri muturage wese wa RDC kuzishyigikira kugira ngo zitsinde umwanzi w’igihugu.

Kuva muri Werurwe uyu mwaka, umutwe wa M23 watangije imirwano n’igisirikare cya leta gusa iza guhosha gato ariko yongeye kuburwa mu mpera z’icyumweru gishize.

RDC: M23 yafashe ibirindiro bya gisirikare bya Rumangabo

Abarwanyi ba M23 bafashe ibirindiro bya gisirikare bya Rumangabo muri Kivu y’Amajyaruguru. Ni ibirindiro bikomeye cyane mu mayeri ya gisirikare, biherereye mu burasirazuba bwa pariki ya Virunga hafi y’umuhanda uhuza Rutshuru na Goma.

Amateka y’ibi birindiro arakomeye cyane kuri M23 kuko byabaye icyicaro cy’uyu mutwe mu bitero bya 2012 na 2013. Kuri uyu wa Kane nibwo M23 yongeye gufata ibi birindiro.

Umwe mu barwanyi ba M23 yavuze ko bafashe intwaro nyinshi mbere yo kuva aho hantu. Kuva ku cyumweru tariki 22 Gicurasi Ingabo za Loni zibungabunga amahoro muri RDC, Monusco, zashinje M23 kugaba ibitero kuri izi ngabo, gusa aba barwanyi babyamaganiye kure.

Sudan y’Epfo yongerewe umwaka w’ibihano byo kutagura intwaro

Akanama k’umutekano k’umuryango w’abibumbye kuri uyu wa Kane kongereye igihe cy’ibihano byafatiwe SudanI y’Epfo byo kutagura intwaro nyuma y’umwuka mubi ukomeje gututumba mu gihugu.

Uyu mwanzuro uvuga ko ibi bihano bizageza muuri Gicurasi 2023, watowe n’ibihugu 10 muri 15, Gabon, Kenya, u Buhinde, u Burusiya n’u Bushinwa byifashe. Ibihano byashyizweho mu 2018 nyuma y’amasezerano y’amahoro yasinywe nyuma y’imyaka itanu yo guhangana hagati ya Perezida Salva Kiir na Visi Perezida Riek Machar. Gusa aya masezerano ntiyubahirijwe.

Ubwo umwaka ushize ibi bihano byongerwaga, abayobozi muri Sudani y’Epfo bahawe ibyo bagomba kubahiriza yaba muri politiki no mu mutekano kugira ngo bikurweho cyangwa byoroshywe.

Gusa mu ntangiriro z’uku kwezi, inzobere za Loni zasabye ko ibihano bigumaho kuko hakiri ibibazo by’umutekano muke kandi leta yishe ibiteganywa n’ibihano ikomeza gutumiza mu mahanga imodoka z’intambara.

Umunyamabanga Mukuru wa Loni, Antonio Guterres, yavuze ko Sudan y’Epfo ikeneye gutera intambwe mu kwambura abarwanyi intwaro, kubasubiza mu buzima busanzwe cyangwa mu gisirikare.

Bivugwa ko muri uyu mwanzuro harimo ingingo yorohereza Sudan y’Epfo kuba yatumiza intwaro zoroheje mu gihe izikeneye bigendanye n’amasezerano ya 2018. Iyi ngingo yashyizwemo ku busabe bwa Kenya, Gabon na Ghana.

Tanzania yakoze impinduka muri pansiyo z’abakozi

Tanzania yavuguruye itegeko rijyanye n’ibyo umukozi witeganyirije agenerwa, aho ubu azajya ahabwa 33% by’ayo yiteganyirije yose mu gihe agiye mu kiruhuko cy’izabukuru, hanyuma andi 67% akazajya ayahabwa nka pansiyo y’ukwezi.

Ibi ni ibyatangajwe na Prof Joyce Ndalichako, akaba ari Umunyamabanga wa Leta ushizwe abakozi, urubyiruko, umurimo n’abafite ubumuga mu biro bya Minisitiri w’Intebe.

Itegeko rishya rizatangira kubahirizwa kuwa 1 Nyakanga uyu mwaka ryasohotse mu igazeti ya leta mu cyumweru gishize. Icyakora abakora mu bucukuzi bw’amabuye y’agaciro, ubwubatsi, inganda, ubuhinzi n’izindi nzego zihariye bazajya bahabwa imperekeza yihariye bigendanye n’ako kazi kabo.

Mu 2018 nibwo Perezida John Pombe Magufuli yategetse ko ikigo cy’ubwiteganyirize gihindura uburyo cyishyuraga pansiyo. Icyo gihe hishyurwaga 50% by’ayo umuntu yiteganyirije yose.

William Ruto yasabye imbabazi Perezida Kenyatta

Visi Perezida wa Kenya, William Ruto, yasabye imbabazi mu ruhame Perezida Uhuru Kenyatta, kubera umwuka utari mwiza wari umaze iminsi hagati y’aba bagabo.

Mu isengesho ry’igihugu ryabereye i Nairobi kuri uyu wa Kane, Ruto yemeye ko atabashije kumvikana na Perezida Kenyatta, ibi bikaba byaragize ingaruka ku byo bemereye abaturage bagombaga gukora.

Ati "Nka Visi Perezida, nshobora kuba naratengushye Perezida wanjye, inshuti yanjye nziza, ngusabye imbabazi. Nshobora kandi kuba narababaje abantu benshi bari no muri iri sengesho, nsabye imbabazi buri wese, nshaka ko twinjira muri aya matora ducyeye ku mutima ntawe ubabaye".

Ku rundi ruhande, Perezida Uhuru yavuze ko yifuza kujya mu kiruhuko mu mahoro ubwo manda ye izaba irangiye muri Kanama. Yavuze ko yizera ko amasengesho ya Ruto ari ukuri kuko yifuza amahoro n’ibyishimo mu myaka iri imbere.

William Ruto yemera ko atafatanyije na Uhuru Kenyatta uko byari bikwiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .