00:00:00 IGIHE NETWORK KN KINYARWANDA EN ENGLISH FR FRANCAIS

Kuzamura imishahara y’abofisiye muri Uganda byanenzwe, Facebook yasibye ubutumwa bw’urwango muri Kenya: Avugwa mu Karere

Yanditswe na IGIHE
Kuya 21 July 2022 saa 04:51
Yasuwe :

Inteko Ishinga Amategeko ya Uganda yagaragaje ko gahunda iherutse kwemezwa yo kuzamura imishahara y’abasirikare bakuru mu ngabo za Uganda ‘yimakaza ivangura’ kandi ko ishobora guhungabanya ubumwe bw’ingabo n’umutekano w’igihugu.

Mu cyumweru gishize ni bwo The Daily Monitor yasohoye inkuru isobanura iby’umushinga wo kuzamura imishahara y’abofisiye bakuru mu ngabo za Uganda aho bamwe bagomba guhabwa inyongera ya 100% mu gihe abandi bazongererwaho kimwe cya kabiri cy’uwo bari basanganywe.

Abafite amapeti kuva kuri Capitaine kugeza kuri Private ntibarebwa n’izi mpinduka mu mishahara.

Umuvugizi w’Igisirikare cya Uganda, Brig Felix Kulayigye yashyize hanze itangazo ryemeza izo mpinduka nk’uko Daily Monitor ikomeza ibivuga.

Mu Nteko Rusange y’abagize Inteko Ishinga Amategeko yo kuri uyu wa Gatatu, Umudepite uhagarariye Amajyaruguru, Patrick Oshabe yagaragaje ko ibyo bishobora kugira ingaruka no guteza ibibazo mu basirikare bato.

Yabishingiye ku kuba abarimu bigisha siyansi baherutse kuzamurirwa imishahara bigatuma bagenzi babo bigisha iby’ubugeni bahita bajya mu myigaragambyo yamaze hafi ibyumweru bitatu.

Ati “Sindwanya izamurwa ry’imishahara ariko icyo ntumva neza ni izamurwa ku 100% ku bofisiye bakuru. Mu bihe by’ubukungu turimo muri iki gihe dufite abasirikare bato bakorera iki gihugu neza; nibabona batarigeze bazirikanwa mu izamurwa ry’imishahara…bizadushyira mu bihe bibi.”

Yakomeje agira ati “Niba haratekerejwe izamurwa ry’imishahara, abasirikare bato na bo ntibagombaga kwirengagizwa. Guverinoma igomba gusobanura uko iby’abasirikare bato bizagenda. Bazabaho bate muri iki gihe ubukungu bumeze nabi?”

Umudepite uhagarariye Busia, Geoffrey Macho na we yavuze ko atishimiye ko imibereho y’abari mu zindi nzego z’umutekano yirengagijwe.

Ati “Ku bijyanye n’izamurwa ry’imishahara haravugwa ingabo z’igihugu gusa. Ni mpamvu ki izindi nzego zirimo polisi n’abacungagereza zo zitavugwa?”

Minisitri w’Ingabo, Jacob Oboth-Oboth, yavuze ko abandi basirikare batarebwa n’iyi gahunda basabwa gutegereza.

Abantu 400 bakekwaho ubugizi bwa nabi batawe muri yombi

Inzego z’umutekano zataye muri yombi abantu 400 zinafata imbunda 186 n’amasasu akiri mazima agera kuri 650 mu bikorwa by’umukwabu bigamije guca intege ubwicanyi n’ubugizi bwa nabi mu Majyaruguru y’Uburasirazuba bwa Uganda.

Ibi bikorwa biri kubera muri Sous-Région ya Karamoja no mu turere twa Kabelybyong na Katakwi muri Sous-Région ya Teson bigamije gushakisha abatunze imbunda, abiba inka bitwaje imiheto n’imyambi, abafatanya na bo mu kubaha amakuru n’abandi.

Abantu bagera kuri 232 bakekwaho ibyaha birimo gutunga intwaro binyuranyije n’amategeko bagejejewe imbere y’ubutabera icyakora ngo benshi bagizwe abere basubizwa mu miryango yabo.

Ishyaka ritavuga rumwe n’ubutegetsi ryasinyanye amasezerano na Museveni

Perezida wa Uganda, Yoweri Kaguta Museveni yasinyanye amasezerano y’imikoranire n’Umuyobozi w’Ishyaka ritavuga rumwe n’ubutegetsi bwe, Nobert Mao.

Amasezerano hagati y’ishyaka riri ku butegetsi (National Resistance Movement) na ‘Demcratic Party’ yashyizweho umukono kuri uyu wa Gatatu nyuma y’ibiganiro byahuje abayobozi bombi mu Ngoro ya Perezidansi iherereye i Entebbe.

Perezida Museveni yashimye umuyobozi wa Democratic Party werekanye ’ikimenyetso cy’ubukure, kureba kure no kugira politiki zubaka’.

Mao ni umuyobozi w’ishyaka ritavuga rumwe n’ubutegetsi bwa Uganda kuva mu 2010 nubwo ryahuye n’ibibazo birimo gucikamo kabiri kw’abayoboke baryo mu myaka myinshi ishize. Ubwo amatora ya 2021 yari yegereje, yatakaje benshi mu bari mu buyobozi bw’ishyaka bagiye mu rishya rya ‘National Unity Platform.’

Abanenga aya masezerano Museveni yagiranye na Mao bavuze ko ari intambwe yateye yo kugerageza gucecekesha abatavuga rumwe n’ubutegetsi bwe nk’uko mbere yabigezeho ubwo yageneraga imyanya mu nzego za leta, abanyepolitiki batavuga rumwe na we. Ni mu gihe abakiri muri opozisiyo badahabwa urubuga rwa politiki rwo gukoreramo.

Facebook yahanaguye ubutumwa bubiba urwango burebana n’amatora muri Kenya

Sosiyete y’itumanaho, Meta (Facebook), yahanaguye ubutumwa bubarirwa mu bihumbi bwibasira Abanyakenya kubera kutubahiriza amabwiriza agenga imikoreshereze y’uru rubuga nkoranyambaga muri Kenya mu gihe iki gihugu cyitegura kwinjira mu matora muri Kanama uyu mwaka.

Ikigo cy’ubujyanama cyo mu Bwongereza (Cambridge Analytica) kuri ubu kitakiriho, cyashinjwe kwinjira mu mabanga y’Abanyakenya kuri Facebook hagamijwe gufasha Perezida Uhuru Kenyatta gutsinda amatora mu 2017.

Facebook yavuze ko yahanaguye ubutumwa ibihumbi 37 bwenyegeza amagambo y’urwango n’ubundi ibihumbi 42 butubahiirije amabwiriza yo gukumira ukwibasirwa kw’abantu muri Kenya mu mezi atandatu yarangiye ku wa 30 Mata.

Iyi sosiyete kandi yavuze ko yakuyeho ubutumwa bwamamaza bufite aho buhuriye na politiki butubahirije amabwiriza yo gukorera mu mucyo.

Facebook ivuga ko iri gukorana n’abantu bigenga muri Kenya bagenzura amakuru atari ukuri muri iki gihe igihugu cyitegura kwinjira mu matora nk’uko inkuru ya BBC ibivuga.

Umuyobozi wa Facebook mu Burasirazuba no mu Karere k’Ihembe rya Afurika, Mercy Ndegwa, yavuze ko batangiye igenzura kuri uru rubuga rizajya rituma byoroha gutahura no gusiba ubutumwa bushobora guteza imvururu zishingiye ku matora.

Tchad yashyizeho amabwiriza abuza abakobwa bakiri bato kujya mu mahanga

Leta ya Tchad yashyizeho amabwiriza agamije kubuza abakobwa bakiri bato kuva mu gihugu badahawe uburenganzira n’ababyeyi babo, yamaganwe n’abaharanira uburenganzira bw’abagore mu gihugu.

Minisitiri w’Umutekano, Gen. Idriss Dokony Adiker, yasobanuye ko impamvu y’aya mabwiriza ari uko hari abakobwa benshi barimo bava mu gihugu bakajyanwa mu mahanga gucuruzwa.

Sosiyete z’indege n’ibigo bitwara abantu n’ibintu babujijwe kwakira abakobwa bashaka gufata ingendo zo mu mahanga icyakora ntihasobanuwe ikigero cy’imyaka y’abagomba kubanza gusaba uruhushya ry’ababyeyi kugira ngo bemererwe kurenga imbibi z’igihugu.

Umuryango urengera uburenganzira bw’abagore, Ligue Tchadienne pour les Droits de la Femme, watangaje ko aya amabwiriza yo kubuza abakobwa gusohoka igihugu anyuranyije n’ubwigenge bw’abakobwa bakiri bato hamwe n’uburenganzira bwa muntu muri rusange.

Uyu muryango uvuga ko aya mabwiriza yimakaza ivangura rishingiye ku gitsina.

Raporo y’umuryango mpuzamahanga urwanya ibyaha ndengamipaka ivuga ko icuruzwa ry’abantu muri Tchad ryiyongereye cyane muri iyi myaka ya vuba ndetse ko Abanye-Tchad bicuruza mu bihugu bihana imbibi nayo biyongereye mu 2021.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .