Abacanshuro b’Abagande barwanira muri Afghanistan babuze uko bataha nyuma yo kwandura Coronavirus

Yanditswe na IGIHE
Kuya 30 Kanama 2020 saa 08:13
Yasuwe :
0 0

Abarwanyi b’abacanshuro bakomoka muri Uganda bakoreraga mu gihugu cya Afghanistan bari mu kaga nyuma yo kwandura Coronavirus, nyamara ubufasha bubacyura bukabura.

Ni abarwanyi babarirwa muri 300 bakorera ikigo cy’umutekano cya Triple Canopy kirinda umutekano ku muryango w’ibyicaro by’ingabo za Amerika bikorera muri Afghanistan.

Umwe mu bahoze ari abacanshuro bakorera mu gihugu cya Iraq yavuze ko icyorezo cya Coronavirus kizarushaho kuzambya ibibazo b’aba bacanshuro bakorera mu Karere k’u Burasirazuba bwo Hagati, n’ubundi bari basanganywe ibindi bibazo birimo ihungabana ry’imitekerereze n’iry’umubiri.

Amakuru avuga ko Uganda ari kimwe mu bihugu byohereza abacanshuro benshi kurwana hanze yayo.

Ni mu gihe kandi abayobozi bakuru mu nzego zirimo iza gisirikari muri Uganda bakomeje gushinjwa kugira uruhare muri ibi bikorwa byo kohereza abacanshuro kurwana hanze y’igihugu. Aba bacanshuro ngo bagira uruhare runini mu bikorwa by’intambara n’umutekano muke bivugwa mu Karere k’ibiyaga bigari ndetse n’igice cy’ihembe rya Afurika.

Umwe mu baganiriye na Virunga Post yavuze ko abacanshuro ba Uganda bakomeje kwiyongera mu bice birimo intambara, asobanura agira ati “imwe mu mpamvu zibitera ni ruswa yakomeje kuvugwa cyane ku bayobozi bo mu nzego zo hejuru mu gihugu cya Uganda”.

Amakuru avuga ko bamwe muri abo bayobozi nka Gen. Salim Saleh, murumuna wa Perezida Museveni, bafite ibigo bikora ubucuruzi bwo kohereza abacanshuro kurwana hanze. Kimwe muri ibyo bigo byavuzwe harimo ‘Saracen Security’ cya Salim Saleh.

Ibi bigo byarwanyijwe cyane n’Umuryango w’Abibumbye (UN), aho muri raporo yo mu mwaka wa 2002, byanenzwe gutoza imwe mu mitwe y’inyeshyamba inyanyagiye muri Congo Kinshasa.

Mu yindi raporo yiswe ‘Doing Business out of War’, hanengwa uburyo abayobozi b’ingabo muri Uganda bashishikariza abo bacanshuro “kujya kwiba ubukungu buri mu Burasirazuba bwa Congo Kinshasa”.

Umwe mu banenze cyane ibi bikorwa, yagize ati “wakwibaza uko byagenda abacanshuro ba Uganda bahorejwe mu bindi bice nka Congo Kinshasa cyangwa Somalia, aho bashobora gukomeza gukwirakwiza icyorezo cya Coronavirus”.

Amakuru kandi avuga ko n’abana bashakishwa hirya no hino bagashyirwa muri abo bacanshuro, bakoherezwa kurwana mu bice birimo intambara n’amakimbirane, kandi ngo ibi “ntibihangayikisha abayobozi b’igisirikari cya Uganda habe na gato”.

Afghanistan ni igihugu cyazahajwe na Coronavirus cyane, aho bikekwa ko kimwe cya gatatu cya miliyoni 36 zigituye banduye iyi ndwara.

Abarwanyi b'abacanshuro ba Uganda banduriye Coronavirus muri Afghanistan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .