00:00:00 IGIHE NETWORK KN KINYARWANDA EN ENGLISH FR FRANCAIS

Umwaka wa 2021 waciye agahigo ko kugira abantu benshi bavanywe mu byabo n’intambara n’ibiza

Yanditswe na Bukuru JC
Kuya 20 May 2022 saa 08:33
Yasuwe :

Amakimbirane n’ibiza, umwaka ushize byatumye abantu bagera kuri miliyoni 60 hirya no hino ku Isi bava mu byabo.

Raporo y’Umuryango wo muri Norvège, Internal Displacement Monitoring Centre (IDMC), yagaragaje ko kimwe cya kabiri cy’abantu bavuye mu byabo ari abana bari munsi y’imyaka 18.

Iyi mibare IDMC ivuga ko itarimo abantu bahunze ibihugu byabo bakajya mu mahanga. Uyu muryango uvuga ko imibare ikomeje gutera inkeke kuko yiyongera uko umwaka utashye, ndetse mu 2022 bwo iziyongera cyane nyuma y’intambara u Burusiya bwagabye muri Ukraine.

Umwaka wa 2021 wabaye uwa kabiri mu myaka icumi ishize, ugaragayemo abantu benshi bavuye mu byabo kubera intambara n’ibiza karemano.

Raporo ya Loni iherutse kugaragaza ko nyuma y’intambara muri Ukraine, abantu basaga miliyoni umunani bavuye mu byabo.

Umwaka ushize Afurika yo Munsi y’Ubutayu bwa Sahara na yo yagaragayemo umubare munini w’abavuye mu byabo. Nko muri Ethiopia honyine, abasaga miliyoni eshanu bavuye mu byabo kubera amapfa n’intambara mu Ntara ya Tigray.

Muri Repubulika Iharanira Demokarasi ya Congo na ho hagaragaye ubwinshi bw’abantu bava mu byabo.

Uretse muri Afurika, Afghanistan ni ikindi gihugu cyagaragayemo abantu benshi bavuye mu byabo nyuma y’intambara yatumye Abatalibani basubira ku butegetsi.

Syria ni cyo gihugu kiza imbere mu kugira umubare munini w’abakuwe mu byabo n’amakimbirane aho basaga miliyoni 6.7, RD Congo ifite abantu miliyoni 5.3, Colombia ifite abantu miliyoni 5.2, Afghanistan na Yemen buri kimwe gifite abantu miliyoni 4.3.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .