Burundi: Bazombanza Prosper yemejwe nka Visi Perezida, Guillaume Bunyoni agirwa Minisitiri w’Intebe

Yanditswe na Bukuru JC
Kuya 23 Kamena 2020 saa 03:02
Yasuwe :
0 0

Inteko Ishinga Amategeko y’u Burundi yemeje Gen. Alain Guillaume Bunyoni ku mwanya wa Minisitiri w’Intebe mu gihe Prosper Bazombanza yagizwe Visi Perezida w’Igihugu.

Abayobozi bashya bemejwe mu Nteko rusange y’Inteko Ishinga Amategeko yateranye kuri uyu wa Kabiri, tariki ya 23 Kamena 2020.

Amazina yabo yatanzwe na Perezida mushya w’u Burundi, Gen Ndayishimiye Evariste uheruka kurahirira kuyobora iki gihugu muri manda y’imyaka irindwi.

Nyuma yo kubwirwa ibyerekeye abayobozi bombi, abadepite babatoye ku bwiganze busesuye.

Gen. Alain Guillaume Bunyoni yemejwe nka Minisitiri w’Intebe mu Burundi, ku majwi 92 kuri 94 mu gihe Prosper Bazombanza yatowe ku majwi 91 kuri 94, babiri ntibamutoye mu gihe umwe yifashe.

Gen. Alain-Guillaume Bunyoni wagizwe Minisitiri w’Intebe yari asanzwe ari Minisitiri w’Umutekano mu Burundi. Umwanya wa Minisitiri w’Intebe, ubusanzwe ntiwabagaho mu Burundi, wemejwe mu Itegeko Nshinga rya 2018.

Abayobozi bashyizweho muri gahunda ya Perezida mushya w’u Burundi, Ndayishimiye Evariste, yo kubaka Guverinoma nshya.

Uyu mugabo watorewe kuba Umukuru w’Igihugu yarahiriye kuyobora u Burundi ku wa 18 Kamena 2020, mu birori byabereye kuri stade Ingoma yo mu Ntara ya Gitega, Umurwa Mukuru mushya wa Politiki mu Burundi.

Ndayishimiye afite inshingano zo gushinga Guverinoma igomba kurahirira imbere y’Urukiko rushinzwe kurengera Itegeko Nshinga n’Inteko Ishinga Amategeko, Umutwe w’Abadepite n’uwa Sena.

Imitwe yombi iri gusoza manda yayo ariko hamaze gutorwa abadepite bashya batararahira, hategerejwe amatora y’abasenateri.

Gen. Alain Guillaume Bunyoni yagizwe Minisitiri w’Intebe mu Burundi
Prosper Bazombanza yagizwe Visi Perezida w’u Burundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .