00:00:00 IGIHE NETWORK KN KINYARWANDA EN ENGLISH FR FRANCAIS

Irengero rya ’Agenda’ ya Col Bagosora bivugwa ko yatoraguwe na Tito Rutaremara (Video)

Yanditswe na Iradukunda Serge
Kuya 29 July 2022 saa 07:28
Yasuwe :

Nuganira n’abazi neza urugamba rwo kubohora u Rwanda bazakubwira ko hari agatabo (agenda) ka Col Theoneste Bagosora wari umwe mu basirikare bakuru ku butegetsi bwa Perezida Juvenal Habyarimana, kabuze ndetse kugeza n’ubu irengero ryako rikaba ritavugwaho rumwe.

Col Bagosora yapfuye muri Nzeri 2021, aho yari afungiye Mali ku bw’uruhare yagize muri Jenoside yakorewe Abatutsi mu 1994.

Ku buyobozi bwa Habyarimana uyu mugabo yagiye ahabwa inshingano zitandukanye zijyanye n’igisirikare, kugeza mu 1993 ubwo we n’abandi basirikare bakuru bagenzi be bashyirwaga mu kiruhuko cy’izabukuru.

Bagosora yakomeje kugira uruhare mu miyoborere y’igihugu kuko yagororewe kuba Umuyobozi Mukuru muri Minisiteri y’Ingabo, umwanya wasaga nk’uwa politiki.

Uwo mwanya ni na wo yifashishije tariki ya 9 Mutarama 1993 i Arusha muri Tanzania ubwo hari hamaze gusinywa igice cy’amasezerano ya Arusha kirebana no kugabana ubutegetsi na FPR Inkotanyi, agasohoka yivumbuye avuga ko agiye gutegura ’imperuka’.

Bivugwa ko muri iyi mishyikirano, Bagosora kimwe n’abandi bose, yari afite ’agenda’ yandikagamo ibiri kuvugirwa mu biganiro byabahuzaga n’abari bahagarariye RPF.

Iby’iyi agenda ntibivugwaho rumwe kuko hari abavuga ko muri iyi mishyikirano Col Bagosora yaje kuyita igatoragurwa na Tito Rutaremara wari ku ruhande rwa FPR muri ibi biganiro.

Mu gushaka kumenya neza irengero ry’iyi agenda, IGIHE yagiranye ikiganiro na Tito Rutaremara kuri ubu uyoboye Urwego rw’Igihugu Ngishwanama rw’Inararibonye.

Tito Rutaremera yavuze koko ko iyi agenda yayitoye, ariko ibivugwa ko Col Bagosora yayitaye ari mu mishyikirana ataribyo, ko ahubwo yayitaye mu nzu ye ahunga ubwo ingabo zahoze ari iza RPA zari zigeze kure urugamba rwo kubohora igihugu.

Ati "Yego iyo agenda twarayibonye iwe, ndayireba irimo n’umukono we ariko sinasomye byose kuko ntari mfite uwo mwanya wose. Ndareba nti ariko iyi agenda izagira akamaro, nyiha abantu bacu bari bashinzwe ubutasi mu gisirikare nti ’ubwo bazayibika ariko sinzi aho yagiye."

Rutaremara avuga ko iyi agenda ya Col Bagosora yari yanditsemo ibintu bitandukanye ariko bigaruka cyane ku buryo abasirikare bagabanyije muri komine.

Ati "Nayisomyeho hari harimo ukuntu abasirikare bagabanyije muri komine, ukabona uti aha Interahamwe zagiye mu makomine, agashyiramo igihe inama n’imyitozo bizabera."

Yakomeje avuga ko iyi agenda yari irimo n’ibyo Bagosora yanditse mu gihe cy’amasezerano ya Arusha.

Ati "hari harimo kandi inyandiko yagiye akora mu gihe cy’amasezerano kugira ngo yoherereze Habyarimana hari aho yavuze ngo ’Igihugu inyenzi ziragitwaye’ wenda ari nk’igitekerezo tubatsinzemo."

Tito Rutaremara avuga ko kugeza ubu atazi aho iyi agenda iri kuko kuva yayishyikiriza abasirikare atongeye kuyibona.

Indege ya Habyarimana imaze kuraswa, guhera tariki 7 Mata 1994 ubutegetsi bwasigaye mu biganza bya Bagosora, mu buryo bw’urwiyerurutso buhabwa Sindikubwabo Théodore wari Perezida w’Inteko Ishinga Amategeko.

Inzobere mu mateka zifata Bagosora nk’ubwonko cyangwa umucurabwenge wa Jenoside yakorewe Abatutsi, kuko ibyakozwe mu minsi ijana uhereye muri Mata 1994, ukuboko kwe kwari kubyihishe inyuma.

Muri Jenoside, abayobozi bakomeye bakirwaga na Bagosora aho kuba Sindikubwabo, abashakaga ko ibintu bikemuka bose ni we begeraga kuko byagaragariraga buri wese ko ubutegetsi busigaye mu biganza bye.

Bagosora yatawe muri yombi tariki ya 9 Werurwe 1996 afatiwe muri Cameroon, ahita yoherezwa muri ICTR ku wa 23 Mutarama 1997.

Ku wa 18 Ukuboza 2008, ICTR yahamije Bagosora icyaha cya jenoside n’ibyaha byibasiye inyokomuntu. Yahise akatirwa igifungo cya burundu.

Ku wa 14 Ukuboza 2011, yaje kujuririra uwo mwanzuro w’urukiko maze igihano cyo gufungwa burundu gikurwaho, akatirwa gufungwa imyaka 35.

Col Bagosora yapfuye muri Nzeri 2021, aho yari afungiye Mali ku bw’uruhare yagize muri Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .