00:00:00 IGIHE NETWORK KN KINYARWANDA EN ENGLISH FR FRANCAIS

Inkomoko y’uduce dufite amazina y’Ikinyarwanda tuboneka muri Uganda

Yanditswe na Nsanzabera Jean de Dieu
Kuya 5 Mutarama 2023 saa 08:52
Yasuwe :

Amateka y’u Rwanda, ni amwe mu agoye kugira ngo uzapfe kuyahisha cyangwa se kuyagoreka, kuko Abakurambere mpangarwanda, bayakagiriyemo amabanga menshi ahanga ibigega by’umutamenwa byo kuyahunikamo ngo atazibagirana cyangwa se ngo agorekwe.

Bimwe mu bigega bihunitsemo amateka y’u Rwanda mu buryo butagaragarira buri wese, ni ukwimukana inyito y’ahantu, ku buryo ureba inyito y’ahantu ukamenya icyatumye hitwa gutyo mu mateka y’igihugu.

Kwimukana inyito y’ahantu, byatumye biba igihamya gishinja amahanga yigaruriye ubutaka bw’u Rwanda yibwira ko bitazamenyekana, ubwo byakorwaga n’abakoroni b’Ababiligi, Abadage n’Abongereza.

Mu mpera z’ikinyejana cya 20 gukomeza mu ntango y’icya 21, ni bwo indashyi ya cyane yazikuye umuzimu ! Aho benshi mu Banyarwanda, batangiye guhura n’akaga ko kwirukanwa mu bihugu bakatiweho imipaka, bitwaje ngo si iwabo ni ku butaka bw’amahanga, nyamara ntibamenye ko ari gakondo zabo z’ibihe byose, baremewe n’abababoneye iryo mu museso.

Muri iyi nkuru turagaruka kuri gihamya kitavangiye kigaragaza ubutaka bwahoze ari ubw’u Rwanda buri mu bihugu by’abaturanyi, duhereye kuri Uganda

Nk’uko bubihamirizwa n’inyito z’Uturere n’imisozi iboneka mu Majyepfo y’Iburengerazuba bw’igihugu cya Uganda, tuhasanga amazina menshi asa n’ayo mu Rwanda. Aha akaba ari ho ukurikiranira hafi iby’izo nyito yakwibaza ngo izo nyito ziri ku butaka bwa Uganda zisa n’izo mu Rwanda, zaba zaragezeyo zite?

Nk’uko amateka y’u Rwanda abigaragaza, ubutaka bugandagajeho uru Rwanda dufite ubu, bwari bugizwe n’ibihugu 29, bimwe muri ibyo bihugu bikaba byarimo Nkore y’Abahinda, u Bugara bw’Abacyaba na Ndorwa y’Abashambo.

Kugira ngo ibyo bihugu bihuzwe, habayeho ibitero u Rwanda rwagabye muri ayo mahanga byatwaye imyaka 582 (1312-1894). Bigabwa n’abami batandukanye batwaye muri iyo myaka kugeza ubwo bihujwe bikaba igihugu kimwe cyitwa : Rwanda.

Kugira ngo amateka y’iyagurwa ry’u Rwanda atazibagirana, Abakurambere mpangarwanda, bagiye barema ubugenge bwo kwimukana inyito z’ahantu hari mu Rwanda, bakazijyana ku butaka bushya bigaruriye nk’igihamya cy’uko habaye ahabo. Inyito y’icyo gihugu barimbuye ikarimbukana na cyo n’izina ryaho rikazima.

Iki kikaba gihamya cy’uko mu gihugu cya Uganda, hari ubutaka abakoloni bakatiyeyo benshi batemeranya neza uko bungana, cyangwa se bakabirenza ingohe ntibanabyiteho. Nyinshi mu nyito ziboneka muri icyo gihugu, zahawe inyito n’abakurambere b’u Rwanda, ubwo bahigaruriraga hakaba ahabo. Izo nyito dusanga muri utwo Turere, ni izi zikurikira:

Akarere ka Kabare gafite ahitwa Kabare, Rubaya, Bufundu, Muko, Muhanga , Rwamucucu, Ndorwa n’ahandi.

Mu Karere ka Kisoro uzahasanga ahitwa Nyundo, Busanza, Rubanda, Nyakabande, Nyarubuye, Nyakinama, Nyarusiza n’ahandi.

Akarere ka Ntungamo ko gafite Ngoma, Rukoni, Ruyonza, Nyabiheke, Rugarama, Kibatsi, Kayonza, Kagarama, Rwahi, Kabira n’ahandi.

Akarere ka Mbarara gafite Rugando, Nyamitanga, Rwampara, Rwanyamahembe, Bugamba, Bubare, Rubindi n’ahandi.

Mu Karere ka Bushenyi uzahasanga Gitagata, Kabira, Ruhinda, Kigarama, Bunyaruguru n’ahandi.

Akarere ka Isingiro gafite ahitwa Kabingo, Ngarama, Gashumba, Mbare, Birere n’ahandi.

Izi nyito kandi uzasinga mu Karere ka Kiruhura gafite ahazwi nka Kiruhura, Nkungu, Kazo, Buremba, Burunga, Sanga, Kanoni n’ahandi.

Akarere ka Ibanda ko gafite ahitwa Rukiri, Kagango, Bisheshe, Kazo, Nyamarebe, Bufunda, Igorora n’ahandi.

Akarere ka Kanungu nako gafite agace kitwa Nyamirama, Nyakinoni, Kinaba, Katete, Mpungu, Kayonza n’ahandi.

Mu Karere ka Rukungiri ho hari Kambuga, Kirima, Kayonza, Kagunga, Rugeyo, Rutenga, Rubirizi n’ahandi.

Aka gace ka Uganda y’Amajyepfo y’Iburengerazuba kabumbye ubutaka bungana na Kirometerokare 17, 715, zari ku butaka bw’u Rwanda mbere y’umwaduko w’Abakoloni.

Ubwo butaka nibwo bugizwe n’uturere twa Rukungiri, Kisoro na Kanungu byari bigize kimwe mu gihugu byo mu Rwanda rwo ha mbere cy’u Bugara bwagengwaga n’Abacyaba bakura igisekuruza cyabo kuri Nyirarucyaba rwa Gihanga, cyahanzwe ahasaga mu wa 1120 mu kibariro cy’ibihe byacu.

Hariho kandi n’Akarere ka Kabare kari kagize kimwe mu bihugu byo mu Rwanda rwo ha mbere cya Ndorwa cyagengwaga n’Abashambo bakura igisekuruza cyabo kuri Mushambo wa Kanyandorwa ya Gihanga, yahanzwe ahasaga mu wa 1120 mu kibariro cy’ibihe byacu.

Hakaziraho n’Uturere twa Ntungamo, Bushenyi, Mbarara, Isingiro, Kiruhura, Ibanda, byari bigize igihugu cya Nkole yagengwaga n’Abahinda bakura igisekuruza cyabo kuri Ruhinda rwa Kazigaba, kikaba cyarahanzwe ahasaga mu wa 500 mu kibariro cy’ibihe byacu.

Ibyo bihugu byombi uko ari bitatu, byigaruriwe n’abami b’u Rwanda mu bihe bitandukanye. Aho igihugu cy’u Bugara cyigaruriwe na Ruganzu Ndoli ahasaga mu wa 1510, Ndorwa y’Abashambo yigarurirwa na Cyilima Rujugira ahasaga mu wa 1695, naho Nkole y’Abahinda yigarurirwa na Kigeli Rwabugli muri Gashyantare 1894.

Mu nama y’i Buruseli mu Bubiligi yateranye ku wa 8 Gashyantare 1910, ihuje ibihugu by’u Budage bwari bwarakoronije u Rwanda, Burundi na Tanzaniya, u Bubiligi bwari bwarakoronije Congo n’u Bwongereza bwari bwarakoronije Uganda na Kenya.

Imyanzuro yayo yaje kwemezwa ku wa 14 Gicurasi 1910, kuko aribwo abo bakoloni bakatakase u Rwanda, buri mukoloni atwara agatanyu ke, undi atwara ake, aho Ababiligi batwaye Kirometerokare 124,553 bakazomeka kuri Congo, naho Abongereza batwara Kirometerokare 17, 715, bazomeka ku gihugu cya Uganda. U Rwanda rwari rufite ubutaka bungana na Kirometerokare 168,606, rusigarana Kirometerokare 26,3338.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .