00:00:00 IGIHE NETWORK KN KINYARWANDA EN ENGLISH FR FRANCAIS

Imirimbo idasanzwe yo ku maguru no ku maboko y’abishoboye bo mu Rwanda rwo hambere

Yanditswe na Nsanzabera Jean de Dieu
Kuya 9 Ukwakira 2022 saa 10:06
Yasuwe :

Umutako, umuteguro n’umurimbo, ni umuco karande w’Abanyarwanda, aho babikoraga bagamije kwirimbisha bo ubwabo, aho baba n’aho batuye, ngo bagaragare neza nk’abiyitaho n’abanyesuku. Uwo muco si umutirano, icyo twatiye mu mahanga, ni ingeri nyinshi z’iyo mitako yo kwirimbisha, ariko iyo mitekerereze yo ni iya kera na kare mu Banyarwanda, ndetse menshi mu mahanga ari ku isi imirimbire myinshi bayivoma iwacu.

Myinshi mu mirimbo y’Abanyarwanda, yagaragazwaga na buri wese, yaba umugore cyangwa se umugabo, yaba umukuru n’umwana. Nubwo byari umuco karande w’igihugu, ariko na none hari imitako yabonaga umugabo igasiba undi. Ari na yo mpamvu tugiye gutaturira hamwe myinshi mu mitako yagaragazaga ko Abanyarwanda biyitaho kandi barazwaga ishinga no kugaragara neza.

Ukwirimbisha k’Abanyarwanda byagiye bigira intera igenda igerwaho, uko ingoma zimaga izindi zihanguka. Mu bihe bya Rudahigwa yima ingoma nyuma ya se Yuhi V Musinga, habaye impinduka zikomeye mu byerekeye mirimbo y’ibwami. Buri gice cy’umubiri cyagiraga imitamirizo yabugenewe.

Habagaho imitamirizo yo ku mutwe, imitako yo mu ijosi, ku gihimba, ku maguru no ku maboko, ndetse n’imitamirizo y’inka, aho zari zigeze ku muco ko kurimbishwa nk’abantu.

Imwe mu mirimbo tugiye gutaturira hamwe, ni iyo batamirizaga ku maboko no ku maguru, ari ko na yo yambaraga umugabo igasiba undi, ni iyi ikurikira:

Ubutega n’Inyereri

Ubutega n’Inyereri, ni imwe mu mirimbo ya kera na kare mu mateka y’u Rwanda, akaba ari ibyuma byinshi bishushe nk’uruziga bambaraga uhereye mu bujana bw’ikirenge bukarenguka ku bibero by’umugore., bigahabwa amazina bitewe n’ingano y’umubyimba w’ibyo byuma.

Ubutegan’inyereri kandi banabwambaraga mu rwego rwo gukinga bimwe mu bice by’umubiri byabaga bitambaye uruhu nk’ibibero n’amaguru, mu rwego rwo kugerageza kwikwiza. Abishoboye bashoboraga kwambara ubugera ku magana, biturutse ku bushobozi bwo kubwigurira. Bwagiraga icyo buhindura ku ntambuko y’ubwambaye.

Aho aho uruhu rwagarukiraga ku birenge no ku maguru bakambara izo Nyereri n’Ubutega ku buryo utabasha kubona imirundi yabo cyangwa ipfundiko zabo namatako n’ibibero. Bitewe nuko bwabaga bucuze mu byuma kandi kubicura mu butare bikaba bigoye, bwambaraga umugore bugasiba undi. Ari yo mpamvu wasangaga ababwambaraga ari abagabekazi, abagore b’ibwami n’abatware gusa.

Ibitare

Ibitare, na byo byari imirimbo y’Abanyarwanda bo ha mbere, bwakorwaga mu busenzi bw’inka bazingurizagaho utugozi duto dukoze mu muringa. Abagore babyambaraga ari byinshi ku maboko, naho abagabo bo ntibarenzaga tubiri kuri buri kaboko. Hari n’ababyambaraga ku maguru.

Imiringa

Imiringa benshi bakunze kwita Ibikomo, ni imwe mu mirimbo ya kera na kare, abagore bambaraga mu bujana bw’akaboko, usibye ko hari n’abagabo bayambara. Nayo yabaga ari ibyuma byinshi bishuhushe nk’uruziga, ku buryo umuntu wabaga yifite yabyambaraga ku bwinshi.

Abagabo bambaraga umwe cyangwa ibiri ku maboko, naho abagore bakambara myinshi ku buryo yageraga mu nkokora.

Hariho ubwoko bwinshi bw’imiringa. Hari umuringa muremure cyane bazingaga ku buryo uba ushushe nk’imiringa nyinshi umuntu yambaye. Wabaga ugizwe n’inziga ziri hagati y’umunani na makumyabiri. Ukitwa: “Umuringa w’amazi w’umuzinge”.

Hariho n’umuringa w’: “Igihindo” (biva ku nshinga guhinda, bivuga guhagarika ycangwa gukumira). Uyu wabaga ubyibushye, ukoze mu cyuma gihese. Bawushyiraga hafi y’ikiganza kugira ngo utangire indi miringa yo inanutse kandi miremire. Iyo uyu muringa wabaga ukoze mu cyuma bita umuringa, ukwitwa : “Umuringa w’umujumba”.

Uko u Rwanda rwagiye rurushaho guhaha ibyiza mu mahanga, n’iby’imirimbo ntibabitanzweho, ahubwo babihashye ku bwinshi, ku buryo ubasangana imirimbo y’amoko menshi, bityo hakaba nta we ukwiye kwitiranya kwirimbisha n’umuco twahashye mu mahanga, ngo wamaganirwe kure nk’uko benshi babyihangishije nk’ibishenzi dukwiye kwamagana! Ahubwo ni umuco gakondo wacu, dukwiye gukomeraho. Kuko kwirimbisha, ni yo soko y’isuku Abanyarwanda bahorana, ihora irahirirwa n’amahanga!

Umwami Yuhi Musinga, ari kumwe n'Ibikomerezwa by'Abamisiyoneri, n'abatware be, yari yambaye Ibitare
Umutware Nyirakigwene, ni umwe mu bambaraga Ubutega bwinshi mu mateka y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .