Imikino gakondo yahawe umwihariko mu kwizihiza Umunsi w’Intwari z’Igihugu 2020

Yanditswe na IGIHE
Kuya 31 Ukwakira 2019 saa 05:40
Yasuwe :
0 0

Tariki ya 1 Gashyantare buri mwaka u Rwanda rwizihiza Umunsi w’Intwari, hibukwa ibikorwa by’indashyikirwa byaranze abantu batandukanye kugeza n’ubwo bamwe batanga ubuzima bwabo bakitangira igihugu n’abagituye.

Ni ibirori bikorwa mu gihugu hose uhereye mu midugudu hazirikanwa Intwari z’u Rwanda ziri mu byiciro bitatu ari byo Imanzi, Imena n’Ingenzi; zishyirwamo hashingiwe ku bwitange bugaragarira mu bikorwa zakoze, akamaro byagiriye abantu ndetse n’urugero zatanze cyangwa zitanga ku bandi.

Itegeko no 13 bis/2009 ryo ku wa 16/06/2009 rigena inshingano, imiterere n’imikorere by’Urwego rw’Igihugu rushinzwe Intwari z’Igihugu, Imidari n’Impeta by’Ishimwe (CHENO) risobanura Intwari nk’umuntu ukurikirana icyo yiyemeje kugera bivuyemo igikorwa cy’ikirenga gifitiye abandi akamaro, akabikora mu bupfura, mu kwihangana no mu bwitange buhebuje kandi akirinda ubugwari mu migirire ye, ntagamburuzwe n’amananiza.

Mu rwego rwo kwitegura neza umunsi wizihirizwaho Intwari kuri ubu ibirori bya 2020, byatangiye gutekerezwaho.

Umunsi w’Intwari z’Igihugu 2020 uzarangwa n’ibikorwa bitandukanye birimo n’imikino gakondo nko gusimbuka urukiramende n’iyindi itari isanzwe imenyerewe irimo nk’uwo gusiganwa ku magare.

Kuri uyu wa kane tariki 31 Ukwakira 2019, mu cyumba cy’inama cya Minisiteri ya Siporo n’Umuco habereye inama ya mbere yahuje abafatanyabikorwa b’Urwego rushinzwe Intwari z’Igihugu, Imidari n’Impeta by’Ishimwe mu gutegura Umunsi w’Intwari z’Igihugu mu 2020.

Umunyamabanga Nshingwabikorwa wa CHENO, Nkusi Déo, yavuze ko muri uyu mwaka

Ati "Ku biganiro n’imikino ngororamubiri bisanzwe bibaho muri ruhago, Basketball, Volleyball na Sitting Volleyball, umwaka utaha hateganyijwe kuziyongeraho imikino gakondo nko gusimbuka urukiramende n’iyindi.’’

Yakomeje avuga ko “Kuri uwo munsi tuzirikana kandi abakoze ibindi bikorwa by’ubutwari nk’abakomeye ku Bunyarwanda n’abarwanyije akarengane ako ari ko kose.’’

Biteganyijwe ko Icyumweru cy’Ubutwari kizatangira ku wa 24 kugeza 31 Mutarama 2020.

Umunsi w’Intwari z’Igihugu wizihizwa tariki ya 1 Gashyantare buri mwaka hagamijwe gukangurira Abanyarwanda cyane cyane urubyiruko umuco w’ubutwari no gushima Abanyarwanda n’abanyamahanga bagaragaje ibikorwa n’ibitekerezo bifitiye u Rwanda akamaro; gushima abana b’u Rwanda bitanze bahanga u Rwanda, abarwubatse, abarubohoye ingoyi y’ubukoloni n’iy’ubutegetsi bubi ndetse n’abahagaritse Jenoside yakorewe Abatutsi mu mwaka w’i 1994.

Nyuma y’inama, abafatanyabikorwa ba CHENO banasuye Igicumbi cy’Intwari z’Igihugu bareba aho imirimo y’ubwubatsi igamije kuhavugurura igeze, banasobanurirwa imiterere y’uwo mushinga.

Umunsi w’Intwari watangiye kwizihizwa ku wa 1 Gashyantare buri mwaka mu 2002. Guhera mu 1994 kugeza mu 2001 wizihizwaga ku wa 1 Ukwakira nyuma yo kuwushyira ku wa 1 Gashyantare, iya 1 Ukwakira yagizwe Umunsi wo Gukunda Igihugu.

Mu butumwa Perezida Paul Kagame yageneye Abanyarwanda ubwo hizihizwaha Umunsi w’Intwari ku wa 1 Gashantare 2019, yashimiye intwari zitangiye u Rwanda, avuga ko ubwitange bwazo buzakomeza kuzirikanwa, kandi ko ari inshingano za buri wese kugira ngo igihugu gikomeze kujya aho Abanyarwanda bifuza.

Abafatanyabikorwa b’Urwego rushinzwe Intwari z’Igihugu, Imidari n’Impeta by’Ishimwe bakoze inama ya mbere itegura Umunsi w’Intwari z’Igihugu mu 2020
Abafatanyabikorwa ba CHENO banasuye Igicumbi cy’Intwari z’Igihugu bareba aho imirimo y’ubwubatsi yo kuhavugurura igeze
Basobanuriwe birambuye imiterere y'uyu mushinga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .