00:00:00 IGIHE NETWORK KN KINYARWANDA EN ENGLISH FR FRANCAIS

Icyari gutuma RPA idahagurukira guhangana na Leta ya Habyarimana

Yanditswe na IGIHE
Kuya 18 May 2022 saa 07:26
Yasuwe :

Hashize imyaka 28 Ingabo zahoze ari iza RPA zitsinze izari iza Leta ya Juvénal Habyarimana, zibohora igihugu zinahagarika Jenoside yakorewe Abatutsi mu 1994.

Ni urugamba rwatangiye ku wa 1 Ukwakira mu 1990 biturutse ahanini ku kuba Abanyarwanda bari barahungiye mu bihugu by’ibituranyi nk’u Burundi, Uganda, Tanzania na Repubulika Iharanira Demokarasi ya Congo bari barimwe uburenganzira bwo gutaha mu gihugu cyabo.

Bafashe umwanzuro wo gutaha ku mbaraga, nyuma y’uko ubundi buryo bwose burimo n’ubw’ibiganiro bwari bwanze.

Mu bihe bitandukanye, izi mpunzi z’Abanyarwanda zagiye zigerageza kumvikanisha ikibazo cyazo ariko kikarenzwa ingohe n’abari bayoboye u Rwanda.

Juvénal Habyarimana wayoboye u Rwanda mu 1973 - 1994, we yigeze kumvikana avuga ko "u Rwanda ari ruto, impunzi z’Abanyarwanda zikwiye gufashwa gutura no guhabwa uburenganzira mu bihugu zahungiyemo."

Kugira ngo yumvikanishe ubuto bw’u Rwanda yavuze ko ari nk’ikirahure cyuzuye amazi, ku buryo uramutse ugerageje kongeramo andi yameneka.

Yakunze kumvikana cyane mu bikorwa byo guheza ishyaga impunzi z’Abanyarwanda no kuvangura Abatutsi. Ibi yabifatanyagamo n’inshuti ze n’umuryango bari bahuriye mu cyiswe ’Akazu’.

Mu kiganiro Perezida Paul Kagame wari uyoboye Ingabo zari iza RPA zatsinze urugamba mu 1994 yigeze kugirana n’Umwanditsi mukuru wa Jeune Afrique, François Soudan, yavuze ko iyo urebye imiterere ya Habyarimana usanga yari ihwanye n’iy’abari bamuri hafi barimo n’umugore we.

Ati "Bari bamwe, abantu batandukanye ariko basangiye ingengabitekerezo, imitekerereze imwe ndetse n’ibikorwa bimwe. Nta gushidikanya guhari."

Kutwemerera gusura imiryango byari kuba bihagije

Muri iki kiganiro cyagarukaga ku mateka n’ibihe bikomeye u Rwanda rwanyuzemo, Perezida Kagame yavuze ko kare kose iyo Habyarimana aza kwemerera impunzi z’Abanyarwanda uburenganzira bw’ibanze byashoboka ko zitari no kwirirwa zimushozaho intambara.

Ibi yabivuze asubiza ikibazo cya Soudan, wari umubajije niba iyo Habyarimana aza kwemerera impunzi gutaha, amateka u Rwanda rufite uyu munsi yari kuba atandukanye.

Perezida Kagame mu kumusubiza yagize ati "Nemera ko byinshi mu bibazo byari kwirindwa iyo Habyarimana agerageza kwegera impunzi. Iyo aza kwerekana ubushake bwo kwinjira mu mishyikirano natwe ku bijyanye na gahunda yacu yo gutaha n’uburenganzira bwacu."

Yakomeje avuga ko kwemererwa uburenganzira bw’ibanze nko gusura u Rwanda no kuhakorera ubucuruzi, byashoboraga guhindura ibintu byose.

Ati "Iyo aza gusobanura ikibazo ahereye k’uko abona ibintu, ubundi agashakisha igisubizo, byari kuba bigoye kuba twahindukira tukamushozaho intambara, ndetse n’iyo nibura abwira impunzi ko zemerewe kujya mu Rwanda, kuhakorera ubucuruzi no gusura abavandimwe babo cyangwa se akababwira ko bemerewe kuhakorera ingendo ntacyo bishisha."

"Nkeka ko abantu benshi bari kunyurwa no kuba bafite amahirwe ndetse bakaba babyihorera gutyo."

Kagame yavuze ko kwimwa ubu burenganzira bwose ariho impunzi zavomye umujinya n’imbaraga byo guhaguruka zikarwanya Habyarimana.

Ati "Ariko igihe ubwiwe ko utari uw’ahantu runaka, ko udakwiye uburenganzira na buke, ko udashobora no kuzataha ko ugomba kuguma aho uri, ibyo bigira ingaruka zihabanye n’izari zitezwe ku bantu."

"Bibaremamo umujinya, ndetse biremamo abantu imbaraga nubwo baba bazi ko ibyo bari kwinjiramo bizagira ingaruka kuri bagenzi babo bari mu Rwanda, bituma bumva ko bakwiye guhaguruka bakarwanira uburenganzira bwabo."

Kuki mutakumiriye Jenoside?

Soudan yakomeje abaza Perezida Kagame impamvu batangije urugamba rwo kubohora igihugu ariko ntibabashe kuburizamo umugambi wa Jenoside yakorewe Abatutsi, kandi wari umaze igihe utegurwa.

Yamubajije kandi impamvu hari ibice RPA yagendaga ifata, ariko igahitamo gusubira inyuma aho gufata ubutegetsi ngo itabare Abanyarwanda bari mu kaga.

Perezida Kagame ati "Iki kibazo gishyira RPF mu mwanya wo kuba yari ifite imbaraga n’ububasha burenze ubwo twari dufite mu by’ukuri. Byumvikana nk’aho twari dufite ububasha bwo kuba twagena ikiba, igihe tubishakiye."

"Ariko RPF ntabwo yari ifite izo mbaraga, twari dufite ibituzitira. Ibituzitira mu bijyanye n’ubushobozi, ariko na none twari dufite inzitizi mu bijyanye n’ibyo dushobora gukora."

Yavuze ko hari bimwe mu bice RPA yafataga ariko igahitamo gusubira inyuma kubera igitutu cy’amahanga, no kubona ko gufata ibyo bice gusa bitazayigeza ku ntego nyamukuru yari yihaye.

Ati "Isi yadushyizeho amananiza, twari dufite inzitizi mu byo dushobora gukora kandi Isi yose ituri inyuma igerageza gufunga umuryango wose twashoboraga guhengekerezamo. Mu 1993 ntabwo twafashe igihugu kubera izi mpamvu zikurikirana."

"Mbere na mbere, twari dufite ibintu byinshi ku mutwe. Ntabwo twari dufite ubushobozi bwo gufata igihugu ngo ndetse duhagarare ku mahame yacu. Byari kuba bimaze iki gufata Kigali ku mbaraga ariko tudashobora kugumana ibirindiro byacu ?"

Yakomeje agira ati "Twagombaga kureba ibintu mu buryo bwagutse. Isi yari iduhugiyeho kandi idashyigikiye impamvu y’urugamba rwacu, amategeko aturwanya yari menshi. Byabaye ngombwa ko duhagarara."

Yavuze ko nubwo hari aho RPA yagiye ifata igasubira inyuma, byeretse Leta ya Habyarimana ko ifite ingufu ndetse biyisunikira kwinjira mu mishyikirano.

Ati "Ariko byanadufashije gutanga ubutumwa, twashyize igitutu kuri Guverinoma yicaga abasivile ndetse tubashyira ku gitutu cyo gusaba imishyikirano."

"Hejuru y’ibyo, iriya Guverinoma yabonye ko dufite imbaraga kurenza uko yabitekerezaga, nubwo twari dufite ubushobozi buke twabashije guhashya ingabo zayo ku muvuduko kandi byose bikagenda neza."

Igihe cy’imishyikirano, Leta ya Habyarimana yagikoresheje nk’amahirwe yo kwisuganya no kwikuraho igitutu yari imaze igihe yarashyizweho n’ingabo za RPA.

Iki gihe yumvaga ko nimara kwisuganya neza, izabasha guhangana n’izi ngabo ikazisubiza inyuma, bityo umugambi w’imishyikirano ukaburizwamo.

Perezida Kagame yavuze ko ibi bitabaciye intege, kuko babashije gukomeza urugamba kugeza babohoye u Rwanda ndetse bahagarika Jenoside.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .