00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku gihugu cy’i Gisaka, kimwe mu by’ibihangange byabayeho mbere y’u Rwanda

Yanditswe na Nsanzabera Jean de Dieu
Kuya 22 Ukuboza 2022 saa 10:07
Yasuwe :

Umujyo twatangiye turacyawukomeje, wo gutaturira abasomyi n’abakunzi b’ amateka y’ibihugu 29 byari bigadagaje kuri ubu butaka butaraba u Rwanda dufite ubu. Amateka y’igihugu turasukiye ho ubu, ni amateka y’igihugu cy’i Gisaka cyari giherereye mu Burasirazuba bw’u Rwanda.

Nk’uko tubikesha igitabo “ Imizi y’u Rwanda” iki gihugu cy’i Gisaka cyagengwaga n’Abagesera b’Abazirankende, kikaba kimwe mu bihugu by’ibihangange byabayeho kera na kare.

Igihugu cy’i Gisaka, ni kimwe mu bihugu by’ibihangange byabayeho mbere y’u Rwanda, ni igihugu cyahanzwe na Muzirankende wa Ruhinda wagengaga ingoma ya Kalagwe, ari naho baua igisekuruza cyabo.

I Gisaka cyarigengaga kikagira n’Ingabe yacyo, RUKURURA. Abami b’icyo gihugu bari Abagesera b’Abazirankende. Ikirangamuryango cyabo cyari Inyamanza, amacishirizo y’ihangwa ry’icyo gihugu, akaba agaragaza ko cyahanzwe ahasaga mu wa 450, kibariro cy’ibihe byacu.

Ubusanzwe i Gisaka cyari igihugu kinini kandi cy’igihangange muri byose ugereranyije n’ibindi bihugu byari kuri ubu butaka bw’u Rwanda, cyarimo uturere dutandatu:

U Buganza bw’Epfo: Ubu ni mu Mirenge ya Musha, Munyiginya, Gishari, Muhazi, Kigabiro, Munyaga, Rubona na Mwurire yo mu Karere ka Rwamagana.

U Buganza bwa Ruguru: Kuri ubu ni mu Mirenge ya Giti, Rutare , Bukure, Rwakiko na Muko yo mu Karere ka Gicumbi . Kimwe n’Imirenge ya: Muhura na Gasanze yo mu Karere ga Gatsibo.

U buganza bw’Iburasirazuba: Ubu ni mu Mirenge ya: Nyamirama, Rwinkwavu, Ndego, Mukarange na Kayonza yo mu Karere ka Kayonza,
Gihunya Rwagati: Impamvu ako Karere kiswe Gihunya Rwagati, ni uko n’ubundi kari gaherereye hagati y’utundi Turere te’igihugu cy’I Gisakai. Ubu ni mu Mirenge ya: Kabarondo, Murama, Ruramira na Kabare yo mu Karere ka Kayonza. Kimwe n’Imirenge ya: Remera, Kibungo, Rukira, Murama na Rurenge yo mu Karere ka Ngoma n’ Imirenge ya: Kirehe, Musaza, Gatore na Gahara yo mu Karere ka Kirehe.

Migongo: Ubu ni mu Mirenge ya Nasho, Mushikiri, Nyarubuye, Mpanga, Nyamugari, Mahama, Kigina na Kigarama yo mu Karere ka Kirehe.

Mirenge: Ubu ni mu Mirenge ya Karembo, Zaza, Gshanda, Kazo, Mugesera, Sake na Mutenderi, yo mu mu Karere ka Ngoma.

Ibihangange byanditse amateka mu gihugu cy’I Gisaka muri bo twavugamo cyane cyane Muzirankende, umukurambere w’imbanza w’ingoma y’i Gisaka wahanze icyo gihugu akazungurwa n’umuhungu we Mugesera ari na we wazunguye se mu mugambi wo guhanga igihugu, ari na yo yabaye inkomoko y’izina ry’umuryango mugari wa bo ubonekamo ba sekuruza ba bo babiri Mugesera wa Muzirankende.

Twavugamo kandi abami b’icyo gihugu bazunguye umubambi wo kucyubaka wahanzwe na Muzirankende, abo bami ni bo barimo: Umwami Kwezi I na Kwezi II, umwami Ruregeya I, Ruregeya II na Ruregeya III, umwami Bazimya I, Bazimya II, Bazimya III na Bazimya IV, babaye abami b’umushumi b’i Gisaka. Ari nabo biziritse umukanda bakubaka imfatiro icyo gihugu kizubakirwaho batakiriho.

Ntitwabura kuvugamo kandi, umwami Kimenyi I Rwahasha, umwami w’ibitekerezo wa mbere w’i Gisaka, Kimenyi II Musaya wagengaga ingoma y’i Gisaka ubwo Bwimba w’i Rwanda yagabaga yo igitero cya mbere cyo kwagura igihugu, Kimenyi III Shumbusho wagengaga icyo gihugu mu bihe bya Mibambwe Sekarongoro Mutabazi w’i Rwanda, bari n’inshuti magara ntunsige, Kimenyi IV Muhoza, wagengaga ingoma y’i Gisaka mu bihe bimwe n’umwami w’i Rwanda Mibambwe Gisanura ahasaga mu wa 1609-1642.

Hariho n’umwami Kimenyi V Getura wagengaga i Gisaka mu bihe byo kwifatanya n’ibindi bihugu by’u Bugesera, Ndorwa n’u Burundi kugira ngo bahanagureho u Rwanda rwa Rujugira na Rugeyo Zigama wariho mu gihe cy’ingoma ya Rwogera w’i Rwanda ndetse na Mushongore na Ntamwete batsinzwe na Rwogera bikomotse ku itsitsurana rya bo ry’izungura ry’ingoma ya se Rugeyo Zigama.

Abami b’i Gisaka nab’i Rwanda, bakunze no kugirana ubumwe bushingiye ku guahyingirana. Aho Kimenyi II Musaya yashatse Robwa Nyiramateka ya Nsoro Samukondo, na Cyilima Rujugira washatse Rwesero rwa Kimenyi IV Muhoza, ari na we nyina wa Nabarasa wazunguye se Rujugira ku ngoma y’u Rwanda.

U Rwanda rwakunze kugirana ibibazo byinshi n’i Gisaka mu bihe bitandukanye, byinshi bikanavukamo intambara. Igitotsi cya mbere, cyavutse ubwo i Gisaka cyari kirangajwe imbere na Kimenyi II Musaya, watwaraga icyo gihugu ahasaga my wa 1312, yiyemezaga kwikura mu masezerano y’ihuzabihugu yemeranyirijweho n’Abami b’ibihugu ahasaga mu wa 1100 i Nkotsi na Bikara. I Gisaka kikiyemeza gukangurira ibindi bihugu kwikura muri ayo masezerano no kurimbura igihugu cy’i Gsabo cyasigaranye umurage w’icyo gikorwa

Muri ibyo bihe, nibwo Bimba wagengaga igihugu cy’I Gasabo, yahisemo gutanga ibyo bihugu aratera, atera i Gisaka, agwa i Nkungu na Munyaga, ibitero by’u Rwanda n’i Gisaka bitangira ubwo. Kugeza ubwo ahasaga mu wa 1695, I Gisaka kishyize hamwe n’ibindi bihugu birimo: Ndorwa, Burundi n’u Bugesera, bishyira hamwe umugambi wo kurimbura u Rwanda burundu. Icyo gihe nib wo Rujugira rwa Mazimpaka, yatsinze icyo gitero, ashimangira ubutarushwa n’ubutaneshwa bw’u Rwanda, yemeza mu buryo budasubirwaho ko u Rwanda rutera rudaterwa.

Igitero kigaruriye Ingoma y’i Gisaka cyagabwe na Mutara II Rwogera, nyuma y’imyaka isaga 538, u Rwanda n’i Gisaka bidacana uwaka,. Icyo gihe i Gisaka cyatwarwaga na Rugeyo Zigama. Ariko amaze gutanga abahungu ba Kimenyi Getura yari yarazunguye ari bo: Mushongore na Ntamwete basubiranyemo barwanira Ingoma.

Mushongore yitabaza umwami w’u Rwanda Mutara II Rwogera, Ntamwete Rwogera amucura inkumbi aramwica yigarurira atyo i Gisaka. Yigarurira n’ Ingoma Ngabe yaho Rukurura. U Rwanda ruba rutsinze igitego cyo kwigarurira ibihugu bikomeye byari bituranye narwo ari byo: u Bugesera, Nduga, Ndorwa n’i Gisaka.

Icyo gitero cyabaye mu ndunduro y’Ingoma ya Rwogera ahasaga mu wa 1850, icyo gihe yigarurira i Gisaka. Ingoma y’Abazirankende yari yarazengereje u Rwanda imyaka myinshi izima ityo. Ubutaka bwa cyo bwomekwa ku Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .