00:00:00 IGIHE NETWORK KN KINYARWANDA EN ENGLISH FR FRANCAIS

Ibidasanzwe ku muriro wa Gihanga wamaze imyaka isaga 845 utazima

Yanditswe na Nsanzabera Jean de Dieu
Kuya 21 June 2022 saa 09:07
Yasuwe :

Hari byishi byaranze amateka y’u Rwanda, ushobora gutekerereza benshi mu Banyarwanda bakabyumva nk’ibitangaza bitigeze bibaho. Kimwe muri ibyo ni umuriro wa Gihanga amateka adutekerereza ko wamaze imyaka isaga 845 (1091-1936) waka ubutazima.

U Rwanda ni igihugu cyahanzwe n’abakurambere b’abahanga bari bafite imitekerereze ihanitse yo kugena uko igihugu kizabaho nyuma y’imyaka ibihumbi n’ibihumbagiza batakiriho. Ibyo tubona mu Rwanda ubu n’ibyo twumva mu mateka yatubanjirije, nta bwo ari ibihumyo byo mu ishyamba byimejeje cyangwa se imegeri ubona zigera igihe zikimeza abantu bakanezezwa no kubona isupu yazo nziza, ariko nta we ushobora kuguhamiriza uko zabayeho n’uko zigera igihe zikaboneka ku isi abantu bakanezezwa na zo.

Iby’i Rwanda, nta na kimwe cyahanutse ngo kive mu ijuru kikubite hasi, ahubwo byose byararemwe, bihabwa inkingi za mwamba zibishyigikira ngo bizarame imyaka n’imyaniko nta kibihungabanyije, hanashyirwaho umurongo ukomeye wo kubyamamaza ngo bene byo babimenye.

Abakurambere mpangarwanda, bagize ubuhanga buhanitse bwo kurema ibintu bikamenyekana mu bengihugu bikamara imyaka ibihumbi n’ibihumbi nta n’umwe urabyibagirwa cyangwa se ngo abihindurire umurongo byaremanywe.

Kugira ngo byose bigerweho, ni uko bakundaga gukoresha ibimenyetso bifatika kandi biramba ku buryo uzajya abona icyo kimenyetso azajya ahita asobanurirwa icyo bivuze bitagoranye, kuruta kubwiriza abantu mu magambo kuko yo aribagirana.

Ubundi buryo bakoreshaga kandi bukomeye, ni ugutanga umurage ku muryango mugari runaka kugira ngo ujye urinda ibyo bimenyetso bikaba inshingano-murage by’iteka ryose. Kwimukana inyito y’ahantu byo bikaba akarusho kuko byo byari ubuhanga bwo kubika amateka babayemo ngo atazibagirana.

Kimwe mu bimenyetso tugiye kubataturira byaramye imyaka myinshi kandi bifite icyo bisobanuye mu mateka y’umushinga wo kubaka u Rwanda, ni umuriro wa Gihanga wahanganywe n’u Rwanda, uba umwe mu bimenyetso bikagiriyemo indangacyerekezo cy’aho Gihanga cyahanze u Rwanda yifuzaga kuganisha igihugu no mu myaka ibihumbi atakiriho.

Umuriro wa Gihanga ni kimwe mu birango bitatu bya mbere mu Rwanda ( Urusengo Nyamiringa, Inyundo Nyarushara n’Umuriro) byahanzwe na Gihanga, ubwo yahangaga igihugu cy’i Gasabo cyabaye intango y’ u Rwanda, ahasaga mu wa 1091.

Umuriro wa Gihanga nka kimwe mu birango by’igihugu, washushanyaga: “Uburame bw’ubwami, ubumwe bw’Abanyarwanda n’ubusugire bw’igihugu”.

Umuriro wo wagombaga guhora ucanye ubutazima, wazima umwami uriho ingoma ye igahanguka, ubusugire bw’igihugu bukavogerwa, ubumwe bw’abaturage bugahungabana.

Kugirango icyo kirango kizagire uburame n’intego yacyo itazibagirana mu Banyarwanda, Gihanga yagihayeho umurage umuhungu we Gashubi amubyaranye n’mugore we Nyirampirangwe ya Rwamba w’Umwenengwekazi.

Gashubi rikomoka ku giti kigira amahwa maremare kandi akaze mu kujombana aba ku giti bita:«Umushubi». cni se wa Gashingo wazunguye umurage wa se wo kujya yenyegeza umuriro wa Gihanga utarazimaga, Abamukomokaho ni bo biswe: «Abashingo » mu miryango y’Abanyarwanda, ubundi bakabita:«Abanyamuriro», bitewe nuko bari bashinzwe kwenyegeza uwo muriro w’ibwami ngo utazima igihugu kikazima.

Gashingo ka Gashubi ni we wahanze ubuhanga Abanyarwanda bakoreshaga ngo babone umuriro wo gucana bitaga: « URUSHINGO», rukomora izina k’umuhanzi warwo.

Uwo murimo w’ubunyamuriro w’ibwami Gashubi yawuraganywe na murumuna we basangiye nyina witwaga «Gafomo».

Icyo gihe Gihanga yabahaye abungiriza bakomoka mu basangwabutaka b’Abagesera ngo baafasha, mu rwego rwo gutangira kurema isangiranshingano mu gihugu gisangiwe nk’uko byameranyijweho mu masezerano y’i Nkotsi na Bikara ahasaga mu wa 1100.

Nta kindi giti cy’ishyamba bacanishaga uwo muriro mu mizo yambere usibye igiti cy’ UMUSHUBI cyitiriwe Gashubi ka Gihanga, usibye ko uko amateka yagendaga yigirayo mu bicanamuriro wa Gihanga hagiye hiyongeramo n’andi moko y’biti na byo bibifite amateka mu Rwanda.

M bihe by’abami bazunguye ingoma ya Gihanga, mu ngoro y’umwami uwo ari we wese habaga urugo rwubakiwe umukurambere mpangarwanda ariwe Gihanga.

Urwo rugo rukabamo ibirango byahanganwe n’u Rwanda harimo n’umuriro wa Gihanga. Ku ngomwa y’umwami Mutara I Nsoro II Semugeshi atwaye u Rwanda ahasaga mu wa 1543-1578, ni we wazanye impinduka, aca iteka ko urugo rwa Gihanga rutazajya rwimuka uko buri mwami yimuye ingoro ya.

Icyo gihe aca iteka ko urugo rwihariye rwa Gihanga rugomba kubakwa ubtimurwa i Gaseke ka Rutobwe (Ubu ni mu Kagali ka Gaseke mu Murenge wa Kayumbu wo mu Karere ka Kamonyi).

Kuva ubwo mu rugo rushya rwa Gihanga, ni ho hatangiye kubarizwa umuriro wa Gihanga hakaba intango yawo bacanaga mu kibindi kinini cyane. Abawucanaga muri ibyo bihe ni Abiru b’Abashingo bari batuye i Buhimba ( ubu ni mu Kagali ka Buhimba, mu Murenge wa Rusatira wo mu Karere ka Huye), bawucanaga mu biti by’umunyinya.

Ntiwazimaga na rimwe. Abanyamuriro bawucanaga bari Abagesera nk’abungiriza b’Abashingo nk’uko byatanzweho umurage na Gihanga, barawuvumbikaga wajya kuzima bakawucana bakuranwa.

Ibyo biti byo kuwuhembera bajyaga kubica muri Mageragere ( ubu ni mu Karere ka Nyarugenge). Wajyaga kuzima abanyarushingo bakawuhembera mu giti cy’umurinzi. Ku ngoma ya Musinga, iyo ntango yo kwa Gihanga yacanwaga n’umwiru witwaga Kimonyo ukomoka aho i Gaseke ho mu Rutobwe(Ubu ni mu Kagali ka Gaseke mu Murenge wa Kayumbu wo mu Karere ka Kamonyi).

Uwo muriro ndanga-busugire bw’ingoma y’u Rwanda waje kuzima mu wa 1936, ubwo hari ku ngoma ya Mutara III Rudahigwa, ubwo hari mu ihururu ry’izimanganya ry’ibirango by’igihugu ryakozwe n’Ababiligi. Icyo gihe wari umaze imyaka isaga 845(1091-1936) yose uwo muriro waka ubutazima.

Ubusesenguzi bw’ubwiru bw’i Rwanda n’ibimenyetso ndangamateka byakagiriwemo imitsindo itsindira igihugu, bugaragaza ko nyuma y’izima ry’umuriro wa Gihanga, u Rwanda rwahise rucwekera rusa n’uruzimye!Icyizere cyo kubaho kw’Abanyarwanda gitangira kuyoyoka, umwami Mutara III Rudahigwa wari umaze kwima ingoma bayambuye se Musinga, atangira kugenda acengana n’Ababiligi bakaganira basa n’abigana, kugeza mu wa 1949 ubwo yuzurwaga n’imwuka wo kubohora u Rwanda, ari na bwo yatinyukaga agakuraho ikiboko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .