00:00:00 IGIHE NETWORK KN KINYARWANDA EN ENGLISH FR FRANCAIS

Amayobera ku rupfu rwa Rwelekana wahamijwe kwica Dian Fossey

Yanditswe na Iradukunda Serge
Kuya 25 July 2022 saa 10:38
Yasuwe :

Kugeza n’uyu munsi abantu ntibavuga rumwe ku cyahitanye Emmanuel Rwelekana wahamijwe icyaha cyo kwica Dian Fossey ariko Leta ya Habyarimana Juvénal ikaza gutangaza ko yiyahuriye muri kasho ataragezwa imbere y’ubutabera.

Dian Fossey wakomokaga muri Leta Zunze Ubumwe za Amerika ni umwe mu bantu batanze umusanzu ukomeye kugira ngo ingagi zo muri Pariki y’Igihugu y’Ibirunga zitazimira kuko yayigezemo umubare wazo utangiye gukendera kubera ibikorwa by’ubushimusi.

Mu 1967 nibwo uyu mugore wari warahawe agatazirano ka ‘Nyiramacibiri’ yageze muri Pariki y’Ibirunga (ubu iherereye mu Kinigi mu Karere ka Musanze).

Ni icyemezo yafashe nyuma y’iminsi myinshi yari amaze yiga ku buzima bw’ingagi ndetse aza kuzigirira urukundo rudasanzwe kubera imibereho yazo itangaje.

Mu myaka yamaze mu Birunga abana n’ingagi dore ko ari naho yari afite inzu, yazivumbuyeho byinshi bigenderwaho n’uyu munsi birimo ibyo zikunda kurya, uko zibana mu miryango ndetse n’ibijyanye n’amarangamutima yazo.

Nyuma y’imyaka 18, mu gitondo cyo kuwa 27 Ukuboza 1985 mu Rwanda by’umwihariko mu yahoze ari Perefegitura ya Ruhengeri hakwirakwiye inkuru y’incamugongo y’uko uyu mugore yishwe.

Dian Fossey yasanzwe mu nzu ye yishwe afite ibikomere bitandatu mu mutwe no mu maso bigaragaza ko yatemeshejwe umupanga.

Ubujura bwahise bukurwa mu mpamvu z’ubu bugizi bwa nabi kuko amafaranga uyu mugore yari afite mu nzu abarirwa mu bihumbi by’amadorali nta wigeze ayakoraho.

Ikindi cyatumye inzego z’umutekano zicyeka ko atishwe n’abajura ni uko nta wigeze akora kuri pasiporo ye ndetse n’imbunda nto Dian Fossey yari atunze ntiyigeze yibwa ahubwo basanze irambitse hafi y’ahari haryamye umurambo we.

Mu iperereza ryakozwe byagaragaye kandi ko hanze y’inzu ya Dian Fossey hari ibirenge by’abantu babiri baraye bahagendagenda muri iryo joro yishwemo ndetse n’inzu ye yapfumuwemo umwenge.

Nyuma y’urupfu rwa Dian Fossey, inzego z’umutekano z’u Rwanda zihutiye guta muri yombi abakoranaga nawe bose barimo n’uwitwa Emmanuel Rwelekana wakoraga akazi ko kuyobora Dian Fossey mu bice bitandukanye yagendaga asura.

Nyuma y’umunsi umwe aba bakozi bose bararekuwe uretse uyu Rwelekana, kuko ibimenyetso byagaragazaga ko ariwe ushobora kuba yagize uruhare mu rupfu rw’uyu mugore cyane ko yari amaze igihe gito amwirukanye nyuma yo kutumvikana agashaka kumutema.

Nyuma y’amezi icyenda Dian Fossey yishwe, kuwa 29 Nzeri 1986 Leta y’u Rwanda yatangaje ko Rwelekana wari ugifunze yasanzwe mu buroko yapfuye, aziritse umugozi mu ijosi, ibintu Leta ya Habyarimana yahereyeho ivuga ko bikekwa ko uyu mugabo yiyahuye.

Leta y’u Rwanda yavuze ko kwiyahura kwa Rwelekana byerekana koko ko yagize uruhare mu rupfu rwa Dian Fossey.

Umwe mu barindaga aho Rwelekana yari afungiye watanze ubuhamya muri filime mbarankuru ya ‘National Geographic’ igaruka ku rupfu rwa Dian Fossey, yavuze ko nta buryo uyu mugabo yari afite bwo kwiyahura.

Yakomeje avuga ko ahubwo mbere y’amasaha make ngo bitangazwe ko yapfuye yabanje gusurwa n’abakozi ba Leta ya Habyarimana.

Ati “Njye na bagenzi banjye twakoranaga twari tubizi ko Rwelekana nta bushobozi afite bwo kwiyahura. Twabonye abakozi ba Guverinoma baza bajya mu buroko nyuma basohokana umurambo wa Rwelekana uzingiye mu bintu, baratubwira bati wa mugabo witwa Rwelekana yapfuye, umurambo barawujyana.”

Undi wagize icyo avuga ku rupfu rwa Rwelekana ni umukobwa we witwa Florida Nyiraneza.

Nyiraneza yavuze ko gushinja se urupfu rwa Dian Fossey kwari ukumurenganya kuko uyu Munyamerika yapfuye bari kumwe na se mu rugo.

Ati “Abantu baravugaga ngo ni we wamwishe kandi papa twari turi kumwe mu rugo, baraje baramutwara, batwara n’imyenda yakoranaga mu rutoki iriho n’amakakama barangije baravuga ngo ni amaraso kandi yari amakakama y’ibitoki. Kuva ubwo ntabwo twongeye kumubona.”

Kugeza ubu, umukobwa wa Rwelekana avuga ko batigeze babona umurambo wa se. Ati “Iyo bamuduha wenda tugahamba n’uwo murambo nta kibazo twari kuba dufite, wenda n’iyo tumushyingura.”

Nubwo yari yamaze gupfa, mu rubanza rwabereye mu Rukiko rwa Mbere rw’Iremezo rwa Kigali, Rwelekana yahamijwe icyaha cyo kwica Dian Fossey.

Rwelekana ntiyiyahuye?

Kugeza n’uyu munsi haracyari impaka ku makuru y’urupfu rwa Rwelekana, bamwe bavuga ko atiyahuye nk’uko byatangajwe na Leta y’u Rwanda muri icyo gihe ko ahubwo ashobora kuba yarishwe na Leta ya Habyarimana.

Dian Fossey akigera mu Rwanda yatangiye kubangamira inyungu zavaga mu bucuruzi bwa magendu bwakorwaga na Leta ya Habyarimana.

Icya mbere yabanje kwamagana ni ubucuruzi bw’ibyana by’ingagi, ubushimusi ndetse atangira no kugaragaza ubucuruzi bwa magendu bwa zahabu bwakorwaga hagati y’u Rwanda na Zaire, ubundi aya mabuye y’agaciro akanyuzwa mu birunga.

Perefegitura ya Ruhengeri ari naho haba Pariki y’Ibirunga yayoborwaga na Protais Zigiranyirazo ndetse uyu musaza wa Agathe Kanziga akaba umwe mu bangaga urunuka Dian Fossey kuko yabangamiraga ibikorwa bye.

Bivugwa ko Zigiranyirazo yajyaga avana ibyana by’ingagi muri pariki, afatanyije n’umugore w’Umubiligi wari uzwi nka Colette wabaga ku Gisenyi, bakabyohereza kubigurisha mu Bubiligi.

Umunsi umwe uyu mugambi yaje gutahurwa nyuma y’uko ibi byana by’ingagi byatewe ikinya bipakirwa indege ya ‘Sabena’ ngo bijyanwe mu Bubiligi. Indege imaze guhaguruka i Kigali yahuye n’ikibazo biba ngombwa ko isubira hasi, urugendo rurasubikwa.

Bukeye bwaho, bamwe mu bakozi bo ku kibuga cy’indege baje kumva urusaku rudasanzwe muri ya ndege ya Sabena yari igikorwa ngo ikomeze urugendo, bibatera ubwoba bahita bamenyesha Lizinde wari ushinzwe iperereza imbere mu gihugu.

Lizinde amaze kuhagera, ahashyirwa imizigo mu ndege harafunguwe basanga ni ibyana by’ingagi byakangutse bitaragera i Bruxelles, babajije nyir’uwo muzigo basanga ni wa mubiligikazi witwa Collette.

Amakuru y’uko Dian Fossey yari abangamiye Leta y’u Rwanda muri icyo gihe agaragazwa kandi n’ibaruwa y’ibanga uyu mugore yigeze kwandikira Ambasade ya Leta Zunze Ubumwe za Amerika i Kigali avuga ko mu gihe yari amaze mu birunga yatahuye byinshi mu byaha byakorwaga na Leta y’u Rwanda.

Ibi byose ngo byatumye Leta ya Habyarimana itangira gucura umugambi wo kumwivugana, nubwo nta makuru ahamye yemeza koko ko Rwelekana ari we waba warakoreshejwe muri uwo mugambi nyuma na we bikaza kumuviramo kwicwa.

Umuhango wo guherekeza Dian Fossey wabereye muri Pariki y'Igihugu y'Ibirunga aho anashyinguye kugeza n'uyu munsi
Aha niho Dian Fossey yabaga ari naho yaje kwicirwa
Nyuma y'igihe inzu ya Dian Fossey yaje gusenyuka, aho yahoze ni hamwe mu hasurwa na ba mukeragendo bagenderera Pariki y'Igihugu y'Ibirunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .