00:00:00 IGIHE NETWORK KN KINYARWANDA EN ENGLISH FR FRANCAIS

Amaraso n’icyuya by’Abanyafurika, isoko y’ubuhangange n’ubukire bw’u Burayi na Amerika

Yanditswe na Léana Bisa
Kuya 27 May 2022 saa 07:33
Yasuwe :

U Burayi na Amerika ni imigabane ibarizwaho ibihugu benshi byateye imbere mu buryo butangaje. Urebye ku byo amateka atubwira ko iyi migabane yegezeho, byinshi byitirirwa abazungu ariko icyo abavuga aya mateka birengagiza ni uko byubakiwe ku maraso y’Abanyafurika.

Mu gihe cy’ubucakara abazungu bagiye bagura ndetse bagatwara Abanyafurika bakabajyana mu bihugu byabo kubakoresha imirimo y’agahato cyangwa se uburetwa.

Mu Banyafurika bagiye batwarwa bamwe bagiye bapfira mu mato babatwaragamo abandi bakiyahura bapfira mu mazi, abandi babageza mu bihugu bitandukanye.

Uburetwa ntibuzibagirana cyane cyane ku Banyafurika ndetse n’urubyaro rukomoka ku bantu batwawe mu buretwa mu bihugu by’amahanga kuko ari imirimo yagaragajwemo ubugome bukabije ndetse n’urwango abanyamahanga bagiriraga Abanyafurika kugeza na n’ubu aho hari aho bikigaragara.

Uretse n’abatwawe mu buretwa abasigaye mu bihugu byabo basigaye mu bukoloni, ntibari borohewe kuko basigaye bakoreshwa imirimo y’agahato.

Iyo mirimo rero y’agahato yagiye ikorwa n’abacakara ndetse n’Abanyafurika igaragaza uruhare Abanyafurika bagize mu guteza imbere imigabane yindi.

Nubwo bitajya byemerwa, iterambere ry’u Burayi ntabwo ryari rishingiye ku bikorwa by’Abanyaburayi gusa, ahanini byari Abanyafurika kuko u Burayi bwubatswe ku mubano w’ubukungu na politiki bwari bufitanye na Afurika ndetse n’umuruho w’abana bayo.

Uwo mubano niwo watumye habaho ubucuruzi bukomeye harimo ubw’amabuye y’agaciro ndetse n’ibindi bicuruzwa bitandukanye.

Abari munsi y’ubukoloni bakoreshwaga imirimo yo gucukura amabuye y’agaciro batayabona bikabaviramo urupfu cyangwa gukatwa ingingo.

Dufashe urugero nka Congo yagize uruhare runini cyane mu bukungu bw’u Bubiligi, mu kinyejana cya 19 muri 1885 ubwo Umwami w’u Bubiligi Leopold II yafashe Congo nk’umutungo we bwite agakoresha imirimo y’agahato abanye Congo.

Ibi ntibyari bisanzwe kuko uyu Mwami atafashe Congo nk’igihugu kiri mu bukoloni ahubwo yagifashe nk’umutungo we bwite biba intandaro yo gukora ibyo ashatse byose.

Ubutegetsi bwa Leopold II wiswe ‘the butcher of Congo’ bwari bwuzuye kumeneka kw’amaraso ku buryo byaje kwamaganwa n’abandi bakoloni b’i Burayi mu 1908.

Ariko icyo gihe uyu Mwami yari yarangije kwambura Abanye-Congo ibyo bari bafite byose ndetse n’ubuzima bwabo, kuko iyo mirimo y’agahato yo gucukura zahabu, ifeza ndetse n’andi mabuye y’agaciro byabaviragamo urupfu n’itotezwa.

Ikirenzeho ni uko iyo batatangaga umusaruro abazungu bifuza batabatotezaga gusa ahubwo banibasiraga imiryango yabo kugeza babonye icyo bashaka.

Ubwo bukungu bwose bwa Congo nibwo bwakoreshejwe mu kubaka ubukungu bw’u Bubiligi mu gihe cya Leopold II ndetse na nyuma ye kuko bakoreshaga ibyo bakuye muri Congo bakabigurisha ku isoko mpuzamahanga.

Si na Congo gusa ahubwo ibindi bihugu nka Ghana na Guinea byakijije bimwe mu bihugu byo mu Burayi birimo Portugal n’ibindi kubera amafaranga bungukaga mu bucuruzi bw’imitungo bakuye mu bihugu bya Afurika.

Ibihugu nk’a Portugal byaje kumenyekana cyane nk’ibyungukira mu buretwa kuko bahigaga bakanagurisha Abanyafurika mu bindi bihugu.

Amateka yerekana ko ibihugu nka Porutugal n’u Bwongereza byari byiganjemo cyane ubucuruzi bw’Abanyafurika kandi uburetwa bwari butangiye kugaragara nk’isoko ryinjiza amafaranga cyane kurusha na zahabu.

Kuko icyo gihe, uburetwa bwari bwantangije ubukungu bushingiye ku buhinzi, abashakashatsi ndetse n’abanditsi benshi bagaragaza ko ibihugu byinshi i Burayi byatangiye kungukira cyane mu buretwa n’ubuhinzi.

Abacakara bakoreshejwe imirimo yo guhinga isukari, itabi, ipamba n’ibindi bihingwa mu mirima myinshi itandukanye kuko hari ubutaka bunini ariko abo kubihinga ntabo.

Binyuze mu iterambere ry’ubuhinzi hamwe n’ubucuruzi bw’itabi, ikawa, cacao, umuceri n’isukari ibyinshi bikaba byaravaga muri Afurika umubano wagashinyaguro w’ibihugu by’i Burayi na Afurika watumye havuka ubukungu bw’Isi yose.

Si n’u Burayi gusa ahubwo na Amerika niko byagenze, ubushakashatsi bugaragaza ko Abanyafurika bajyanywe muri Amerika barenga miliyoni 12.

No muri Amerika abacakara bakoreshwaga nk’i Burayi, ibikorwa byabo byose nibyo byatumye habaho iterambere ry’inganda kuko aribo bajyanywe kuzikoramo cyane ko ari na bo bahingaga ibyakoreshwagamo.

Ubucuruzi bwarazamutse bityo ubukungu bwa Amerika burazamuka na bwo cyane cyane kubera Haiti na Cuba kuko ariho abajyanywe mu buretwa benshi bashyirwaga.

N’iyo urebye ibikorwaremezo byo muri Leta Zunze Ubumwe za Amerika usanga Abanyafurika bajyanywe mu buretwa barabigizemo uruhare, dufashe urugero nka White house, US capitol na University of Virginia.

Usanga ibi byose bifite agaciro gakomeye mu mateka ya Amerika ariko ni gake cyane havugwamo abacakara babyubatse.

Hari amateka menshi agaragaza uruhare rwa Afurika mu iterambere ry’Isi turimo uyu munsi ariko ibi byose ntibipfa kuvugwa cyangwa kugaragazwa mu nyigisho zitandukanye.

Ahubwo ibyigishwa ni uburyo u Burayi na Amerika ari imigabane ikomeye kandi yabereyemo amateka akomeye, ni na byo byigishwa mu bigo byacu muri Afurika, ntihagaragazwa ko Abanyafurika bagize uruhare runini cyane mu guteza imbere Isi.

Bikwiriye rero kwigishwa ndetse no kugaragazwa mu buryo burambye uko umugabane wa Afurika wagize uruhare mu kugeza Isi aho igeze ubu.

Abirabura bagurwaga igiciro gihenze cyane kuko abaguzi babonaga inyungu zo kubakoresha
Abana bato bamburwaga ababyeyi bagatwarwa mu mato bajya gucuruzwa
Muri Congo abari munsi y'ubukoloni bw'Ababiligi batotejwe nabi ndetse n'imiryango yabo
Ubukungu bw'u Burayi ahanini bwavuye mu mitungo yavanywe muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .