Virgin Orbit yohereje satellite mu isanzure yifashishije indege zisanzwe

Yanditswe na Ndahayo Emmanuel
Kuya 18 Mutarama 2021 saa 09:23
Yasuwe :
0 0

Ikigo cya Virgin Orbit cyohereje satellite mu isanzure cyifashishije indege zisanzwe, igikorwa cyongeye gutanga icyizere cy’uko ikoranabuhanga rizatuma abantu boroherwa no kugera mu isanzure rikomeje gutera imbere mu buryo bwihuse.

Virgin Orbit yifashishije indege yo mu bwoko bwa Boeing 747 yahagarutse California ifite ‘rocket’ yitwa ‘LauncherOne’ munsi yayo. Iyo rocket nayo yari ifite twa satellite duto ijyanye mu isanzure.

Igeze hejuru y’inyanja ya Pacifique, LancherOne yaje kurekurwa igendera ku muvuduko wa kirometero 27 358 ku isaha, umuvuduko wari uhagije ku buryo yatangiye urugendo rwo kwinjira mu isanzure ry’Isi.

LauncherOne yari ifite twa satellite duto tw’Ishami rya NASA rishinzwe kwiga satellite ntoya, rizwi nka ELaNa. Izo satellite nazo ziba zakusanyijwe mu mashuri makuru na kaminuza, aho ELaNa itoranya satellite zishingiye ku bitekerezo by’ubushakashatsi mu isanzure, maze ikazigura ikazohereza mu isanzure.

Nyuma y’amasaha ane, izi satellite zaje kugera mu isanzure, ndetse Virgin Orbit yavuze ko buri imwe yageze mu cyerekezo yagombaga kugeramo ndetse yatangiye inshingano zayo.

Nyuma y’uko iki gikorwa kigenze neza, byitezwe ko Virgin Orbit izakoresha ubu buryo bwo kohereza satellite mu isanzure yifashishije indege, aho bamwe mu bakiliya bamaze kugaragaza ubushake bwo gukorana nayo barimo NASA, igisirikari cya Amerika ndetse n’ibigo byigenga bikoresha amakuru bihabwa na satellite mu nyungu z’ubucuruzi.

Ubusanzwe, kohereza satellite na rocket mu isanzure ni igikorwa kigoye cyane kandi gitwara igihe kinini ndetse n’amafaranga menshi. Byitezwe ko ubu buryo bwa Virgin Orbit buzoroshya cyane iki gikorwa, ku buryo isanzure rishobora kuzagerwamo mu buryo bworoshye, yaba mu bikorwa by’ubushakashatsi ndetse no mu bikorwa byo kurigezamo abantu.

Virgin Orbit ibaye ikigo cya gatatu cyigenga kimaze gutangira ibikorwa by’ubushakashatsi bugamije ubucuruzi mu isanzure, nyuma ya SpaceX na Rocket Lab. Leta Zunze Ubumwe za Amerika zamaze gushyira ibikorwa byo mu isanzure mu by’ibanze bigomba kwitabaho cyane, mu kimeze nk’intambara hagati yayo, u Burusiya n’u Bushinwa aho buri gihugu kirajwe ishinga no kuyobora ibindi mu bijyanye n’ubuhanga mu by’isanzure.

Virgin Orbit yohereje rocket mu kirere yifashishije indege zisanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .