Vanuatu yatakaje agahigo ku kuba mu bihugu mbarwa bitarageramo Coronavirus

Yanditswe na Rosine Ingabire
Kuya 11 Ugushyingo 2020 saa 07:21
Yasuwe :
0 0

Vanuatu yavuye mu mubare w’ibihugu mbarwa bitarageramo icyorezo cya Coronavirus nyuma y’amezi umunani icyo cyorezo gica ibintu hirya no hino ku Isi.

Kuri uyu wa Gatatu tariki 11 Ugushyingo 2020, inzego z’ubuzima muri icyo kirwa giherereye mu Nyanja ya Pacifique, zatangaje ko habonetse umurwayi wa mbere wa Coronavirus, umusore w’imyaka 23 wari uvuye muri Leta Zunze Ubumwe za Amerika.

Ushinzwe Ubuzima muri Vanuatu, Len Tarivonda, yavuze ko uwo musore yapimwe nyuma y’iminsi itanu yari amaze mu kato.

Yasabye abaturage kudahungabana kuko uwo musore yaje mu ndege ari ahantu ha wenyine, dore ko bamukekaga kubera ko yari avuye ahantu havugwa ubwandu bwinshi bwa Coronavirus.

Akigera muri Vanuatu, ngo yubahirije inama zose zitangwa n’abaganga ku buryo ntawe bakeka ko yaba yaranduje.

Vanuatu yafunze imipaka muri Werurwe uyu mwaka, mu rwego rwo kwirinda ko hari icyorezo kihagera. Mu minsi ishize nibwo icyo gihugu cyatangiye gufungurira ingendo z’indege zitwaye abaturage bacyo bashaka gutahuka.

Vanuatu ni kimwe mu bihugu by’ibirwa bike ku Isi byabarwaga nk’ibitarageramo Coronavirus. Kuri ubu ibifatwa nk’ibisigaye bitarageramo icyo cyorezo harimo Kiribati, Micronesia, Nauru, Palau, Samoa, Tonga na Tuvalu.

Kugeza ubu abantu basaga miliyoni 51.3 bamaze kwandura Coronavirus ku Isi. Abagera kuri miliyoni 1.3 barapfuye nkuko bitangazwa n’imibare ya John Hopkins University

Hari hashize amezi umunani nta murwayi n'umwe wa Coronavirus uraboneka muri Vanuatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .