USA: Yiturikirijeho igisasu anitwikira mu modoka ngo azahore yibukwa

Yanditswe na Dufitumukiza Salathiel
Kuya 29 Ukuboza 2020 saa 11:10
Yasuwe :
0 0

Byatangajwe ko Anthony Quinn Warner witurikirijeho igisasu mu mujyi wa Nashville muri Amerika kuri Noheli, yaba yarashakaga ko izina rye rizajya rihora ryibukwa.

Uyu mugabo w’imyaka 63 y’amavuko, ngo ku wa 25 Ukuboza uyu umwaka yafashe imodoka ye asanzwe aniberamo atembera muri uwo mujyi, mu gihe abandi bari bibereye mu birori bya Noheli.

Muri uko gutembera, iyo modoka yagendaga icuranga amajwi aburira abantu ko hafi aho hashobora kuba hagiye guturikira igisasu, ko bashaka uko bahava.

Nyuma y’ayo majwi ngo yacuranze indirimbo ya Petula Clark yitwa “Downtown” ivuga ko gutembera mu mujyi wishimye bishobora kuvura ibibazo by’ubwigunge.

Bamwe mu bumvise ayo majwi basohotse mu nyubako zihegereye baragenda. Mu gihe gito amaze gucuranga ayo majwi, nibwo igisasu cyaturitse. Amaze guturitsa igisasu, Warner yitwikiye mu modoka ye ahita apfa.

Abantu umunani nibo bakomerekejwe n’icyo gisasu ariko bajyanwa ku bitaro baza gusezererwa, ndetse hangirika inyubako zisaga 40 zirimo n’iya AT&T itanga serivisi za internet muri ako gace.

Mu iperereza Urwego rw’Ubugenzacyaha (FBI) ruri gukora ngo hamenyekane impamvu yateye Warner guturitsa icyo gisasu, abaturanyi n’inshuti ze barimo kubazwa icyo babiziho.

Umwe mu baturanyi be umuzi kuva mu 2010 yabwiye FBI ko ubwo yaherukaga kuganira na Warner mu misi ibiri mbere y’uko apfa, yamubajije impano azasaba Père Noël, undi amusubiza ko ikizaba kuri uwo munsi ari uko izina rye rizamamara muri Nashville.

Yavuze ko we yaketse ko “rizamamazwa n’ibikorwa byiza” azaba yakoze kuko atamuhishuriye uko azabigenza.

Ati “Yarambwiye ati ngiye kuba icyamamare cyane. Ngiye kuba icyamamare ku buryo Nashville itazigera inyibagirwa.”

Ku rundi ruhande ariko ngo se wa Warner yigeze gukoreraho ikigo cya AT&T, hakaba hari gusuzumwa niba iyo nayo idashobora kuba impamvu yaba yaramuteye kuza guturikiriza igisasu hafi y’icyo kigo.

Iperereza ryerekanye ko Anthony Quinn Warner ari we waturikije igisasu mu mujyi wa Nashville

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .