USA: Umucamanza yanze guhagarika isohoka ry’igitabo cy’uwari umujyanama wa Trump

Yanditswe na IGIHE
Kuya 20 Kamena 2020 saa 08:14
Yasuwe :
0 0

Umucamanza wo muri Leta zunze Ubumwe za Amerika yanze guhagarika isohoka ry’igitabo cya John Bolton wahoze ari umujyanama mu by’umutekano w’igihugu wa Perezida wa Leta Zunze Ubumwe za Amerika Donald Trump.

Mu mwanzuro yatangaje kuri uyu wa Gatandatu, umucamanza Royce Lamberth yavuze ko Bolton ‘yashyize umutekano w’igihugu mu kaga’, ariko ngo Guverinoma ntiyabashije kugaragaza ko kubuza igitabo gusohoka hari icyo byakemura.

Bivugwa ko kopi nyinshi z’igitabo The Room Where It Happened cya Bolton zamaze gufotorwa, ndetse zizatangira gucuruzwa ku wa Kabiri. Ni igitabo agaruka kuri Trump by’umwihariko nk’umugabo ifatwa ry’ibyemezo bye ryakomeje kugusha ku gutsindira manda ya kabiri mu Ugushyingo, hamwe n’ibindi bimugaragaza nk’umuntu udashoboye.

Ni igitabo Trump yakomeje kuvuga ko cyuzuyemo ibinyoma n’inkuru mpimbano.

Abanyamategeko ba leta bavugaga ko Bolton yarenze ku mabwiriza nk’umuntu wahoze mu buyobozi, ko mbere yo gutangaza igitabo ku makuru yagejejweho n’umwanya yashyizwemo yagombaga kugitanga kikabanza gusuzumwa, harebwa niba nta makuru y’ibanga ashaka gushyira hanze.

Gusa abanyamategeko ba Bolton babyamaganiye kure, bavuga ko ibigikubiyemo byagenzuwe, ahubwo icyateje ibibazo ari uko Trump atishimiye ibigikubiyemo.

Umucamanza Lamberth yagize ati "Mu kwiyemeza gusohora igitabo cye atabanje kubona uruhushya rwa nyuma rw’inzego z’igihugu z’ubutasi, Bolton ashobora kuba yarateje igihugu ikibazo kidashobora gusibanganywa."

"Ariko mu gihe kiyobowe na internet, na kopi nke cyane zasakaye zishobora kwangiza icyizere. Umuntu umwe afite igitabo, abishatse ashobora kugeza kure cyane ibikirimo bikarenga aho agurira ikawa. Hamwe na kopi ibihumbi magana zageze hirya no hino ku isi – nyinshi ziri mu bitangazamakuru - ibyangiritse byangiritse. Nta garuriro bigifite.”

Nyuma y’umwanzuro w’urukiko, Trump yavuze ko uyu mugabo yashyize hanze amakuru menshi yagombaga kugirwa ibanga, bityo ko “agomba kubyishyura igiciro kinini cyane.”

Yabaye nk’uwemera ko ntacyo byari bikimaze kubuza iki gitabo gusohoka, “kuko bisa n’aho cyamaze kujya hanze ndetse ibigikubiyemo byageze ku bantu benshi barimo n’itangazamakuru, nta kindi umucamanza wubashywe yari gukora mu kugihagarika.”

Gusa ngo ibyemejwe bijyanye nacyo birimo kurenga ku mabwiriza agenga amakuru y’ibanga Bolton yatangaje, “hari ikiguzi kinini kigomba gutangwa”.

Yakomeje ati “Akunda kugusha ibisasu ku bantu, akabahitana. Ubu noneho nawe ibisasu bigiye kumugwaho!”

Bimwe mu bigaruka kuri icyo gitabo, bishingiye ku biganiro bwite Perezida Trump yagiranye n’abarimo mugenzi we w’u Bushinwa, Xi Jinping, ku buryo ngo bigoye kugenzura ukuri kwabyo.

Harimo ko Trump yasabye Xi Jinping ubufasha kugira ngo azabashe gutsinda amatora y’uyu mwaka. Ngo Trump yamwijeje ko abahinzi bo muri Amerika bazohereza ku bwinshi mu Bushinwa umusaruro ukomoka ku buhinzi nk’uwa soya n’ingano mu gihe cy’amatora.

Bolton yavuze ko Xi yabyemeye, yizeza ko ibijyanye n’umusaruro w’ubuhinzi aribyo bikwiriye kuza imbere mu biganiro by’ubucuruzi, Trump amusubiza amubwira ko ari we muyobozi udasanzwe mu mateka y’u Bushinwa.

Harimo kandi ko Trump yashakaga kugira uruhare mu bikorwa ry’iperereza ku byaha, “hagamijwe gufasha abanyagitugu yikundira”, aho ngo yashakaga gufasha Perezida Recep Tayyip Erdogan wa Turikiya mu kibazo kirebana n’ikigo cyo muri icyo gihugu.

Uyu muyobozi wa Amerika kandi ngo yavuze ko gutera Venezuela byaba byiza ndetse ko icyo gihugu cyo muri Amerika y’Epfo ari igice cya Leta Zunze ubumwe za Amerika.

Hanavugwamo ko ngo Trump atari azi ko u Bwongereza ari igihugu gikomeye mu bijyanye n’ingufu za nucleaire, ndetse ngo yigeze kubaza umwe mu bajyanama be niba Finland ari igice cy’u Burusiya.

John Bolton yahoze ari umujyanama wa Trump mu bijyanye n'umutekano w'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .