USA: Ubwumvikane buke muri White House ku muti wa Coronavirus

Yanditswe na IGIHE
Kuya 6 Mata 2020 saa 01:36
Yasuwe :
0 0

Ubwumvikane buke muri Leta Zunze Ubumwe za Amerika, burakomeje hagati y’abashakashatsi barimo gusuzuma niba hydroxychloroquine isanzwe ikoreshwa mu kuvura malaria yakwifashishwa mu kuvura icyorezo cya Coronavirus na bamwe mu bajyanama ba Perezida Donald Trump.

Ni ubwumvikane buke bushingiye ku ruhande rw’Umujyanama wa Perezida Trump, Peter Navarro, wakomeje gushyira igitutu ku bashakashatsi ku ikoreshwa rya hydroxychloroquine mu kuvura Coronavirus kandi uyu muti utaremezwa bya gihanga.

Impaka ntabwo ari nshya imbere mu itsinda rishinzwe gukurikirana ibikorwa byo kurwanya Coronavirus, aho impuguke mu by’ubuvuzi zasobanuriye Perezida Trump inshuro nyinshi ko hashobora kuzabaho ibibazo kubera gukomeza kuvuga neza hydroxychloroquine, igihe byazagaragara ko itavura Coronavirus.

Navarro kugeza ubu ntabwo ari umwe mu bagize itsinda rishinzwe gukurikirana Coronavirus, ariko yakomeje kwitabira inama z’iryo tsinda.

Ikinyamakuru Axios cyabanje gutangaza amakuru ku kutumvikana imbere muri White House ku byerekeye uyu muti. Ubwo baganiraga n’abanyamakuru ku ntambwe imaze guterwa kuri hydroxychloroquine, Navarro yamaganye Dr. Anthony Fauci wasabye kwitondera uwo muti nk’uko umuntu wabikurikiranye yabitangarije CNN.

Navarro ngo yari yitwaje impapuro nyinshi zigaruka kuri uwo muti, avuga ko bigaragaza ko ushobora gukora mu kuvura Coronavirus. Gusa Fauci, impuguke mu kurwanya ibyorezo, yabyamaganye avuga ko atari ibimenyetso bya gihanga.

Amakuru avuga ko Fauci atarava ku myemerere ye ko hydroxychloroquine atari umuti wemejwe wa Ccoronavirus ndetse azakomeza kugaragaza ibitekerezo bye.

Ni mu gihe uwo muti biheruka kwemezwa ko utangira kugeragezwa, ukavangwa na Azithromycin.

Hari n’ababwiye CNN ko nubwo ukutumvikana kuri hagati ya Fauci na Navarro, Fauci akomeje kugirana umubano mwiza na Trump na Visi Perezida Pence, nubwo bamwe mu bakozi batewe inkeke n’uku kutavuga rumwe.

Ku rwego mpuzamahanga abamaze kwandura Coronavirus ni miliyoni 1.2, abamaze gupfa ni ibihumbi 70. Muri Leta Zunze Ubumwe za Amerika abanduye ni ibihumbi hafi 337, abamaze gupfa ni 9620.

Fauci na Navarro ntibavuga rumwe ku ikoreshwa rya hydroxychloroquine mu kuvura Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .