USA: Nubwo coronavirus imeze nabi, Trump yavuze ko ubucuruzi buzafungurwa vuba

Yanditswe na Ferdinand Maniraguha
Kuya 25 Werurwe 2020 saa 09:25
Yasuwe :
0 0

Perezida wa Leta Zunze Ubumwe za Amerika, Donald Trump yavuze ko abakozi bakwiriye gusubira mu kazi vuba, ubucuruzi bugafungurwa bitarenze tariki 12 Mata uyu mwaka, nubwo igihugu cye gihanganye n’icyorezo cya coronavirus gikomeje guhitana benshi.

Inzego z’ubuzima, ba guverineri b’intara n’abandi bayobozi muri icyo gihugu, bagaragaje kutemeranya na Trump kuri icyo cyifuzo kuko gihabanye n’ingamba zo guhashya coronavirus zashyizweho.

Kuwa Mbere, Trump yavuze ko kuba abantu bari mu ngo zabo mu rwego rwo kwirinda coronavirus biri guhombya igihugu cye miliyari nyinshi z’amadolari.

Yagize ati “Amerika vuba aha izongera ifungure ubucuruzi. Vuba cyane , mbere y’amezi atatu cyangwa ane numvise abantu bavuga. Ntabwo twatuma igisubizo kiba kibi cyane kurusha ikibazo ubwacyo.”

Kuri uyu wa Kabiri ubwo yari kuri televiziyo ya Fox News, Trump yavuze ko icyifuzo cye ari uko ubucuruzi bwongera gukora bitarenze kuri Pasika, ni ukuvuga tariki 12 Mata.

Abashinzwe ubuzima muri Amerika n’abandi bayobozi, bagaragaje ko igikwiriye ari uko abaturage baguma mu ngo zabo bakareka kujya mu bikorwa bituma begerana kuko bishobora gutuma abarwayi baba benshi, ubushobozi bwo kubitaho bukabura, umubare w’abapfa ukiyongera.

Dr Anthony Fauci, Umuyobozi w’ikigo gishinzwe indwara zandura yagize ati “Ibyo Perezida ari kugerageza gukora , ni ukugereranya ibibazo by’ubuzima n’ingaruka biri kugira ku bukungu, ku buryo ahubwo byateza ibibazo bikomeye ku rwego rw’ubuzima.”

Fauci yavuze ko ibiganiro bikomeje hagati y’inzego zitandukanye kugira ngo harebwe igihe nyacyo cyo gusubiza abaturage mu kazi bitabangamiye inzego z’ubuvuzi.

Umuyobozi mu biro bya Trump ushinzwe Ibiza, Pete Gaynor yavuze ko ingamba zashyizweho zo kugumisha abaturage mu ngo ziri gutanga umusaruro, ku buryo binabaye ngombwa ko zivanwaho byakorwa n’abashinzwe ubuzima aho kuba abayobozi basanzwe.

Kugeza kuri uyu wa Kabiri, abantu 53 000 nibo bari bamaze kwandura coronavirus muri Leta Zunze Ubumwe za Amerika mu gihe abasaga 700 imaze kubahitana.

Trump yavuze ko kuba ibikorwa by'ubucuruzi bifunze biri guhombya igihugu amafaranga menshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .