FDA yemeje urukingo rukwiriye gukoreshwa mu gukingira ’Monkeypox’

00:00:00 IGIHE NETWORK

KINYARWANDA

ENGLISH

FRANCAIS

FDA yemeje urukingo rukwiriye gukoreshwa mu gukingira ’Monkeypox’

Yanditswe na Nshimiyimana Jean Baptiste

Kuya 30 August 2024 saa 10:15

Yasuwe :

Yavuzweho:

Ikigo cya Leta Zunze Ubumwe za Amerika gishinzwe kugenzura imiti n’ibiribwa (FDA) cyemeje ko urukingo rwa ACAM2000 rusanzwe rukoreshwa mu kwirinda ‘smallpox’ rushobora guterwa abantu bo mu bihugu byibasiwe n’Ubushita bw’Inkende.

Ikigo ‘Emergent BioSolutions’ cyakoze uru rukingo, cyatangaje kuri uyu wa Kane ko US FDA yemeje ko rwatangwa aho ubushita bw’inkende bwibasiye abantu.

Hashize igihe gito Ishami ry’Umuryango w’Abibumbye ryita ku Buzima, OMS, ritangaje ko Ubushita bw’Inkende ari icyorezo gihangayikishije Isi n’ubwo ibice cyibasiwe cyane ari ibya Afurika, by’umwihariko Repubulika Iharanira Demokarasi ya Congo n’ibihugu bituranye.

Emergent BioSolutions’ yari yasabye OMS kwemeza ikoreshwa ry’urukingo rwayo mu guhangana n’Ubushita bw’Inkende ndetse yemera guhita iha RDC n’ibindi bihugu nka Kenya, u Rwanda, u Burundi na Uganda impano y’inkingo ibihumbi 50 hagamijwe guca intege ikwirakwira ry’iki cyorezo.

Ikigo cya Amerika gishinzwe kurwanya no gukumira ibyorezo (CDC) cyavuze ko ingaruka z’urukingo rwa ACAM2000 ku buzima bw’uruhawe zifite ubukana buke cyane ugereranyije n’urwa Bavarian Nordic A/S na Jynneos rwemejwe muri Amerika ko rwakoreshwa mu guhangana na smallpox ndetse n’ubushita bw’inkende.