USA: Bidasubirwaho byemejwe ko Biden yatsinze amatora ya Perezida

Yanditswe na Bukuru JC
Kuya 15 Ukuboza 2020 saa 07:06
Yasuwe :
0 0

Itsinda ry’abantu bashinzwe kwemeza ibyavuye mu matora y’Umukuru w’Igihugu muri Leta Zunze Ubumwe za Amerika rizwi nka ‘Electoral College’ ryemeje bidasubirwaho ko Joe Biden ari we watsinze amatora ya Perezida yabaye tariki 3 Ugushyingo uyu mwaka.

Ni icyemezo cyari gitegerejewe na benshi nyuma y’iminsi Perezida Donald Trump avuga ko atemera ibyavuye mu matora, kuko ngo habayemo uburiganya.

Biden yatsinze ku majwi 306 y’abatora mu gihe Trump bari bahanganye yagize amajwi 232.

Associated Press yatangaje ko nta cyahindutse mu byo abaturage ba buri Leta bagiye batora n’ibyo ababahagarariye muri Electoral college batoye.

Abagize aka kanama uko ari 538 (buri Leta igira umubare w’abayihagararira, udashobora kujya munsi ya batatu) barongera bagatora by’umuhango ubundi bagasinya impapuro zemeza ko uwatowe ari we watsinze koko, ubundi zikoherezwa mu Nteko Ishinga Amategeko ya Amerika.

Mu majwi asanzwe y’abaturage, Biden yarushije Trump amajwi agera kuri miliyoni zirindwi.

Biden yavuze ko ari intsinzi ikomeye kuri we ndetse n’umuhate w’igihugu cye wo kubahiriza amategeko na demokarasi. Yavuze ko azaba Perezida w’Abanyamerika bose baba abamutoye n’abatamutoye, ashyira imbere kuzahura ubukungu no kurwanya Coronavirus.

Ntabwo Trump yagize icyo atangaza ku cyemezo cy’abagize Electoral College gusa hashize iminsi avuga ko ababajwe n’uburyo Amerika igiye kuyoborwa n’umuyobozi utaratowe.

Akanama gashinzwe kwemeza ibyavuye mu matora ya Amerika kemeje ko Biden yatsinze bidasubirwaho (Ifoto: Gerald Herbert , Associated Press)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .