USA: Abamaze kwicwa na Coronavirus barenze 150 000

Yanditswe na Ferdinand Maniraguha
Kuya 30 Nyakanga 2020 saa 09:37
Yasuwe :
0 0

Abantu basaga 150 000 nibo bamaze kwicwa na Coronavirus muri Leta Zunze Ubumwe za Amerika mu gihe abandura nabo bakomeje kwiyongera.

Amerika niyo iri imbere mu kugira umubare munini w’abamaze kwicwa na Coronavirus kuko kuri uyu wa Gatatu imibare ya Johns Hopkins University yagaragazaga ko hamaze gupfa abantu 150034 mu gihe abamaze kwandura basaga miliyoni 4.3.

Coronavirus yahagaritse amaraso ya benshi mu banyamerika dore ko ubushomeri muri icyo gihugu bwazamutse bukaba bungana na 11 % nk’uko imibare yo muri Kamena ibigaragaza.

Umubare w’abandura utangiye kwiyongera nyuma y’uko Leta zimwe na zimwe zoroheje amabwiriza yo kwirinda , utubari, utubyiniro, inzu ndangamurage n’ibindi bikongera gufungura.

Amashuri nayo ari kurwana no kwitegura no gushyiraho uburyo bwo kwirinda icyorezo kugira ngo yongere afungure imiryango.

Inzobere zo muri Johns Hopkins University zagaragaje ko Amerika ntacyo iri gukora gihambaye mu guhashya icyorezo ndetse basaba ko bibaye ngombwa ingamba zashyizweho zo kwirinda zasubirwamo hagafatwa inshya.

Umuntu wa mbere yahitanywe na Coronavirus muri Amerika tariki 29 Gashyantare uyu mwaka. Nyuma y’iminsi 54, ni ukuvuga tariki 23 Mata abantu ibihumbi 50 bari bamaze guhitanwa n’icyo cyorezo. Mu yindi minsi 34, ni ukuvuga tariki 27 Gicurasi umubare w’abahitanwe nayo wari umaze kuba ibihumbi 100 , none nyuma y’iminsi 63 hiyongereyeho abandi ibihumbi 50.

Mu minsi 63 ishize, abantu basaga ibihumbi 50 bamaze kwicwa na Coronavirus muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .