USA: Aba mbere bashobora guhabwa urukingo rwa Covid-19 mu byumweru bitatu biri imbere

Yanditswe na Bukuru JC
Kuya 22 Ugushyingo 2020 saa 10:48
Yasuwe :
0 0

Gahunda yashyizweho mu kwihutisha ikorwa ry’urukingo rwa Coronavirus muri Leta Zunze Ubumwe za Amerika, Operation Warp Speed, yagaragaje ko abantu ba mbere muri icyo gihugu bashobora gutangira gukingirwa bitarenze tariki 11 Ukuboza 2020.

Dr. Moncef Slaoui, umwe mu bayoboye iyo gahunda, kuri iki Cyumweru yagize ati “Mu masaha 24 urukingo rwemejwe, ruzatangira kugezwa ahantu hatandukanye buri Leta izaba yatumenyesheje ko turugeza.”

Biteganyijwe ko abajyanama b’ikigo gishinzwe imiti n’ibiribwa muri Amerika bazaterana tariki 10 Ukuboza, baganira ku kuba bakwemerera ikoreshwa ry’urukingo ruherutse gushyirwa hanze na sosiyete Pfizer ifatanyine na BioNTech.

Igerageza ryakozwe kuri urwo rukingo ryagaragaje ko rwizewe ku kigero cya 95 % kandi ko abarufashe nta ngaruka rubagiraho. Pfizer itangaza ko nibura uyu mwaka uzajya gushira imaze gushyira hanze inkingo miliyoni 25.

Slaoui yavuze ko muri Amerika, urukingo ruzatangwa hagendewe ku batuye buri Leta, hanyuma za Leta akaba ari zo zigena abagomba kurufata mbere.

Yavuze ko kugira ngo bizere ko igihugu gitekanye, ari uko nibura kugeza mu mpera za Gicurasi 2021, abatuye Amerika 70 % baba bamaze gukingirwa.

Abanyamerika ba mbere bashobora guhabwa urukingo rwa Coronavirus mu byumweru bitatu biri imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .