Urukingo rwa AstraZeneca rwatanze icyizere cyo gutsinda COVID-19

Yanditswe na Uwimana Abraham
Kuya 28 Ukuboza 2020 saa 07:12
Yasuwe :
0 0

Urukingo rwa COVID-19 rwakozwe n’Ikigo cya AstraZeneca na Kaminuza ya Oxford rwagaragaje ko rutanga icyizere kiri hejuru cyo gutsinda icyorezo cya COVID-19.

Umuyobozi wa AstraZeneca, Pascal Soriot, yavuze ko mu igenzura riheruka gukorwa n’ibigo byigenga byo mu Bwongereza bishinzwe kugenzura imiti, byagaragaye ko uru rukingo rushobora kurinda ku kigero cya hafi 100% ibimenyetso bya COVID-19 bishobora kujyana umuntu mu bitaro.

Yavuze ko yizera ko iri genzura rizerekana ko uru rukingo rutanga icyizere ku kigero kimwe n’izamaze kwemezwa nk’urwa Pfizer-BioNTech rwizewe ku kigero cya 95% n’urwa Moderna rwizewe ku kigero cya 94.5%

Ati “Turatekereza ko twamaze kugera ku kigero cy’uko ubu urukingo rwizewe neza, nyuma y’uko umuntu azaba ahawe doze ebyiri.”

Ku wa 23 Ukuboza 2020 nibwo Guverinoma y’u Bwongereza yatangaje ko abakoze urukingo rwa AstraZeneca batanze ibipimo byabo mu Kigo gishinzwe Kugenzura Imiti n’ibikoresho by’Ubuzima (MHRA), biteganyijwe ko kuri uyu wa Mbere aribwo rushobora kwemezwa burundu rugatangira gukoreshwa.

Urukingo rwa Pfizer-BioNTech nirwo rwabanje kwemezwa n’iki kigo gishinzwe kugenzura imiti cy’u Bwongereza, kuri ubu rukaba rumaze guhabwa abagera kuri 600.000, biganjemo abibasiwe kurusha abandi, kuva mu kwezi gushize.

Igerageza rya mbere ry’Urukingo rwa AstraZeneca ryakozwe, ryerekanye ibisubizo bitandukanye, aho bwa mbere ryagaragaje ko rwizewe ku kigero cya 70%, gusa ibi bipimo byaje kuzamuka bigera kuri 90% bitewe na doze umuntu yahawe.

Sariot yavuze ko yatunguwe n’ibyavuye mu bipimo bya mbere, avuga ko atari yiteze kutemeranya no kunengwa byakurikiye ibisubizo byavuye mu igeragezwa ry’uru rukingo, hanengwa ko habonetse ibisubizo bitandukanye.

Ati “Twari twiteze ko abantu bazatenguhwa, ariko ntabwo twari tubyiteze kuri kiriya kigero gikomeye.”

Urukingo rwa AstraZeneca rurangamiwe na benshi, icya mbere bitewe n’uburyo ruhendutse, uko rubikika byoroshye kuruta izindi nkingo zirimo urwa Pfizer-BioNTech kuko rushobora gutwara, rukanabikwa ku kigero cy’ubukonje busanzwe buboneka mu byuma bikonjesha bisanzwe hagati ya degré Celsius ebyiri n’umunani.

Kuri ubu Leta y’u Bwongereza yagaragaje ko ifitiye icyizere uru rukingo, aho yamaze gutumiza doze zigera kuri miliyoni 100 z’uru rukingo, bikaba biteganyijwe ko kugera mu mpera za Werurwe hazaba hamaze kuboneka izigera kuri miliyoni 40.

U Bwongereza buri mu bihugu byibasiwe cyane n’icyorezo, aho kugeza ubu kimaze guhitana abarenga 70.000, kandi kuva mu minsi ishize cyarakwirakwiriye cyane, aho byanagaragaye ko ari ubwoko bushya bw’icyorezo, bwandura cyane kuruta ubwari busanzwe, ku kigero cya 74%.

Ibi byahise bituma hirya no hino muri iki gihugu hasubizwaho gahunda ya Guma mu Rugo yihuse, mu rwego rwo gukumira iri kwirakwira ryihuse, abayobozi batandukanye bavuga ko kuba uru rukingo rwa AstraZeneca narwo rwagaragaje icyizere, ari ibyiringiro by’uko ibi bihe benda kubisohokamo vuba.

Biteganyijwe ko mbere y’uko umwaka urangira AstraZeneca izaba imaze gukora doze zirenga miliyoni 200 z’uru rukingo, ndetse kugeza mu mpera za Werurwe umwaka utaha hakazaba hamaze gukorwa izigera kuri miliyoni 700 ku Isi yose.

Guverinoma y'u Bwongereza iyobowe na Minisitiri w’Intebe, Boris Johnson yagaragaje ko ifitiye icyizere urukingo rwa AstraZeneca

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .