00:00:00 IGIHE NETWORK KN KINYARWANDA EN ENGLISH FR FRANCAIS

Urugendo rw’ibanga rwagejeje Perezida Zelensky i Washington

Yanditswe na IGIHE
Kuya 22 Ukuboza 2022 saa 11:27
Yasuwe :

Perezida wa Ukraine Volodymyr Zelensky yasoje uruzinduko rudasanzwe muri Leta zunze ubumwe za Amerika, rwakoranwe ukwigengesera guhambaye kubera intambara igihugu cye gihanganyemo n’u Burusiya kuva muri Gashyantare.

Amakuru y’uko Zelensky azajya muri Amerika yatangiye kuvugwa mu ntangiro z’iki cyumweru ariko ntiyemezwa, aza gutangazwa ku mugaragaro ubwo abayobozi bari bamaze kwizera ko yamaze gufata ikirere yerekeza muri Amerika.

Ku wa Kabiri Zelensky yari yasuye abasirikare ku rugamba mu mujyi wa Bakhmut, mu burasirazuba bw’igihugu.

Mu gihe missile z’u Burusiya zikomje gucicikana mu kirere cy’a Ukraine, Zelensky yatangiye urugendo rugana i Washigton abanza guca muri Pologne, akoreshe gari ya moshi mu ijoro.

Amafoto yamugaragaje ku wa Gatatu yageze muri icyo gihugu, ari kuri sitasiyo ya gari ya moshi mu mujyi wo ku mupaka wa Przemysl.

Zelensky n’abasirikare bari kumwe bahise binjira mu modoka zari zibategereje, zirimo Chevrolet Suburbans y’umukara - imodoka zikoreshwa cyane na Guverioma ya Amerika.

Abayobozi benshi bamaze gukoresha gari ya moshi bajya muri Ukraine gusura Zelensky, ariko we ni ubwa mbere asohotse mu gihugu cye kuva intambara n’u Burusiya, ku wa 24 Gashyatare 2022.

Amakuru atangwa n’imbuga zikurikirana ingendo z’indege agaragaza ko indege ya US Air Force Boeing C-40B bikekwa ko ari yo yari itwaye Zelensky, yahagurutse ku kibuga cy’indege cya Rzeszow.

Iyi ndege ngo yahise ikomeza igana hejuru y’u Bwongereza, ariko mbere yo kugera hejuru y’amazi y’Inyanja yo mu Majyaruguru (North Sea), indege y’ubutasi ya Nato yabanje kugezura icyo gice, cyane ko bivugwa ko ayo mazi agenzurwa n’ubwato bw’Abarusiya bugendera munsi y’inyanja (submarines).

Nyuma, indege ya Amerika y’itambara, F-15, yahagurukiye ku kigo cya gisirikare kiri mu Bwongereza, iherekeza iyarimo Zelensky.

Iyo ndege yageze i Washington nyuma y’amasaha icumi ihagurutse. Zelensky yari yambaye imyambaro yo gisirikare nk’uko bisanzwe kuva intambara yatangira.

Akihagera yakiriwe mu mutekano uhambaye, aho yari akikijwe na Secret Service.

Ubwo yatahaga nabwo, Perezida Volodymyr Zelensky yongeye kunyura muri Pologne, ndetse anagirana ikiganiro na Perezida Andrzej Duda.

U Burusiya bwashinje Amerika kitifuza amahoro muri Ukraine

Leta y’u Burusiya yanenze bikomeye urugendo Perezida Zelensky yagiriye muri Leta zunze ubumwe za Amerika, ivuga ko ihanganye na Amerika mu ntambara mu buryo buziguye.

Ni uruzinduko Zelensky yagiriye muri Amerika kuri uyu wa Kane, aho Ukraine yahawemo inkunga ya gisirikare ya miliyari $1.85, kimwe n‘ubwirinzi bw’ibitero byo mu kirere bwa Patriot.

Leta ya Moscow yavuze ko mu biganiro bya Zelensky na Biden nta mvugo z’amahoro zajemo, ahubwo zose zaganishaga ku gukomeza intambara.

Umuvugizi wa Perezida w’u Burusiya, Dmitry Peskov, yavuze ko ibi bishimagira ko Amerika irimo kurwana intambara n’u Burusiya, muri Ukraine.

Peskov yashimangiye ko guha Ukraine igtwaro ya Patriot, bitazabuza u Burusiya "kugera ku ntego zabwo mu bikorwa bidasazwe bya gisirikare."

Ni mu gihe Umuvugizi wa Minisitiri w’Ububanyi n’amahanga w’u Burusiya, Maria Zakharova, we yagize ati "Ibiganiro by’i Washington byerekanye ko yaba Ukraine cyangwa Leta zuze ubumwe za Amerika, nta n’umwe ushaka amahoro. Ahubwo bashishikajwe no gukomeza kurwana."

Abasesenguzi beshi bo mu Burusiya banenze uburyo Amerika ishaka gukomeza kurunda intwaro muri Ukraine.

Mu gihe Amerika yahaye Ukraine inkunga ya gisirikare ya miliyari $1.85, indi nkunga ya miliyari $45 iri imbere ya sena.

Ambasaderi w’u Burusiya muri Leta zunze Ubumwe za Amerika, Anatoly Antonov, yavuze ko ibyo Amerika irimo gukora ari ubushotoranyi, kandi buzatuma ikibazo kirushaho gukomera.

Yavuze ko u Burusiya bwari burimo kugerageza gukoresha inyurabwenge mu buryo bwose, ariko icyemezo cyo guha Ukraine ubwirinzi bwa Patriot cyo giteye inkeke.

Zelensky yagiriye muri Amerika uruzinduko rwa mbere kuva intambara y'u Burusiya yatangira
Perezida Zelensky yagiye muri Amerika anyuze muri Pologne

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .