Urubanza rushobora kohereza Julian Assange muri Amerika rurasubukurwa i Londres

Yanditswe na IGIHE
Kuya 7 Nzeri 2020 saa 08:59
Yasuwe :
0 0

Kuri uyu wa Mbere i Londres mu Bwongereza harasubukurwa urubanza rwa Julian Assange, umunyamakuru washinze urubuga WikiLeaks ukurikiranyweho kumena amabanga ya Leta Zunze Ubumwe za Amerika.

Assange umaze imyaka isaga icumi mu Bwongereza araburana arwanya kuba yakoherezwa muri Amerika aho ashakishwa n’ubutabera, nyuma y’amezi urubanza rwe rusubitswe kubera icyorezo cya Coornavirus.

Uyu mugabo w’imyaka 49 akuriranyweho kwinjira muri mudasobwa za Guverinoma ya Amerika, akavanamo amakuru akomeye y’ubutasi yaje no gutangazwa ku rubuga WikiLeaks mu mwaka wa 2010.

Izina rye ryatumbagiye cyane mu mwaka wa 2010 ubwo yasohoraga amashushao agaragaza igitero cyagabwe n’ingabo za Amerika mu 2017 muri Iraq, kigahitrana abantu benshi barimo n’abanyamakuru ba Reuters. Yakomeje gusohora andi makuru agaragaza ubugizi bwa nabi bwakorwaga n’ingabo za Amerika mu bihugu byo muri Aziya nka Afghanistan, Iraq na Iran.

Assange abonwa ku ruhande rumwe nk’intwari mu itangazamakuru yafashije benshi gushyira hanze amakuru atandukanye yari ameze nk’ubwiru kandi asobanura neza umurongo wa Politiki ya Amerika hirya no hino ku isi, mu gihe muri Amerika afatwa nk’icyihebe n’umugizi wa nabi wakomye mu nkokora imigambi yabo.

Aramutse yoherejwe muri Amerika, Assange ashobora gukatirwa igifungo cy’imyaka 175, ari nayo mpamvu ari gukora uko ashoboye we n’abanyamategeko be n’imiryango iharanira uburenganzira bwa muntu, ngo atazoherezwayo.

Urubanza rwa Assange mu Bwongereza ruhera mu myaka ya 2010 ubwo yajyanwaga mu rukiko aburana kutoherezwa muri Suède ku byaha by’ihohotera rishingiye ku gitsina yashinjwagayo. Ibyo byaha byaje gukurwaho. Mu mwaka wa 2012 hadutse indi nkundura ya Amerika isaba ko yoherezwayo akahaburanira ku byaha byo kuyimenera amabanga, yahise ahungira muri ambasade ya Equateur i Londres.

Muri iyo ambasade yahamaze imyaka irindwi. Muri Mata 2019 yashwanye n’ubuyobozi bw’iyo ambasade, bumusohoramo ahita afatwa n’inzego z’umutekano z’u Bwongereza zimujyana muri gereza, aho ategereje kuburanishwa ku busabe bwo koherezwa muri Amerika.

Kuri iyi nshuri byitezwe ko urukiko ruzumva abatangabuhamya bamushinjura, bagaragaza uburyo ibirego ashinjwa ari ibya politiki, bagaragaza ko imibereho y’imfungwa muri Leta Zunze Ubumwe za Amerika zifatwa nabi ndetse ko abanyamategeko be bakozweho iperereza batabizi n’inzego za Amerika ubwo Assange yari muri gereza.

Assange agiye kuburana asaba kutoherezwa muri Amerika aho ashobora gukatirwa imyaka 175 y'igifungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .