Nancy Pelosi wayoboye Inteko Ishinga Amategeko igihe kinini yavuze ko gutsindwa kw’Aba-Démocrates kwatewe na Joe Biden watinze kwikura mu bikorwa byo kwiyamamaza kugira ngo iri shyaka rishake undi mukandida mushya, ushobora guhangana na Donald Trump wari ufite igikundiro kidasanzwe.

Yavuze ko iyo Biden agenda kare, hari kuba amatora y’ibanze yo gushaka umukandida uzahagarira Aba-démocrates, na Kamala Harris akayitabira nk’abandi bose. Iyo abasha gutsinda, nk’uko Pelosi abisobanura, yari kuba yarubatse ubushobozi ku buryo yari kwitwara neza mu bihe byakurikiyeho, akaba ari umukandida ufatika.

Yongeyeho ko kuba Biden yarikuye mu ihatana ariko agahita ashyigikira Kamala Harris, byatumye iri shyaka ritabona uburyo ritegura amatora y’ibanze yashoboraga gutuma haboneka umukandida ushoboye kuruta Kamala, yanaba Kamala akaba yahanganye agatsinda abandi bose.

Ku rundi ruhande, bamwe mu bo ku ruhande rwa Kamala Harris nabo bavuze ko iyo baza kubona igihe gihagije cyo kwitegura, byashobokaga ko bari kubona intsinzi, ariko ibi bitashobotse kuko Biden yatinze kwikura mu bikorwa byo kwiyamamaza, bityo bakabona umwanya muto.

Gusa abo ku ruhande rwa Biden ntibabikozwa, kuko bavuga ko Kamala yabonye umwanya n’amafaranga ahagije yo kwiyamamaza, dore ko ibikorwa bye byo kwiyamamaza mu mezi ane gusa byatwaye arenga miliyari 1$, bityo adakwiriye kugira urwitwazo.

Bernie Sanders usanzwe ari Umusenateri wigenga, yavuze ko Ishyaka ry’Aba-Démocrates ryatengushye abari barishyigikiye, kugeza ubwo Abirabura, Aba-Latino n’Abarabu barikundaga cyane bariteye umugongo, bagatangira gushyigikira Donald Trump.

Yashimangiye ko hari impungenge z’uko abayobozi b’iri Shyaka batazanashobora kwigira ku makosa yabayeho ngo bafate ingamba zifatika zo guhangana nayo mu bihe biri imbere.

Undi uri gushinjwa uruhare mu gutsindwa kw’Aba-Démocrates ni Barack Obama, aho abajyanama be bashinjwa kuba barabaye nyirabayazana w’ibi bibazo byose ndetse bagatangiza ubukangurambaga bwari bugamije gukuraho Biden, nyamara ibi bigakorwa nta gahunda ihamye yo kumusimbuza irategurwa.

Muri rusange aya matora asize Ishyaka ry’Aba-Démocrates ricitsemo ibice aho impande zombi ziri kwitana ba mwana ku bibazo byabayeho bigatuma ritsindwa ku rwego rwo hejuru.

Binavugwa ko mu minsi ya nyuma yo kwiyamamaza kwa Kamala Harris, atashyigikiwe na Joe Biden wamushinje gushaka kumwikiza no kwitandukanya nawe, kandi yaragize uruhare rufatika mu kumugeza aho yari ageze.

Nancy Pelosi yashinje Biden kugira uruhare mu gutsindwa kw'Aba-Démocrates