Umuyobozi wa Twitter yasubije Angela Merkel wanenze icyemezo cyayo cyo gufunga konti ya Trump

Yanditswe na Bukuru JC
Kuya 14 Mutarama 2021 saa 10:22
Yasuwe :
0 0

Hashize iminsi Twitter ifashe icyemezo cyo gufunga burundu konti ya Perezida Donald Trump kuri uru rubuga nkoranyambaga nyuma yo kumushinja ko ayinyuzaho ubutumwa buhembera urwango.

Iki cyemezo cya Twitter cyashimwe na benshi biganjemo abasanzwe badahamanya n’ibitekerezo by’uyu mugabo, gusa hagira n’abandi bakinenze bagaragaza ko ari uguhonyora uburenganzira bwo kuba umuntu yatanga igitekerezo cye.

Mu banenze iki cyemezo cya Twitter harimo na Chancelière w’u Budage, Angela Merkel wavuze ko uyu mwanzuro urimo ‘ikibazo’.

Perezida wa Mexique, Andrés Manuel López Obrador we yavuze ko “atanezezwa no kubona hari uwo ari we wese ugenzurwa mu byo avuga.”

Mu rwego rwo gusubiza abanenze iki cyemezo, Umuyobozi wa Twitter akaba n’umwe mu bayishinze, Jack Dorsey, yavuze ko gufunga konti ya Perezida byari bikwiye kuko yagiye aburirwa kenshi.

Ati “Twafashe umwanzuro dushingiye ku makuru yizewe dufite agaragaza ingaruka bigira ku mudendezo w’abantu haba kuri Twitter ndetse no hanze yayo.”

Jack Dorsey yavuze ko kuba byarasabye ko konti ya Trump ifungwa bigaragaza ugutsindwa Twitter yagize mu kwimakaza ibiganiro bidaseserezanya.

Dorsey yavuze ko yemera ko uyu mwanzuro ufite ingaruka ariko yemeza ko nta yandi mahitamo bari bafite.

Joe Biden uherutse gutorerwa kuyobora Amerika yagaragaje ko yishimiye iki cyemezo cyafashwe na Twitter ndetse na Facebook agaragaza ko n’izindi mbuga nkoranyambaga zikwiye gutera ikirenge mu cy’izi mu gukumira amagambo abiba urwango.

Umuyobozi wa Twitter, Jack Dorsey yavuze ko gufunga konti ya Perezida Donald Trump byari bikwiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .