00:00:00 IGIHE NETWORK KN KINYARWANDA EN ENGLISH FR FRANCAIS

Umukecuru w’imyaka 97 yahamijwe uruhare muri Jenoside yakorewe Abayahudi

Yanditswe na Igizeneza Jean Désiré
Kuya 21 Ukuboza 2022 saa 09:11
Yasuwe :

Umukecuru w’imyaka 97 wahoze ari umunyamabanga w’Abanazi, Irmgard Furchner yahamijwe n’Urukiko rwo mu Majyaruguru y’u Budage kugira uruhare mu bwicanyi bw’abarenga ibihumbi 10 muri Jenoside yakorewe Abayahudi.

Kuva mu 1943 kugeza mu 1945 ubwo Abanazi bakurwaga ku butegetsi, Furchner yari umwanditsi mu gihe cya Jenoside yakorewe Abayahudi mu nkambi ya Stutthof yari iherereye hafi y’Umujyi wa Gdansk ho muri Pologne, umujyi wari warafashwe n’Abanazi muri icyo gihe.

Yakatiwe igifungo cy’imyaka ibiri gisubitse kuri uyu wa Kabiri tariki ya 20 Ukuboza 2022 nk’uko umuvugizi w’Urukiko rwa Itzehoe rwo mu Majyaruguru y’u Budage yabitangaje.

Yatangiriye kuburanira mu rukiko rw’abana kubera ko mu Ntambara y’Isi ya Kabiri, ari nabwo yakoze ibyaha yahamijwe, yari afite imyaka 18.

Mu byo yashinjwaga harimo gufasha Abanazi kwica imfungwa z’Abayahudi, zari zifungiye mu nkambi ya Stutthof cyane ko yakoraga mu biro bya Komanda Mukuru w’iyi nkambi kuva muri Kamena 1943 kugeza muri Mata 1945.

Si ubwa mbere abagize uruhare mu bwicanyi bwakorewe mu nkambi zari zifungiyemo Abayahudi mu buryo butaziguye bahamwa n’ibyaha kuko Oskar Gröning wari ushinzwe ibaruramari mu nkambi ya Auschwitz ndetse na John Demjanjuk wari ushinzwe umutekano (securité) mu nkambi ya Sobibor na bo bahamijwe n’inkizo zo mu Budage ibi byaha.

Ubushinjacyaha bwasabiye Furchner igifungo cy’imyaka ibiri gisubitse ariko akakimarana n’abarokokeye muri iyo nkambi hamwe n’abafite ababo bayiguyemo kuko ngo batifuza kubona umukecuru w’imyaka 97 amara igihe runaka muri gereza.

Urubuga rw’Inzu ndangamurage ya Leta zunze Ubumwe za Amerika irimo amakuru y’ibyabaye muri Jenoside yakorewe Abayahudi rugaragaza ko inkambi ya Stutthof yaguyemo abarenga ibihumbi 60 bishwe batewe ikinyabutabire cya lethal abandi bashyizwe mu cyumba cya gas ikabiciramo.

Abandi bishwe n’indwara ndetse n’inzara, barimo Abayahudi, imfungwa za politiki, abatinganyi ndetse n’Abahamya ba Yehova

Muri Nzeri 2021 yigeze kumara iminsi itanu muri kasho nyuma aza gukurwamo aho urukiko rwatangaje ko adafite ubushobozi bwo gutoroka bijyanye n’imyaka yari afite.

Irmgard Furchner w'imyaka 97 yakatiwe igifungo cy'imyaka ibiri gisubitse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .