00:00:00 IGIHE NETWORK KN KINYARWANDA EN ENGLISH FR FRANCAIS

Ukwifata kwa bimwe mu bihugu bya Afurika ku ntambara ya Ukraine; CCM yavuye ku izima: Amakuru muri Afurika

Yanditswe na IGIHE
Kuya 23 June 2022 saa 01:04
Yasuwe :

Abayobozi mu Muryango w’Ubumwe bw’ibihugu by’i Burayi, EU, barahurira mu Bubiligi kuri uyu wa Kane aho biteganyijwe ko bari bwige ku ngingo yemerera Ukraine kuba umukandida muri uyu muryango nk’ikimenyetso cy’ubufatanye muri iki gihe iki gihugu gihanganye n’u Burusiya mu ntambara.

Ni mu gihe kandi EU imaze igihe isa n’iri mu bukangurambaga bugamije gushaka amaboko yo gushyigikira Ukraine no kurwanya u Burusiya.

Byatumye abarimo umuyobozi wa EU, Ursula von der Leyen; Chancelier w’u Budage, Olaf Scholz; Minisitiri w’Intebe wa Finland, Sanna Marin n’abandi bayobozi muri EU bakorera ingendo muri Aziya, Afurika no mu Burasirazuba bwo Hagati.

Amasezerano mashya mu by’ubucuruzi yashyizweho umukono ndetse inkunga mu by’ubutabazi n’imari biremerwa muri gahunda yo gufasha ibyo bihugu kudakomeza gutega amaramuko ku Burusiya.

Magingo aya EU yatangije ubufatanye mu by’ubucuruzi n’ikoranabuhanga n’u Buhinde hagamijwe kuzamura ubukungu bw’iki gihugu.

Nubwo bimeze bityo u Buhinde bwakomeje kwifata ku kibazo cy’u Burusiya.

Afurika Yunze Ubumwe na yo ntiremera kwinjira mu mujyo w’ibihugu by’i Burayi mu kwitandukanya n’u Burusiya.

Perezida wa Sénégal, Macky Sall, akaba ari na we muyobozi wa Afurika Yunze Ubumwe, mu nama aherutse kugirana n’abayobozi ba EU, yavuze ko ibihano uru ruhande rwafatiye u Burusiya byahungabanyije iyinjizwa ry’ibinyampeke n’inyongeramusaruro muri Afurika.

Ibi bifitanye isano n’ibibazo by’ibura ry’ibiribwa hirya no hino kuri uyu mugabane muri iki gihe.

Mu kiganiro yagiranye n’ikinyamakuru cyo mu Bufaransa, Le Journal du Dimanche, Sall yavuze ko AU ishaka kugura ibinyampeke n’ifumbire ariko kuri ubu bikaba bidashoboka.

Ati “Turasaba ibihugu by’u Burayi gushyiraho ingamba nk’izashyizweho ku bijyanye na gaz n’amavuta.”

Uyu muyobozi wa AU yanabonanye na Putin mu ntangiriro za Kamena bemeranywa ko ibihano byafatiwe igihugu cye bidashobora gukemura ikibazo cy’ibiribwa.

Abasesenguzi bagaragaje ko bumva neza impamvu z’ibi bihugu kubera ko iyo habaye intambara muri bihugu bya Afurika na Aziya, rimwe na rimwe u Burayi buba bufitemo akaboko.

EU ngo ikwiye kumenya ko umujinya iterwa n’iyi ntambara n’urwango u Burayi bufitiye u Burusiya itabisangiye n’isi yose.

Ku rundi ruhande, u Burusiya buvuga ko ikibazo cy’ibura ry’ibiribwa cyatewe na Ukraine ariko ukuri ni uko ibiribwa bidashobora gusohoka kubera ko u Burusiya bwateye Ukraine bukabuza ko ibinyampeke byaturukaga muri iki gihugu byongera kugezwa mu bice bitandukanye by’Isi nk’uko abasesenguzi bakomeza babivuga.

Aganira n’itangazamakuru mu Bubiligi ku wa Mbere, Umuyobozi ushinzwe politiki mpuzamahanga muri EU, Josep Borrell, yemeranyijwe n’ibyo abayobozi b’ibihugu bya Afurika bagaragaje ariko avuga ko ikibazo kidakwiye kwitirirwa ibihano bya EU.

Ati “Noherereje amabaruwa ba Minisiriri b’Ububanyi n’Amahanga muri Afurika nsobanura ibihano byacu uko bitegurwa - uko bikora, uwo bigira ingaruka, ibishobora kwemerwa n’ibitemewe muri ibi bihano.”

Yakomeje avuga ko EU yemeye gutanga miliyari 1,06 y’amadolari agamije gukemura ikibazo cy’ibiribwa mu Karere ka Sahel, miliyoni 633 z’amadolari yo gufasha gukemura ikibazo nk’iki mu bihugu byo mu ihembe rya Afurika na miliyoni 237 z’amadolari yo kurwanya ingaruka z’ibura ry’ibiribwa muri Afurika ya Ruguru n’iyo Hagati.

Perezida Macky Sall yagiranye ibiganiro na Putin w'u Burusiya

RDC: Kiliziya Gatolika yahamagariye abaturage kwirinda imvururu

Ubuyobozi bwa Kiliziya Gatolika y’i Bukuvu muri Kivu y’Amajyepfo, bwasabye abayoboke bayo kwirinda ubutumwa bubiba urwango buri gukwirakwizwa na bamwe hagamijwe ikibi muri iki gihe.

Umuyobozi wa Komisiyo y’Ubutabera n’Amahoro muri Arikidiyosezi ya Bukavu, Padiri Justin Nkuzi, yasabye ko umubano wa kivandimwe umaze igihe kinini uranga Abanyarwanda n’Abanye-Congo wakomeza.

Yagize ati “Tugomba kumva ko turi abaturanyi n’u Rwanda cyane twe ab’i Bukavu n’inshuti zacu z’i Cyangugu. Turi za Kiliziya zegereanye ku Isi mu bihugu bibiri bitandukanye. Iyo inzogera ivuze i Cyangugu yumvikana i Bukavu, bityo bityo.”

“Izuba rituvira twese, tugusha imvura imwe. Duhuriye ku mugezi n’ikiyaga kimwe. Mbese turi abavandimwe, tugomba kubana ni ko byagenwe.”

Kuri we, ntibikwiye ko gahunda z’abanyepolitiki zica abaturage mo ibice.

Ati “Turi abaturage b’abanyamahoro kandi turashaka gukomeza uwo mubano n’abaturanyi bacu. Uko abana bo mu Rwanda baza kwiga hano ni ko n’aba hano bashobora kujya kwiga hariya.”

Yavuze ko intwaro zirimo imbunda, imipanga, ibyuma n’inkoni atari byo byakemura ikibazo hagati y’Abanyarwanda n’Abanye-Congo.

Tanzania: Ishyaka riri ku butegetsi rigiye guhindura Itegeko Nshinga

Ishyaka riri ku Butegetsi muri Tanzania, Chama Cha Mapinduzi (CCM), ryatangaje ko ryiteguye gukora amavugurura ku Itegeko Nshinga ry’Igihugu nyuma y’imyaka myinshi riri ku gitutu cy’abatavuga rumwe na ryo n’abaharanira uburenganzira bwa muntu.

Igerageza riheruka ryo guhindura Itegeko Nshinga ryabaye mu 2014 nyuma y’imbanzirizamushinga yakozwe hagamijwe kugabanya ububasha bwa perezida no gushyiraho urwego rwigenga rushinzwe amatora.

Kuri uyu wa Gatatu, Umunyamabanga ushinzwe ibijyanye n’ingengabitekerezo muri CCM, Shaka Hamdu Shaka, yatangaje ko inzego nkuru z’ishyaka zemeje ko hakenewe itegeko nshinga rishya.

Yatangaje ko iri shyaka rishyigikiye gahunda y’ubwiyunge yatangijwe na Perezida Samia Suluhu Hassan.

Kuva mu 2014, ishyaka rikuru ritavuga rumwe n’ubutegetsi, Chadema hamwe n’andi yifuje ko hajyaho Itegeko Nshinga rishya ariko abayobozi bayo bagenda babipfa n’ubutegetsi.

Bamwe bafunzwe inshuro nyinshi bazira guteranya inama ziga kuri iyo ngingo, barimo n’umuyobozi wa Chadema, Freeman Mbowe wafunzwe muri Nyakanga umwaka ushize.

John Magufuli wahoze ari Perezida wa Tanzania wayoboye iki gihugu kuva mu Ugushyingo 2015 kugeza ku rupfu rwe muri Werurwe 2021, yari yavuze ko nta mavugurura ku Itegeko Nshinga azigera abaho mu gihe cyose azaba akiri perezida.

Ishyaka riri ku butegetsi muri Tanzania ryemeye kuvugurura Itegeko Nshinga. Ni gahunda yari yaratewe utwatsi ku butegetsi bwa Pombe Mgufuli

Somalia: Umugezi wa kabiri mu bunini ugiye gukama

Umwe mu migezi minini muri Somalia witwa Shabelle, ugiye gukama, ikibazo kizabangamira abaturage benshi bawukeshaga imibereho muri iki gihe igihugu cyibasiwe n’amapfa.

Televiziyo ya Leta yatangaje ko uyu mugezi wakamye kandi bishobora kongera ubukana bw’amapfa mu gihugu bityo n’inzara ikaba yaba karande.

Shabelle ni umugezi utembera mu Majyepfo ya Somalia uturutse mu misozi miremire ya Ethiopie.

Ni wo wari umugezi wa kabiri mu minini muri iki gihugu ndetse watangaga amazi mesnhi ku baturage bo mu Majyepfo no muri Somalia yo hagati.

Ibikorwa by’ubuhinzi byakomwe mu nkokora n’ibura ry’imvura imaze igihe itagwa mu bihe bine ubusanzwe byabaga ari ibyayo.

Abarenga miliyoni eshanu z’abaturage bashobora kwibasirwa n’inzara biturutse kuri ayo mapfa amaze igihe kirekire nk’uko inkuru ya BBC ibivuga.

Umwe mu migezi minini muri Somalia warakamye kubera amapfa

Tanzania irashinja Aba-Maasai bo muri Kenya kwinjira mu gihugu rwihishwa

Tanzania yatangaje ko igiye gukurikirana ikibazo cy’abinjira binyuranyije n’amategeko banyize mu Majyaruguru y’Umujyi wa Loliondo aho ishinja Aba-Maasai bo muri Kenya gushyigikira abarwanya umushinga wo kubimura ahateganyirijwe ibikorwa by’ubukerarugendo.

Aba-Maasai bo muri Loliondo bashinja guverinoma kugerageza kubimura ku ngufu ku butaka bwabo ariko yarabihakanye. Tanzania ivuga ko ishaka kubungabunga ubuso bugera kuri kilometer 1500 budakorerwaho ibikorwa bya muntu.

Imvururu z’abarwanya uyu mushinga zatumye umupolisi umwe yicwa ku wa 10 Kamena wishwe n’abigaragambyaga.

Komiseri Mukuru ushinzwe abinjira n’abasohoka muri Tanzania, Anna Makakala, yatangaje kuri uyu wa Gatatu, ko bagiye gukora umukwabu w’iminsi 10 muri Loliondo mu Karere ka Ngorongoro hagamijwe kurwanya abantu binjira muri aka karere mu buryo bunyuranyije n’amategeko.

Abenshi ngo ni aborozi binjiza amashyo y’inka, intama n’ihene muri Pariki ya Loliondo bauye muri Kenya.

Aba-Maasai b’aborozi batuye ku mupaka hagati ya Tanzania na Kenya. Ubutegetsi bwa Tanzania bukeka ko Abanyakenya binjije imikumbi yabo muri Loliondo bagamije guhuza imbaraga na bagenzi babo badashaka kwimurwa muri aka gace.

Tanzania yaciriye urubanza aba-Maasai 20 bagize uruhare mu rupfu rw’umupolisi nk’uko The Nation yabitangaje.

Imvururu zo muri Loliondo zateye impagarara ndetse imiryango mpuzamahanga irengera uburenganzira bwa muntu nka Amnesty International uvuga ko hakoreshejwe ingufu z’umurengera.

Abadashyigikiye gahunda yo kwimurwa muri pariki bagejeje ikirego mu rukiko rwa Afurika y’Iburasirazuba, rwagombaga gufata umwanzuro kuri iki kibazo kuri uyu wa Gatatu ariko biza gusubikwa ku mpamvu zitasobanuwe.

Mu 2009, imiryango y’Aba-Maasai yakuwe muri Loliondo ubwo sosiyete yo muri Emirats yitwa Ortelo Business Corporation ihatunganyirize ibikorwa by’ubukerarugendo.

Guverinoma yahagaritse uwo mushinga mu 2017 nyuma y’ibirego bya ruswa.

Loliondo ntiri kure ya Pariki y’Igihugu ya Serengeti n’ikiyaga cya Ngorongoro (Ngorongoro volcanic crater) byombi biri mu bikurura ba mukerarugendo benshi buri mwaka.

Tanzania ishaka kwimura Aba-Maasai muri Pariki ya Loliondo hagakorerwa ibikorwa by'ubukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .