00:00:00 IGIHE NETWORK KN KINYARWANDA EN ENGLISH FR FRANCAIS

Ukraine yirukanye ingabo z’u Burusiya mu Mujyi wa Lyman

Yanditswe na Bukuru JC
Kuya 1 Ukwakira 2022 saa 07:28
Yasuwe :

Nyuma yo kugotwa n’ingabo za Ukraine, kuri uyu wa Gatandatu u Burusiya bwakuye abasirikare babwo mu Mujyi wa Lyman uherereye mu Burasirazuba wari uzifatiye runini mu bikorwa by’urugamba kuko wari nk’urugerero rwazo.

Ni indi ntsinzi ikomeye nyuma y’aho ingabo za Ukraine zitangiriye ibitero byo kwivuna u Burusiya byashegeshe bikanarakaza ubutegetsi bwa Moscow.

Ugukura ingabo z’u Burusiya mu Mujyi wa Lyman ni ikintu kibangamiye gahunda yo kwiyomekaho uturere tune twa Ukraine ndetse ni uburyo bumwe buzafasha ingabo za Ukraine gukomeza gusatira ubutaka u Burusiya bwita ko ari ubwabwo.

Muri iki cyumweru Putin yigambye ko azakoresha intwaro z’ubumara aho yagaragaje ko intsinzi Ukraine iri kubona ku rugamba irimo akaboko ka Amerika ifite umugambi wo gusenya u Burusiya.

Minisiteri y’Ingabo y’u Burusiya yavuze ko yashegeshe igisirikare cya Ukraine mu rugamba rwo gufata Lyman ariko ko ingabo z’u Burusiya nke ari zo zasubiye inyuma ngo zisuganye kurushaho nk’uko inkuru ya Associated Press ibivuga.

Ni mu gihe ingabo zirwanira mu kirere za Ukraine zavuze ko zinjiye muri Lyman aho umugaba w’ingabo yanashyize amafoto ku mbuga nkoranyambaga agaragaza ibendera rya Ukraine rizamurwa mu nkengero z’umujyi.

Lyman yari igicumbi cy’ubwikorezi ukaba n’ahantu h’ingenzi ku Burusiya mu bihe by’urugamba mu bijyanye n’itumanaho ndetse no kwegeranya ibikoresho nkenerwa.

Ingabo za Ukraine zigaruriye uduce twinshi twari mu maboko y’u Burusiya mu bitero byatangiye muri Nzeri uyu mwaka byatumye bukura ingabo muri Kharkiv, zikomereza mu Burasirazuba hafi y’umugezi wa Oskil zisatira Lyman n’ibindi bice by’ingenzi.

Hagati aho u Burusiya bwongeye kurasa ibisasu byinshi muri iyi minsi ubwo bwarimo kwitegura kwiyomekaho uduce twa Ukraine ndetse bwasabye ko igisirikare cyinjizwamo amaraso mashya menshi.

Nubwo Putin yatangaje ko uturere tune twa Ukraine twometswe ku Burusiya kuri uyu wa Gatanu, Perezida wa Ukraine, Volodymyr Zelenskyy hamwe n’igisirikare bavuze ko bazakomeza imirwano hagamijwe kwisubiza utwo turere hamwe n’ibindi bice byafashwe n’u Burusiya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .