00:00:00 IGIHE NETWORK KN KINYARWANDA EN ENGLISH FR FRANCAIS

Ukraine yashyikirijwe abasirikare biciwe muri Mariupol: Amakuru mashya mu ntambara n’u Burusiya

Yanditswe na IGIHE
Kuya 8 June 2022 saa 01:59
Yasuwe :

Intambara ikomeje gufata indi ntera hagati y’u Burusiya na Ukraine, aho bukomeje kwigarurira uduce twinshi tw’Iburasirazuba bw’icyo gihugu, ari nako abasirikare benshi bicirwa ku rugamba.

Kuri uyu wa Kabiri Ukraine yakiriye imibiri y’abasirikare 210 biciwe mu Mujyi wa Mairiupol, by’umwihariko mu ruganda rw’ibyuma rwa Azovstal.

Ubuyobozi bushinzwe iperereza muri Minisiteri y’Ingabo ya Ukraine bwatangaje kuri Telegram ko "Ibikorwa byo kugarura imibiri y’abasirikare baguye muri Mariupol gikomeje."

Itangazo rikomeza riti "Uyu munsi abasirikare 210 bagaruwe, benshi muri bo baguye muri Azovstal."

Umujyi wa Mariupol wabayemo intambara ikomeye, kugeza ubwo abasirikare ba Ukraine bahise bahungira mu buvumo buri munsi y’uruganda runini cyane rwa Azovstal.

Ingabo z’u Burusiya zaje kurugota, nta winjira nta n’usohoka, abasirikare ba Ukraine babanza kwirwanaho kugeza bose bemeye kumanika amaboko.

Ku wa 7 Gicurasi nibwo ubuyobozi bwa Repubulika ya Rubanda ya Donetsk - agace kigumuye ku butegetsi bwa Ukraine kemerwa n’u Burusiya - kahererekanyije na leta ya Ukraine imibiri y’abasirikare bishwe kuva intambara yatangira muri Gashyantare 2022.

Ibiro ntaramakuru byo mu Burusiya, Tass, byatangaje ko hari abandi basirikare barenga 1,000 ba Ukraine bamanitse amaboko muri Mariupol bajyanywe mu Burusiya, barimo gukorwaho iperereza.

Umwe mu bayobozi mu nzego zishinzwe iyubahirizwa ry’amategeko yatangaje ko hari abasirikare benshi bashobora kujyanwa mu Burusiya. Ukraine ivuga ko ikomeje guharanira ko abasirikare bayo barekurwa.

Umujyi wa Mariupol wasenywe ku buryo bukomeye

Ishyamba si ryeru mu gisirikare cya Ukraine

Umwe mu bajura mu by’ikoranabuhanga wabashije kwinjira mu itumanaho rya Leta ya Ukraine, yatangaje ko hakomeje kuba ubwumvikane buke hagati ya Perezida Volodymyr Zelensky n’abakuru b’ingabo.

Uwo muntu ukorera RaHDIt Group yabwiye Ibiro ntaramakuru by’Abarusiya, RIA Novosti, ko kuva mu ntangiriro y’intambara, iri tsinda ryinjiye ku mbuga 755 za Guverinoma ya Ukraine.

Yagize ati "Bakomeje kugira ukutumvikana. Nk’urugero, igisirikare kigasanga ari ngombwa gusubira inyuma bakava mu gace runaka bitewe n’ibyo barimo kubona mu buryo bwa gisirikare. Ibiro bya Perezida bikavuga ko atari uko bigomba kugenda, ko atari ngombwa."

Ibyo ngo byagiye bituma abasirikare benshi bapfa, ndetse "Ntibituma abanyapolitiki barushaho gukundwa mu ngabo."

Gusa ngo ubutegetsi bwakomeje guhishira cyane amakuru ajyanye n’abasirikare bapfiriye ku rugamba.

Uwo muntu wanze ko amazina ye atangazwa yanagarutse ku buryo abasirikare ba Ukraine bagotewe mu Mujyi wa Mariupol.

Yakomeje ati "Iyo baza kuva muri Mariupol ntabwo bari kugotwa kugeza bafashwe mpiri. Ariko hatanzwe itegeko rivuye mu Biro bya Perezida ko ’tugomba guhagarara kigabo kugeza ku ndunduro, ni ubushake bwa politiki, Mariupol ni Umujyi ukomeye’. Byarangiye abatishwe bafashwe nk’imfungwa z’intambara."

Abasirikare ngo bakomeje kugenda bagaragaza ko iyo bibaye ngombwa bakwiye gusubira inyuma, ariko abayobozi ba politiki bakavuga ko byaca intege ingabo, ndetse ko batabasha gusobanura impamvu.

Ubuyobozi bwa Ukraine ngo bwizeye ko mu gihe burimo guhabwa imbunda zirasa missile mu ntera ndende, bishobora guhindura imiterere y’urugamba.

Icyakora ngo basanga bidahagije kuko hakenewe n’abasirikare bagomba gukoresha izo ntwaro zitamenyerewe mu gisirikare cya Ukraine.

Perezida Zelensky akomeje guhangana n'ibibazo by'intambara bitamworoheye

Intwaro Amerika yahawe Ukraine zikomeje kuzamura umwuka mubi

Ambasade y’u Burusiya muri Lete zunze ubumwe za Amerika yanenze icyo gihugu uburyo cyahaye Ukraine kajugujugu za Mi-17 zakorewe i Moscow, mu gihe zaguzwe zigenewe Afghanistan.

Itangazo yasohoye kuri uyu wa Gatatu rivuga ko u Burusiya bwamenye ko mu ntwaro Amerika iheruka guha Ukraine harimo kajugujugu enye za Mi-17 zakorewe mu Burusiya.

Yakomeje iti "Ibi byakozwe hirengagijwe amasezerano yasinywe ajyanye n’uzakoresha izo ntwaro, agena ko u Burusiya bubanza kubyemera mu nyandiko. Ibi bitandukanye n’ibyari byemewe n’uruhande rwa Leta zunze Ubumwe za Amerika. Nubwo habayeho gusaba ibisobanuro inshuro nyinshi, Amerika yananiwe gutanga igisubizo."

Amerika kandi ngo yarenze ku masezerano agena uburyo bwo guhererekanya intwaro zikoreshwa mu kwirinda ibitero byo mu kirere zishobora gutwarwa mu ntoki (Man-portable air-defense systems, MANPADS), ubwo yahaga leta ya Kyiv iza Stinger.

U Burusiya na Amerika byari byaremeranyije kujya bimenyeshanya igihe bishaka kugurisha mu mahanga MANPADS, bikabijyaho inama.

Ambasade ivuga ko hari ibyago bikomeye, kubera ko "Ingabo za Ukraine zishobora gukoresha izo ntwaro mu kurasa ku butaka bw’u Burusiya. Ibyo bishobora kugira ingaruka zitari zitezwe."

Byongeye, uretse no ku gisirikare cya Ukraine, izo ntwaro ngo zishobora no kugwa mu maboko y’abahenzanguni cyangwa imitwe y’iterabwoba.

U Burusiya buvuga ko uduce two hafi y’umupaka wa Ukraine turimo kuraswaho, bishoboka ko harimo gukoreshwa intwaro zirasa kure za howitzer, harimo M777 zatanzwe na Amerika.

Banki y’Isi yahaye Ukraine inkunga ya miliyari $1.49

Inama y’Ubutegetsi ya Banki y’Isi yemeje inkunga ya miliyari $1.49 igenewe Ukraine, nk’igice cya miliyari zisaga $4 Banki y’Isi yiyemeje gukusanya.

Banki y’Isi yatangaje ko aya mafaranga azafasha Guverinoma ya Ukraine "Kwishyura imishahara y’abakozi ba Leta n’abakora indi mirimo y’ubwitange."

Mu itangazo Banki y’Isi yasohoye, Umunyamerika David Malpass uyiyobora yavuze ko bakomeje gushaka inkunga zafasha abaturage ba Ukraine muri ibi bihe gukomeza kubona serivisi z’ubuzima, uburezi no kwita ku babikeneye kurusha abandi.

Banki y'Isi irimo gushaka miliyari $4 zo guha Ukraine

Ukraine yahagaritse kohereza gaz mu mahanga

Perezida wa Ukraine Volodymyr Zelensky yatangaje ko igihugu cye cyahagaritse kohereza mu mahanga amakara na gaz, mu gihe icyo gihugu cyitegura kwinjira mu bihe by’ubukonje.

Ni ibihe Zelensky yavuze ko bishobora "Kuba ibihe by’ubukonje bigoye kurusha ibindi mu myaka yose igihugu kimaze kibonye ubwingenge."

Iki gihugu cyabonye ubwigenge mu 1991 nyuma y’isenyuka ry’Ubumwe bw’Aba-Soviet (USSR).

Yagize ati "Kubera iyi ntambara, kizaba ari igihe kigoye kurusha ibindi mu gihe igihugu kimaze cyigenga. [...] Muri icyo gihe, ntabwo tuzagurisha gaz yacu n’amakara mu mahanga. Ibikorerwa mu gihugu byose bizibanda ku guhaza ababikeneye imbere mu gihugu."

Minisitiri w’Intebe wa Ukraine, Denis Shmygal, aheruka kuvuga ko umusaruro w’ibirombe bya leta wagabanyutseho kimwe cya gatatu guhera muri Gashyantare.

Guverinoma yasabye ikigo cya leta, Naftogaz, guhunika nibura metero kibe miliyari 19 za gaz, mu bubiko bwo munsi y’ubutaka.

Shmygal yavuze ko igihe cy’ubukonje giheruka, Ukraine yabashije gushyushya ahakenewe hose kandi isigarana mu bubiko metero kibe miliyari 9 za gaz.

Ku wa 1 Kamena, iki gihugu kivuga ko cyari gifite mu bubiko metero kibe miliyari 10 za gaz.

Ibiganiro ku gusohora ibinyampeke byaheze muri Ukraine

Minisitiri w’Ububanyi n’Amahanga w’u Burusiya , Sergey Lavrov, yageze muri Turikiya mu ruzinduko rw’iminsi ibiri, rugamije ibiganiro ku buryo bwafasha kuvana ibinyampeke muri Ukraine.

Iki gihugu gihinga cyane ingano, ibihwagari n’ibindi bikenewe ku isoko mpuzamahanga, ariko byaheze mu gihugu kubera ko ibyambu byakoreshwaga ubu biri mu duce tugenzurwa n’u Burusiya, kuva intambara yatangira muri Gashyantare.

Byateje izamuka ry’ibiciro by’ibiribwa byinshi ku Isi, mu gihe muri Ukraine byabuze uko bigera ku babikeneye barimo n’abo mu bihugu bya Afurika.

Ibiro ntaramakuru by’u Burusiya, Tass, byatangaje ko u Burusiya, Ukraine, Turikiya n’Umuryango w’Abibumbye barimo kuganira ku buryo bwatuma ibyo binyampeke bigera ku isoko mpuzamahanga.

Mu buryo butekerezwaho, Turikiya ishobora gushyiraho igicumbi byaba bihuriramo, i Istanbul.

U Burusiya bwatangaje ko buzatanga ibikenewe byose kugira ngo ibi binyampeke bibashe gusohoka binyuze ku byambu bya Berdyansk na Mariupol, bigaca mu Nyanja y’Umukara n’Inyanja ya Azov.

Hari kandi kuba byanyuzwa ku cyambu cya Odessa ubu kikigenzurwa na Guverinoma ya Kyiv; cyangwa mu mugezi wa Danube bigasohokera muri Romania.

Bishobora kandi gusohokera muri gari ya moshi bigatungukira muri Hongrie, Romania na Pologne, ariko ngo byasaba ko hagira ibibanza guhindurwa kuri gari ya moshi.

Hari no kuba ibi binyampeke byasohoka muri Ukraine bigaca muri Belarus, ingingo ariko itapfa kwemerwa kuko byasaba ko icyo gihugu kibanza gukurirwaho ibihano cyafatiwe mu bucuruzi mpuzamahanga.

Ukraie ifite ibinyampeke byinshi bikeneye kujya ku isoko mpuzamahanga

McDonald mu isura nshya mu Burusiya

Amaduka 15 yakoreshwaga na restaurant za McDonald iheruka gufunga imiryango mu Burusiya agiye kongera gufungurwa, akazaba akoresha izina rishya. Azafungurwa guhera ku wa 12 Kamena.

Biteganywa ko restaurant 12 zizafungurwa mu Murwa Mukuru Moscow, izindi eshatu zikorerr mu mijyi ya Odintsovo, Reutov na Khimki.

Biteganywa ko ayo izo restaurant zizaba zifite ibyo kurya bitandukanye n’ibyari bimenyerewe bya MacDonald, ariko zizagumana abakozi bose ku masezerano bari basanganywe, nibura mu gihe cy’imyaka ibiri iri imbere.

McDonald yahagaritse ibikorwa muri restaurant 850 yari ifite mu Burusiya ku wa 14 Werurwe, kubera intambara yo muri Ukraine. Ibikorwa byayo byaje kugurishwa umucuruzi Alexander Govor.

U Burusiya burimo gutanga ibiribwa muri Ukraine

U Burusiya bwatangaje ko bwatanze inkunga y’ubutabazi ingana na toni 642 mu duce twa Luhansk na Donetsk.

Ikigo gishinzwe iby’ubutabazi mu Burusiya cyavuze ko kuri uyu wa Kabiri tariki 7 Kamena habaye ibikorwa umunani by’ubutabazi mu mijyi ya Kharkiv, Kherson na Zaporozhye, byo gutanga toni 642 z’ibikenerwa by’ibanze birimo ibiribwa.

Iki kigo kivuga ko guhera ku wa 2 Werurwe, u Burusiya bumaze gutanga muri Ukraine toni 27,334.7. Ni ibintu byatanzwe mu bikorwa 1,122 mu duce dutandukanye.

Amerika yafatiriye ubwato buhenze bw’Umurusiya

Leta zunze ubumwe za Amerika zavanye muri Fiji ubwato bugezweho bw’Umurusiya bufite gaciro ka miliyoni $325.

Kuri uyu wa Kabiri nibwo Amerika yatsinze ikirego yatanze muri Fiji, isaba gufatira ubwo bwato buzwi nka Amadea bwa Suleyman Kerimov, ushinjwa kuba umuntu wa hafi w’ubutegetsi bwa Vladimir Putin, unamushyigikiye mu ntambara muri Ukraine.

Icyemezo cy’umucamanza kikimara gufatwa, Amerika yahise itwara ubwo bwato yirinda ko cyanajuririrwa.

Ni ubwato bushobora kugwaho kajugujuru, burimo ubwogero bugezweho n’ibindi byinshi.
Ubwo bwato bureshya na metero 130 bwageje muri Fiji ku wa 13 Mata, buvuye muri Mexico.

Urukiko rwemeje ko kugumisha ubu bwato muri Fiji ari ugupfusha ubusa amafaranga, kuko kubwitabo bihenze cyane.

Ibiro bishinzwe ubugenzacyaha muri Amerika, FBI, bivuga ko kwita kuri ubwo bwato bitwara hagati ya miliyoni $25 na $30 ku mwaka, icyo gihugu kikazayishyura.

Ubu bwato bwamaze gufatirwa na Leta zunze Ubumwe za Amerika, ibuvanye muri Fiji

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .