00:00:00 IGIHE NETWORK KN KINYARWANDA EN ENGLISH FR FRANCAIS

Ukraine yashinje u Burusiya kuba muri Loni bitemewe n’amategeko, isaba ko bwirukanwa

Yanditswe na IGIHE
Kuya 27 Ukuboza 2022 saa 11:17
Yasuwe :

Minisiteri y’Ububanyi n’amahanga ya Ukraine yatangaje ko u Burusiya buri mu Kanama k’Umuryango w’Abibumbye gashinzwe umutekano ndetse no muri uyu muryango ubwawo, mu buryo bunyuranyije n’amategeko, isaba ko bwirukanwa, bugasaba kuwinjiramo buhereye kuri zeru.

Ibi bihugu byombi bihanganye mu ntambara ikomeye guhera muri Gashyantare uyu mwaka.

Mu itangazo iyi minisiteri yasohoye, yavuze ko ubwo Ubumwe bwa Soviet (USSR) bwahirimaga mu 1991, bwasize icyuho mu bijyanye n’uburenganzira mpuzamahanga n’inshingano icyo gihugu cyari gifite.

Ukraine ivuga ko muri ibyo, harimo n’ikijyaye n’umwanya uhoraho muri aka kanama, ubu ufitwe n’u Burusiya.

Ubwo icyo gihugu cya rutura cyari kimaze gucikamo ibice, hasigaye ibihugu 15 by’u Burusiya, Russia, Ukraine, Georgia, Belarus, Uzbekistan, Armenia, Azerbaijan, Kazakhstan, Kyrgyzstan, Moldova, Turkmenistan, Tajikistan, Latvia, Lithuania na Estonia.

Ukraine ivuga ko nyuma y’uko gusenyuka, mu Kanama gashinzwe umutekano hahise hazamo izina ry’u Burusiya busimbuye USSR, ibintu ngo bitakurikije amategeko.

Yakomeje iti "U Burusiya bwafashe umwanya uhoraho mu Kanama ka Loni gashinzwe umutekano, karenze ku mategeko yose Umuryago w’Abibumbye ugenderaho."

Icyo gihe ngo hashingiwe ku ibaruwa Perezida Boris Yeltsin wayoboraga u Burusiya (Russian Soviet Federative Socialist Republic, RSFSR) nk’igihugu cyari kinini mu bisigaye, yandikiye Umunyamabanga mukuru w’Umuryango w’Abibumbye, mu myaka 31 ishize.

Ukraine ivuga ko mu masezerano Umuryango w’Abibumbye wubakiyeho nta hantu na hamwe hagaragara u Burusiya (Russian Federation),kimwe no mu ngingo ya 23 yayo igaragaza urutonde rw’abanyamuryango b’akanama gashinzwe umutekano, aho ivuga "Union of Soviet Socialist Republics", aho kuba yavuga Russian Federation nk’uko u Burusiya bwitwa ubu.

Bityo, ngo kugira igihugu cyitwa "Russian Federation" mu Umuryango w’Abibumbye cyangwa mu Kanama gashinzwe umutekano, byagombaga kunyura mu nzira ziteganywa n’amategeko.

Ukraine ivuga ko icyemezo cyo mu Ukuboza 1991 cyo kugira ngo u Burusiya bugumane umwanya wa USSR muri Loni, byagombaga kwemezwa n’akanama gashinzwe umutekano n’Inteko rusange y’Umuryango w’Abibumbye, nk’uko byakozwe ku bihugu bya Repubulika ya Czech na Slovakia, ubwo "Czechoslovakia" yari umunyamuryango wa Loni, yari itakiriho nk’igihugu.

Yakomeje iti "Bityo, U Burusiya ntibwanyuze mu nzira ziteganywa n’amategeko ngo busigarane umwanya wa USSR mu kanama gashinzwe umutekano. Mu buryo bw’amategeko na politiki, hakwiye kubaho umwanzuro umwe: U Burusiya bwafashe ku gahato umwanya wa w’Ubumwe bwa Soviet mu Kanama ka Loni gashinzwe umutekano."

Ukraine ivuga ko amasezerano atarashyizweho umukono n’inteko ishinga amategeko yayo yitirirwa ko yemerwa USSR, adakwiye kwemerwa.

Mu gihe ngo u Burusiya bwafataga uriya mwanya, RSFSR ngo ntiyari n’umunyamuryango wa Loni.

Ukraine inashinja u Burusiya ko uretse kuba muri Loni bitemewe n‘amategeko, itubahiriza inshingano z’abanyamuryango kuko bwakomeje gushoza intambara ku bandi.

Ukraine yanashinje u Burusiya gukomeza gukora iterabwoba kuri Ukraine, kimwe n’ibindi bihugu, itanga urugero ku ihanurwa ry’indege ya Malaysia Airlines yari mu rugendo MH17.

Yasabye ko ibihugu binyamuryango “byakwambura u Burusiya umwanya uhoraho w’akanama ka Loni gashinzwe umutekano kubwirukana mu Umuryango w’Abibumbye muri rusange.”

Ni icyemezo ngo kitagira ingaruka ku myanzuro yafashwe n’uyu muryago cyangwa izindi nzego zawo.

Ibyo ngo bya bivuze ko u Burusiya bwasaba bundi bushya kwinjira muri uyu muryango, bukemera kubahiriza intego zose ugenderaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .