Ukraine yatangije ibitero muri Kursk tariki ya 6 Kanama 2024, mu rwego rwo gushyira igitutu ku ngabo z’u Burusiya zayishojeho intambara muri Gashyantare 2024.

Perezida wa Ukraine, Volodymyr Zelensky, yatangaje ko yavuganye n’Umugaba Mukuru w’ingabo zabo, Oleksandr Syrskyi, amumenyesha ko ubu ziri kugenzura uduce 74 two muri Kursk.

Zelensky yagize ati “Ndi kuvugana bihoraho n’Umugaba Mukuru, Oleksandr Syrskyi, nakira amakuru ku rugamba n’ibikorwa byacu mu ntara ya Kursk. Nubwo urugamba rutoroshye, ingabo zacu ziri kwagura ibirindiro muri Kursk. Uduce 74 turi kugenzurwa na Ukraine.”

Uyu Mukuru w’Igihugu yatangaje aya makuru nyuma y’aho Gen Syrskyi avuze ko ingabo za Ukraine zimaze gufata ubutaka bwo muri Kursk bungana na kilometero kare 1000, nubwo u Burusiya buvuga ko ubwafashwe bukabakaba kilometero kare 500.

Nk’uko Al Jazeera yabitangaje, mu ijoro ryakeye Ukraine yagabye ibitero by’indege zitagira abapilote na misile mu ntara zo mu majyepfo y’u Burusiya zirimo Kursk, Voronezh, Belgorod na Nizhny Novgorod.

Ibi bitero byatumye abarenga 200.000 batuye muri izi ntara zegereye Ukraine bahunga, Guverineri wa Belgorod, Vyacheslav Gladkov, we afata icyemezo cyo gushyira iyi ntara mu bihe bidasanzwe.

Guverineri Gladkov yagize ati “Ikibazo cyo mu ntara ya Belgorod kiri kurushaho gukomera. Twafashe icyemezo cyo gutangaza ibihe bidasanzwe guhera uyu munsi, dusaba Leta gutangaza ibihe bidasanzwe ku rwego rw’igihugu.”

Uyu muyobozi yasobanuye ko nubwo nta muntu wapfuye cyangwa ngo akomerekere mu gitero cy’ingabo za Ukraine muri Belgorod, zimwe mu nyubako zaho zangiritse.

Leta y’u Burusiya kuri uyu wa 14 Kanama 2024 yatangaje ko muri rusange yasenye indege 117 zitagira abapilote za Ukraine ndetse na misile nyinshi zarashwe muri izi ntara.

Perezida Zelensky yatangaje ko ingabo za Ukraine ziri kugenzura uduce 74 muri Kursk