00:00:00 IGIHE NETWORK KN KINYARWANDA EN ENGLISH FR FRANCAIS

Ukraine irimo gupfusha abasirikare 200 ku munsi: Amakuru agezweho mu ntambara n’u Burusiya

Yanditswe na IGIHE
Kuya 10 June 2022 saa 09:28
Yasuwe :

Umujyanama wa Perezida wa Ukraine, Volodymyr Zelensky, yatangaje ko iki gihugu kirimo gupfusha abasirikare bari hagati ya 100 na 200 ku munsi, mu ntambara kirimo kurwana n’u Burusiya.

Mykhaylo Podolyak yabwiye BBC ko Ukraine ikeneye intwaro zikomeye kandi zigezweho zifitwe n’ibihugu byo mu Burengerazuba, kugira ngo ibashe guhangana n’u Burusiya mu bice by’Uburasirazuba bw’icyo gihugu, ahazwi nka Donbas.

Yagize ati "Ingabo z’u Burusiya zirimo gukoresha imbaraga zose zitari iza kirimbuzi ku rugamba, harimo intwaro nini, intwaro zirasa za rokete (rockets) nyinshi ndetse n’indege."

Yavuze ko Ukraine ikeneye nibura imbunda zirasa za rokete ziri hagati ya 150 na 300, umubare urenze uwo iki gihugu kimaze guhabwa kuva intambara yatangira ku wa 24 Gashyantare.

Minisiteri y’Ingabo ya Ukraine yaherukaga gutangaza ko abasirikare nibura 100 bapfa buri munsi, naho abagera muri 500 bagakomereka.

Ukraine irimo gupfusha abasirikare benshi, ari nako ibikorwa remezo bisenyuka

U Burusiya bukomeje kuburira Ukraine

Guverinoma y’u Burusiya yateguje Ukraine ko umunsi yahawe intwaro zirasa kure ikazirashisha mu Burusiya, nabo bazakoresha izindi mbaraga bafite mu kwirwanaho.

Intumwa y’u Burusiya mu biganiro bigamije kugenzura ikoreshwa ry’intwaro, i Vienna, yabwiye Rossiya-24 TV kuri uyu wa Kane ko kuba Ukraine irimo guhabwa intwaro za howitzers na HIMARS (High Mobility Artillery Rocket System) MLRS (Multiple Launch Rocket System) zirasa ibisasu byinshi kandi kure cyane, bitabangamiye agace ka Donbas karimo kuberamo imirwano gusa, ahubwo bibangamiye n’u Burusiya.

Yakomeje ati "Twagaragaje neza aho u Burusiya buhagaze. U Burusiya niburaswaho n’izi ntwaro zirasa kure cyane, igisubizo cyihuse kuri icyo cyemezo kizahita gishyirwa mu bikorwa ako kanya."

Uyu mugabo yanavuze ko intwaro zahawe Ukraine by’umwihariko za Javelins, zirimo kugurishwa ahandi, kandi ngo nta kuntu byakorwa abayobozi ba gsirikare na politiki muri Ukraine batabizi.

Mu cyumweru gishize Leta zunze ubumwe za Amerika zatangaje ko zigiye guha Ukraine za HIMARS n’izindi. Ni HIMARS ngo zishobora kurasa mu ntera itarenga kilometero 80.

Bakatiwe urwo gupfa

Urukiko rw’Ikirenga rwa Repubulika ya rubanda ya Donetsk, kuri uyu wa Kane rwakatiye urwo gupfa Abongereza babiri: Shaun Pinner na Aiden Aslin, hamwe n’umunya-Maroc Saadoun Brahim, bahamijwe kugira uruhare mu ntambara yo muri Ukraine nk’abacanshuro.

Ibiro ntaramakuru by’u Burusiya, Tass, byatangaje ko abaregwa bose bemeye ibyaha byose baregwa.

Abongereza babiri n'Umunya-Maroc barwanaga muri Ukraine bakatiwe urwo gupfa

U Burusiya bwabonye inzira y’ibicuruzwa mu Bushinwa

U Burusiya bwafunguye ikiraro kigiye kujya kinyuzwaho imodoka zitwaye ibicuruzwa bitandukanye, gihuza akage ka Blagoveshchensk na Heihe mu Bushinwa, kinyuze ku mugezi wa Amur nk’uko Tass yabitangaje.

Minisitiri w’Intebe wungirije akaba n’Intumwa yihariye ya Perezida Putin mu bice by’iburasirazuba, Yury Trutnev, yavuze ko icyo kiraro ari ikindi kimenyetso cy’ubucuti hagati y’ibihugu byombi, kigahuza abaturage b’u Burusiya n’u Bushinwa.

Yagize ati "Imirimo y’ubwubatsi yatangiye mu 2016, ibihumbi by’abaturage bo mu Burusiya n’u Bushinwa babigiramo uruhare, bakora amasaha 24/7."

Kuri uyu wa Gatanu nibwo amakamyo ya mbere yaciye kuri icyo kiraro.

Byitezwe ko kizazamura ubucuruzi hagati y’ibihugu byombi bukagera kuri miliyari $200, nk’uko ambasaderi w’u Burusiya mu Bushinwa, Andrey Denisov.

Yakomeje ati "u Burusiya n’u Bushinwa birimo kubaka ibiraro, ntabwo ari ukubisenya."

"Nta gushidikanya, uburyo bushya bwo kwambuka umupaka buzagira uruhare mu guteza imbere ubucuruzi hagati y’ibihugu byombi, byitezwe ko buzagera ku mubare wari utarabaho - ntekereza ko hari amahirwe yo kugera kuri miliyari $200."

Ni inzira nshya u Burusiya bwungutse, nyuma yo gukomanyirizwa ku byambu byinjira mu Ubumwe bw’u Burayi.

U Burusiya burimo gukoresha intwaro zikomeye muri Ukraine
U Burusiya bwaburiye Ukraine nirasa ku butaka bwayo ikoresheje imbunda nshya irimo guhabwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .