00:00:00 IGIHE NETWORK KN KINYARWANDA EN ENGLISH FR FRANCAIS

Ukraine irimo gupfusha abasirikare 100 buri munsi: Intambara n’u Burusiya irakomeje

Yanditswe na IGIHE
Kuya 1 June 2022 saa 03:18
Yasuwe :

Perezida wa Ukraine, Volodymir Zelensky, yatangaje ko nibura buri munsi igisirikare cy’iki gihugu gipfusha abasirikare bari hagati ya 60-100, naho abagera kuri 500 bagakomereka.

Ni ingaruka iki gihugu gikomeje guhura na zo kubera intambara cyagabweho n’u Burusiya guhera muri Gashyantare.

Perezida Zelensky yabwiye Televiziyo Newsmax ati "Ikibazo gikomeye kiri mu Burasirazuba bwa Ukraine no mu Majyepfo ya Donetsk na Luhansk. Ibintu birakomeye cyane, turimo gupfusha abasirikare hagati ya 60-100 buri munsi bagwa ku rugamba, ndetse abandi bagera kuri 500 bakomerekera mu kazi."

Abasirikare benshi bakomeje gusiga ubuzima muri iyi ntambara

U Burusiya bwaburiye Amerika ku ntwaro ishaka guha Ukraine

Guverinoma y’u Burusiya yanenze Leta zunze Ubumwe za Amerika ku ntwaro ishaka guha Ukraine, ivuga ko bishobora kongera ibyago by’uguhangana kweruye hagati y’ibi bihugu byombi.

Minisitiri wungirije w’Ububanyi n’Amahanga w’u Burusiya, Sergei Ryabkov, yabwiye Ibiro Ntaramakuru RIA Novosti ko Moscow ibona "nabi cyane" inkunga y’intwaro bakomeje guha Leta ya Kyiv, by’umwihariko intwaro zigezweho za HIMARS.

Ni intwaro zishobora kohereza ibisasu byinshi icyarimwe kandi biraswa mu ntera ndende.

Umuvugizi w’Ibiro bya Perezida Putin, Dimitry Peskov, kuri uyu wa Gatatu yabwiye itangazamakuru ko ibyo Amerika irimo gukora ari ukongera amavuta mu muriro.

Yakomeje ati "Amerika ikomeje kuba mu murongo w’uko izarwanya u Burusiya kugeza ku Munya-Ukraine wa nyuma."

Ntabwo dushaka kurasa mu Burusiya- Zelensky

Umwe mu bayobozi ba Leta Zunze Ubumwe za Amerika yatangaje ko bashaka guha Ukraine intwaro nshya ziraswa mu ntera ndende, ariko ngo zizaba zohereza ibisasu bitarenga kilometero 80.

Perezida Zelensky yatangaje ko nubwo barimo gusaba izo ntwaro ndetse benda kuzihabwa, nta gahunda bafite yo gutangiza intambara ku butaka bw’u Burusiya.

Ni intwaro zizwi nka "multiple-launch rocket systems" zishobora kurasa mu Burusiya, imbunda ziri muri Ukraine.

Zelensky yagize ati "Ndabizi ko abantu bamwe muri Leta Zunze Ubumwe za Amerika barimo kuvuga, cyangwa se umuntu muri White House akavuga ko dushobora kuzikoresha mu gutera u Burusiya. Ntabwo duteganya gutera u Burusiya. Ntabwo dutumbereye mu Burusiya. Ntabwo turimo kurwanira ku butaka bwabo."

Perezida Zelensky avuga ko badashaka kurasa mu Burusiya

Abanyamahanga bafatiwe muri Ukraine bashobora kwicwa

Ubuyobozi bwa Repubulika ya Rubanda ya Donetsk (DPR) bwatangaje ko budateze gutanga abacanshuro b’abanyamahanga bafatiwe ku ruganba muri Ukraine, ahubwo ko bazacirwa imanza ndetse bashobora gukatirwa urwo gupfa.

DPR ni agace ka Ukraine, ariko yarigumuye yigira repubulika yigenga, ndetse u Burusiya bwamaze kuyemera ku buryo burimo gufatanya guhangana na Guverinoma ya Kyiv.

Mu bantu bafungiwe muri DPR bashobora gukatirwa urwo gupfa harimo Abongereza babiri, Shaun Pinner na Andrew Hill, ndetse n’umuturage ukomoka muri Maroc, Saadun Brahim.

Umwe mu badepite ba DPR, Yelena Shishkina, yabitangarije Tass kuri uyu wa Gatatu.

Yakomeje ati "Ntabwo barwanaga hano nk’abasirikare ba leta, bagengwa n’amasezerano mpuzamahanga. Bakoraga nk’ibyihebe, abashyigikiye amatwara y’Aba-Nazi, bityo rero kubahererekanya nk’imfungwa z’intambara ntabwo bishoboka."

Mu bandi ngo iyi leta yigumuye kuri Ukraine itazatanga harimo n’abarwanyi bafashwe, bari bagize umutwe wa Azov ukorera mu majyepfo ya Ukraine.

U Burusiya bwafungiye gaz Denmark na Shell

Ikigo gishinzwe Ingufu mu Burusiya, Gazprom Export, cyatangaje ko kigiye guhagarika ibikomoka kuri peteroli byoherezwaga ikigo gikomeye muri Denmark, Orsted, na Shell Energy Europe Limited, kubera ko byananiwe kwishyura gaz muri rubles - ifaranga rikoreshwa mu Burusiya.

Gazprom Export yatangaje ko kugeza ku wa Kabiri tariki 31 Gicurasi ubwo umunsi wasozwaga, yari itarakira ubwishyu bwa gaz yahaye Orsted [Sosiyete y’Ingufu muri Denmark] muri Mata.

Icyo kigo ngo cyari cyamenyeshejwe ko ku wa 1 Kamena 2022 kizahagarikirwa gaz, kugeza igihe kizubahiririza itegeko ryatanzwe na Perezida Vadimir Putin, ko ibihugu bitari inshuti bigomba kwishyura gaz muri rubbles.

Denmark yahise ijya ku rutonde rumwe na Pologne, Bulgaria, Finland n’u Buholandi byahagarikiwe gaz n’u Burusiya, kubera ko byanze kuyishyura muri rubles.

U Burusiya bwoherezaga gaz muri Denmark hagendewe ku masezerabo yasinywe mu 2006, yagombaga kurangira mu 2030.

Mu mwaka wa 2021 u Burusiya bwohereje muri Denmark metero kibe miliyari 1.97, aho yazamutseho 6.5% guhera mu 2020. Bingana na 66% bya gaz icyo gihugu gikenera.

Gazprom Export kandi yatangaje ko igiye guhagarika gaz yoherezwaga Shell Energy Europe Limited ku masezerano yo kohereza gaz mu Budage, kubera ko nayo itishyuye gaz yo muri Mata.

Amasezerano bifitanye azarangira mu 2031 ateganya icyo kigo kibaha metero kibe miliyari 1.5 buri mwaka.

U Burusiya bwazamuye imishahara nubwo buri mu ntambara

Perezida Vladimir Putin yasinye iteka rizamura imishahara fatizo y’abakozi, ndetse n’amafaranga atangwa ku bwiteganyirize bw’abaozi batakiri mu kazi, bizamurwaho 10%.

Ku wa 30 Gicurasi, Minisitiri w’Intebe Mikhail Mishustin yasinye iryo tegeko mu izina rya Perezida Putin.

Ni itegeko ryitezweho gufasha Abarusiya basaga miliyoni 35 bahabwa ubwizigame bwabo.

Guhera kuri uyu wa 1 Kamena, umushahara fatizo wazamutseho 10% uba 15.279 rubles, ni ukuvuga hafi $250. Ni izamuka rihita rigera ku mishahara y’Abarusiya basaga miliyoni enye.

U Burusiya bwenda gufata Umujyi wa Severodonetsk

U Burusiya bumaze kwigarurira igice kinini cy’Umujyi wa Severodonetsk ubarizwamo inganda nyinshi, nk’uko ubuyobozi bwawo bwabitangaje.

Guverineri w’Agace ka Luhansk, Serhiy Haidai, yatangaje ibikorwaremezo bikomeye muri Severodonetsk bimaze gusenywa, ndetse hafi 60 ku ijana by’inyubako ziturwamo zarangiritse ku buryo zidashobora gusanwa.

Yakomeje ati "Severodonetsk hafi ya yose ubu iragenzurwa n’Abarusiya."

Hagati aho Umunyamabanga Mukuru w’Ishyaka United Russia riri ku butegetsi muri icyo gihugu, Andrey Turchak, yatangaje ko uduce bamaze gufata muri Ukraine dushobora kuba utw’u Burusiya, nk’uko byatangajwe n’Ibiro Ntaramakuru, RIA Novosti.

Iyo ni imijyi ya Donetsk, Luhansk, Kherson na Zaporizhzhia.

Yakomeje ati "Icyemezo gishobora gufatwa n’abaturage ubwabo, kandi nzi neza ko bazabyemera. Bityo, ntabwo nshidikanya ko utu duce tuzaba utw’u Burusiya."

Ni nacyo cyizere afite ku duce tugize Repubulika za rubanda za Donetsk na Luhansk.

Yakomeje ati "Abaturage barashaka umutekano, ituze, kugira ngo nyuma y’imyaka umunani y’iterabwoba ishyigikiwe n’Uburengerazuba bw’Isi, haboneke amahoro arambye yakomeje kwifuzwa."

Amerika ishaka guha Ukraine intwaro zishobora kurasa mu Burusiya
Intambara ya Ukraine n'u Burusiya ikomeje gufata indi ntera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .