Uganda: Minisitiri wavuze ko kugira imihanda mibi ari byiza ku bukerarugendo yabaye iciro ry’imigani

Yanditswe na IGIHE
Kuya 15 Mutarama 2020 saa 12:18
Yasuwe :
0 0

Umunyamabanga wa Leta muri Minisiteri y’Ububanyi n’Amahanga ya Uganda, Henry Okello Oryem, yabaye iciro ry’imigani ku mbuga nkoranyambaga nyuma yo kuvuga ko kuba bafite imihanda mibi nta kibazo kirimo kuko nayo ikurura ba mukerarugendo.

Ibinyamakuru byo muri Uganda byatangaje ko Okello yatangaje ayo magambo ubwo yari imbere y’Inteko Ishinga Amategeko.

Yagize ati “Twumva ngo imihanda mibi ituma abantu bahora bijujuta, ariko ku bandi bantu b’ahantu hateye imbere batigeze bahura no gufatwa n’ibyondo, ngo basunike imodoka yahagamye mu binogo, byaba uburyo bwiza ku bukerarugendo.”

Abagize Inteko Ishinga Amategeko bagaragaje ko imihanda myinshi mu gihugu yangiritse muri iyi minsi, nyuma y’imvura yibasiye ibihugu byo mu Burasirazuba bwa Afurika.

Minisitiri Okello yanabajijwe niba atari yo mpamvu ibindi bihugu bituranye na Uganda bikomeje gukurura ba mukerarugendo kurusha igihugu cyabo.

Icyakora, Okello yabwiye abadepite ko imihanda atari cyo kibazo, ndetse ngo bo ibimenyetso bafite byerekana ko ba mukerarugendo benshi bifuza kujya muri Uganda.

Ayo magambo amaze kugera mu binyamakuru yazamuye uburakari n’ibitwenge ku mbuga nkoranyambaga.

Uwitwa Gen Dralagar kuri Twitter yanditse agaragaza ko ababajwe n’ibyo Okello yatangaje.

Ati “Birababaje, ari gushaka guhindura imijyi ya Uganda ibyaro. Dukwiriye kwirukana abayobozi nk’abo badafite icyerekezo. Ibikorwa remezo bigezweho nk’imihanda ni ingenzi mu mibereho y’abaturage, ntabwo byakabaye bisimbuzwa ubukerarugendo.”

Uwitwa Lethal Fairy we yagize ati “Amarira yashotse kandi birababaje. Ubundi aba bantu bahabwa akazi gute? Ni iki bagenderaho kandi kuki bemererwa kuvugira mu ruhame?”

Onen Philip we yagize ati “Ni ukuvuga ngo tugomba kurekera ibinogo mu mihanda kubera abakerarugendo bake, tubagurane miliyoni z’abanya-Uganda bashaka kwinezeza ?”

Africa News yatangaje ko ubukerarugendo ari bwo bwinjiriza amadevize menshi Uganda, nyamara Guverinoma inengwa kuba ntacyo ikora ngo yongere ireme rya serivisi muri urwo rwego, bikarangira abakerarugendo benshi bigiriye mu bihugu bituranye na Uganda nubwo ikunzwe gufatwa nk’isaro rya Afurika.

Okello yavuze ko imihanda mibi muri Uganda ari amahirwe ku bukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .