00:00:00 IGIHE NETWORK KN KINYARWANDA EN ENGLISH FR FRANCAIS

Ubwicanyi bukomeye bwakoreshejwe imbunda muri Amerika muri 2022

Yanditswe na Zigiranyirazo Bajecteur
Kuya 14 Mutarama 2023 saa 01:25
Yasuwe :

Kugeza none ntabwo haratangazwa imibare ikomatanyije y’abantu baguye mu bwicanyi bwakozwe muri Leta Zunze Ubumwe za Amerika mu 2022, impamvu ituma birushaho kugorana haba ku ruhande rwa leta, urw’imiryango idaharanira inyungu cyangwa ibinyamakuru ni ukugira ngo hashyirwe umucyo ku kibazo cy’abakunze kurasirwa mu ruhame muri icyo gihugu.

Mu mwaka wa 2022, ubwicanyi bukomeye bwabayeho muri Amerika, ni ubwabereye ku ishuri rya Uvalde muri Leta ya Texas ku wa 24 Gicurasi aho abana bagera kuri 19 n’abarimu babiri bishwe barashwe, ibi bikaba nyuma y’iminsi 10 harashwe abandi bantu 10 bagapfa mu nzu yo guhahiramo ya Buffalo.

The New York Times ivuga ko amatsinda atandukanye ari yo agenda agerageza gushyira umucyo kuri iki kibazo cy’ubwicanyi akenshi bukorwa n’abitwaje imbunda, aho ivuga ko ayo matsinda ashingira ku bantu bishwe, abakomerekejwe ndetse n’aho ubwo bugizi bwa nabi buba bwabereye, haba mu ruhame cyangwa abishwe basanzwe mu ngo zabo.

Hari nk’itsinda rigizwe n’abanyamuryango badaharanira inyungu ryitwa “Gun Violence Archive”, rikurikirana imibare y’abicwa barashwe, aho akenshi rishingira ku makuru rivanye muri raporo za polisi, ibinyamakuru cyangwa bakayavana ahantu hatandukanye.

Iri tsinda risobanura ubu bwicanyi nk’iraswa ry’abantu ryahitanye cyangwa rigakomeretsa nibura abagera kuri bane.

Imibare y’iri tsinda, igaragaza ko mu 2022 muri Amerika habayeho ibikorwa by’ubwicanyi bukoreshejwe imbunda bigera kuri 648 aho muri byo, inshuro 21 zagiye zirasirwamo abantu batanu kuzamura.

Aba barimo n’abarasiwe mu kabyiniro gakunze guhurirwamo n’abaryamana n’abo bahuje igitsina muri Colorado ku wa 20 Ugushyingo, iraswa ryahitanyemo batanu.

Iri tsinda kandi, mu 2021 ryari ryabaruye ibikorwa by’ubwicanyi bigera kuri 692 aho inshuro 28 muri byo, zaguyemo abantu bane kuzamura.

Urutonde rukurikira, rugaragaza ubwicanyi bukomeye bwabaye muri Amerika muri 2022.

Ku wa 22 Ugushyingo 2022, Chesapeake, muri Leta ya Virginia, uwari umukozi wa Walmart yarashe abantu batandatu bagapfa. Ubuyobozi bwatangaje ko uyu mugabo na we yaje gusangwa yapfuye, polisi ikaba yaravuze ko yamusanganye igikomere cy’isasu ku buryo ashobora kuba na we yarahise yirasa.

Ku wa 20 Ugushyingo 2022, Colorado Springs. Ubu bwicanyi bwakorewe mu kabyiniro gakunze kuyobokwa n’abaryamana n’abo bahuje igitsina, bwahitanye batanu, abandi 17 barakomereka ndetse n’uwabarashe yarahakomerekeye nyuma aza kujyanwa mu bitaro.

Ku wa 13 Ugushyingo 2022, Charlottesville muri Virginia. Uwahoze ari umukinnyi w’umupira w’amaguru yarashe anica abanyeshuri batatu bo muri Kaminuza ya Virginia bakina uwo mukino, mu gihe abandi babiri bakomeretse ubwo bari ku igaraje bavuye kureba umukino waberaga muri Washington.

Ku wa 13 Ukwakira 2022 i Raleigh, mu Majyaruguru ya California, umugizi wa nabi yishe abantu batanu barimo n’umupolisi utari uri mu kazi, akomeretsa abandi babiri.

Ku wa 07 Nzeri 2022, Memphis, Tennessee, umusore w’imyaka 19 yarashe abantu bane barapfa, akaba yarakoze iki gikorwa cy’ihohotera ryitwaje imbunda anifata amashusho yacishaga ku rubuga nkoranyambaga rwa Facebook mu buryo bw’ako kanya (Live).

Ku wa 17 Nyakanga 2022, Greenwood, Indiana. Umusore w’imyaka 20 witwa Jonathan Douglas Sapirman, yishe abantu batatu akomeretsa abandi babiri, gusa nyuma na we yahise araswa arapfa.

Ku wa 04 Nyakanga 2022: Highland Park, III, uwitwa Robert E. Cromo III yishe abantu barindwi ahittwa Highland Park akomeretsa abandi benshi bari mu kigero kiri hagati y’imyaka umunani na 85. Uyu musore w’imyaka 21 icyo gihe yazamutse hejuru ku gisenge cy’inyubako atangira kumisha urufaya rw’amasasu mu bantu bari mu karasisi ko ku wa 04 Nyakanga.

Muri Kamena, habayeho ibikorwa bikomeye by’ubwicanyi bine muri Amerika, harimo icyabaye ku wa 30 Kamena aho abantu icyenda bakomerekejwe n’amasasu ahitwa Newark. Polisi yatangaje ko byaturutse ku modoka yari yibwe, abakomeretse bakaba bari hagati y’imyaka 17 na 68.

Si aho gusa kuko no ku wa 20 Kamena habaye irindi raswa ahitwa Harlem ryahitanye umukinnyi wa Basketball w’imyaka 21 abandi bantu umunani babikomerekeramo.

Ibindi bikorwa nk’ibyo byabaye muri Kamena, ni icyabaye ku wa 04 Kamena 2022 kikabera muri Philadelphia, aho polisi yatangaje ko hishwe abantu batatu abandi 12 bagakomereka. Muri iyo Weekend habaye ibindi bikorwa by’ubwicanyi bw’abitwaje imbunda aho abagera kuri batandatu babiguyemo, hagakomereka abandi babarirwa mu binyacumi mu bice bya Arizona, Carolina y’Epfo, Tennessee na Virinia.

Muri uko kwezi kandi harashwe abantu batandukanye i Tulsa muri Okla, aho barindwi babiburiyemo ubuzima. Polisi yatangaje ko uwakoze ubu bwicanyi na we yahise yiyica.

Muri Gicurasi habaruwe ibikorwa bikomeye by’ubwicanyi bigera kuri bine harimo icyabereye ku ishuri rya Uvalde muri Texas kigahitana abanyeshuri 19 n’abarimu babiri, icyabaye ku wa 15 Gicurasi 2022, kikabera ahitwa Laguna Woods muri California kikagwamo umuntu umwe abandi bane bagakomereka.

Hari kandi icyabereye Buffalo ku wa 14 Gicurasi 2022, aho umusore w’uruhu rwera witwa Payton S. Gendron w’imyaka 18 yishe abantu 10 b’abirabura abarashe, abandi batatu bagakomereka. Ku wa 13 uko kwezi nabwo abantu 16 bakomerekejwe n’amasasu mu gace ka Milwaukee ahari hamaze kubera umukino wa N.B.A.

Muri Mata habaye ubwicanyi bukomeye bubiri, harimo ubwabereye Brooklyn ku wa 12 bwakomerekeyemo abantu babarirwa mu binyacumi biturutse ku iraswa n’ituritswa ry’imyotsi ryabereye mu muhanda wo munsi y’ubutaka.

Ikindi gikorwa cy’ubugizi bwa nabi cyabaye muri Mata ni icyabaye ku italiki 03 mu tubyiniro two muri Sacramento, ahaguye abantu batandatu abandi 12 bagakomereka.

Kuwa 19 Werurwe 2022 abantu babiri barwanye bakoresheje imbunda bituma barasa undi muntu arapfa mu gihe irasana ryabo ryakomerekeyemo abandi 27 barimo abana batandatu, mu gihe muri Mutarama ku wa 23 habaye ubwicanyi muri Milwauke, aho abantu batandatu barimo abagabo batanu n’umugore umwe bahasize ubuzima.

Muri Leta zunze Ubumwe za Amerika habaye ubwicanyi bukomeye bwakoreshejwe imbunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .